Den sani di Samuel, Teresa, anga Magdalene taki, e soi taki sama e begi fu omen sowtu sani. Son wan fu den sani di den wani a bun sani. Son sama e begi anga den hii ati, ma te taawan e begi, a den sani di den be leli den e taki. Den pikin di e go a sikoo, e begi Gadu fu a yeepi den fu abaa go a wan taa kalasi. Son sama e begi te den wani wan sama wini wan pee efuso te den wani a osulibi fu den waka bun. Den sani ya e soi taki miliyunmiliyun sama e si begi enke wan sani di de fanowdu. Ondoosuku e soi taki sama di nái go a keliki seefi e begi.

Yu e begi? Efu a so a de, da san yu e taki te yu e begi? Winsi yu á gwenti begi, kande yu e akisi iseefi taki: ’Mi e fende wini te mi e begi? Wan sama e aliki mi te mi e begi?’ Wan man be sikiifi taki a wan enkii sani di begi e du, a meke ai meke i fii bun. A so wantu dataa e si a toli tu. Den taki begi e meke wan sama fii bun. A fu soso wan sama e begi? Den e fende wini te den e begi?

Beibel e soi taki begi a ná wan sani di e meke wan sama fii bun da a kaba. Ai soi u tu taki wan sama e aliki te wi e begi, ma u mu begi na a fasi di fiti. U mu akisi sani di fiti tu. Ma a tuu? Meke u luku san Beibel e taki.