SAN BEIBEL E TAKI: „U mu e . . . gi taawan paadon anga u hii ati tu te wan sama du wan hati sani anga u. Leti enke fa Yehofa e gi u paadon anga en hii ati, a so useefi mu gi taawan paadon tu.”​—Kolosesama 3:13.

San a sani ya wani taki? Beibel e soi taki sondu na aseefi enke a pai di wan sama mu pai wan taawan. Ai soi tu taki a gi di wi e gi taawan paadon na aseefi enke te i taigi a sama taki a ná abi fu pai i moo (Lukasi 11:4). Wan buku e soi taki „gi taawan paadon” aini Giikitongo wani taki „i nái de na a sama baka fu a pai i namonamo. Yu e fika a moni gi en”. A sani ya e soi taki te wi e gi wan sama paadon, u nái si enke a namonamo a sama mu du wan sani fu wi ati koo. Gi taawan paadon á wani taki a ogii di a sama du bun. A á wani taki a sani di a du nái hati u tu. Ma gi paadon wani taki u nái holi a sama na ati, winsi fa a du wan „hati sani anga u.”

A abi wini te wi e gi taawan paadon? Ala sama e meke fowtu, bika u sondu (Romesama 3:23). Neen ede meke a wan koni sani fu gi taawan paadon, bika wan dei wi o wani den gi u paadon tu. Boiti dati, te wi e gi taawan paadon, da useefi e fende wini tu. Sowtu wini wi o fende?

Te wi e holi sama na a ati efuso te wi e buuse den, da anga useefi wi e du. A sani de sa meke u nái piisii moo. Wi ati o boon sosokaali. A sa siki u tu. Tu ondoosukuman di den e kai Dr. Yoichi Chida anga Andrew Steptoe be sikiifi aini wan Kolanti (Journal of the American College of Cardiology) taki: „U kon si taki den sama di ati e boon efuso e holi taawan na ati, sa kisi a ati siki di den e kai CHD [coronary heart disease].”

Pakisei den wini di wi o fende te wi e gi taawan paadon anga u hii ati. Wi o man libi bun anga taawan. Ma san moo pelensipali, a Gadu baka wi e waka te wi e gi taawan paadon. Te wan sama tapu anga den ogii di ai du, da Gadu e gi en paadon anga en hii ati. A so a wani u du tu.​​—Malikisi 11:25; Efeisesama 4:32; 5:1.