A TOLI DI SIKIIFI A FESISE | BEGI ABI WINI?
Wan sama e aliki den begi fu u?
Son sama e si enke ai ten yu e lasi te yu e begi, bika den e si enke nawan sama e aliki a begi fu den. Taawan puubei fu begi, ma den si enke nawan sama nái piki den. Wan sama di nái biibi taki wan Gadu de, be du wan sani wan leisi fu soi fa ai si Gadu. A begi taki: „Taigi mi wan sani saafi a mi yesi baa.” Di a kaba begi neen a taki: „Gadu de pii. A á piki mi nawan sani.”
Ma Beibel e soi u taki wan sama e aliki den begi fu u. A sama de a Gadu. A Beibel e taki fu wan sani di den be taigi wan foluku fu fositen. Den be taigi den taki: „Te [Gadu] yee wan fu u bali kai en, a o yeepi a sama de. Fa i si a o bali, a so a o piki en” (Yesaya 30:19). Wan taa tekisi aini Beibel e taki: „Ai piisii anga den begi fu den sama di abi wan kiin ati.”—Odo 15:8.
Yesesi be begi en Dda, neen en Dda „aliki den begi fi en.”—Hebrewsama 5:7
Beibel e taki fu sama di be si fa Gadu aliki a begi fu den. Wan tekisi aini Beibel e soi taki Yesesi be e „begi anga en hii ati fu suku yeepi na a sama di be poi puu en a dede mofu.” Fu di a be e lesipeki Gadu, „meke Gadu aliki den begi fi en” (Hebrewsama 5:7). I sa leisi tu fa Gadu be aliki den begi fu taa sama aini Daniyeli 9:21 anga 2 Koloniki 7:1.
Saide son sama e si enke a fu soso den e begi? Efu u wani fende wini te wi e begi, da u mu begi a Gadu di den e kai Yehofa. * Neen na a Gadu di Beibel e taki u mu begi. Wi á mu begi taa gadu efuso den gaansama fu u. Gadu wani u akisi en sani di e „kai anga a wani fi en”. Dati wani taki sani di a lobi. Efu a so wi e begi, „a o aliki wi” (1 Yohanisi 5:14). Enke fa u si, efu u wani Gadu aliki den begi fu u, da u mu leli sabi en. U mu sabi fa a wani u tyai useefi tu.
A omen sama e biibi taki a ná kelikisama wawan e begi. Den kon si taki Gadu e aliki begi tuutuu. Wan man fu Keniya di den e kai Isaac, be taki: „Mi be begi Gadu fu a yeepi mi fu fusutan Beibel moo bun. A á teke langa seefi, neen wan sama kon a mi, neen a taigi mi taki a sa yeepi mi.” Hilda di e tan a Filipeinikondee be wani tapu anga a somoko di a be e somoko. Di a puubei a sani ya wantu leisi, a á fende wini. Neen a man fi en taigi en taki: „Saide i nái akisi Gadu fu a yeepi i?” Hilda be puubei a sani ya. A taki: „Mi foondoo fu si fa Gadu yeepi mi. Mi á be e kisi a fii fu somoko moo. Mi be poi fika a somoko.”
Yu abi booko-ede? I si enke Gadu o yeepi i efu den sani di yu e akisi en a sani di enseefi wani?
^ paragraaf 6 Enke fa Beibel e soi, a Yehofa na a nen fu Gadu.
