DI MI BE abi neigin yali, mi á be e goo moo. Nownow mi abi 43 yali, ma a wan meter namo mi lobi. Di mi mma anga mi dda be fusutan taki mi á be o goo moo, neen den gi mi deki-ati fu wooko taanga. A sani de be o yeepi mi fu mi á booko mi ede tumisi anga a satu di mi satu. Neen meke mi be poti wan tafaa na a doomofu fu seli ala sowtu sii. Mi be lobi kiin a peesi pe mi be e seli. Na a sani de meke omen sama bigin kon bai sani de.

Ma winsi fa mi be e wooko taanga, tokuso mi á kon moo langa. Mi satu ete. Den moo lawlaw sani seefi be e taanga gi mi fu du. Wan fu den sani di be e taanga gi mi, a fu pai te mi be go bai sani a wenkii, bika a peesi pe yu e pai be e hei tumisi gi mi. A gei enke den be meke en gi sama di langa tu toon moo mi. Ma sani be kengi di mi be abi 14 yali.

Di tu Kotoigi uman kon bai sii a mi osu wan dei, neen den akisi mi efu mi wani sutudeli Beibel. A á teke langa seefi, neen mi kon fusutan taki sabi Yehofa anga den sani di a wani du, pelensipali moo a satu di mi satu. Ná pikin yeepi a sani de yeepi mi. Mi lobi Psalm 73:28 moo ala tekisi. A fosi pisi fu a tekisi taki: „A kon di mi e kon moo koosube a Gadu bun gi mi.”

Di mi osufamii foloisi komoto a Ivoorkust go tan a Burkina Faso, neen mi hii libi kengi. Pe mi be e tan fosi den biiti sama be gwenti si mi na a tafaa e seli sani. Ma nawan sama be sabi mi aini a nyun biiti pe u be go tan. A omen sama be e daai luku mi. Neen meke a omen wiki mi á be e go a doose. Neen mi membee fa mi be e fii bun di mi be e leli sabi Yehofa. A sani de meke mi sikiifi wan biifi sende go na a beikantoo fu Yehofa Kotoigi. Neen den sende Nani, wan zendeling sisa di be e lei wan bolomu kon a mi.

Ala yuu den santi pasi fu u biiti be e gaata. Alen ten a be e moo ogii, bika a be e lai tokotoko. A omen leisi Nani kai anga a bolomu te a be e kon sutudeli anga mi. Ma winsi fa a be e kai, a be e kon namo. A akisi mi wan dei fu mi go a komakandaa anga en. Ma mi be o abi fu komoto a osu. Ala sama be o daai luku mi. Boiti dati, te mi be o sidon na a bolomu tapu, da a be o moo taanga gi a sisa fu lei a bolomu. Tokuso mi be piki en taki mi o go anga en, bika mi be membee san sikiifi aini du fu tu pisi fu a tekisi di mi lobi. Ape sikiifi taki: „Na a Moo Hei Masaa Yehofa e kibii mi.”

 Son leisi mi anga Nani be e kai aini tokotoko. Ma fu di u lobi den komakandaa, meke wi á be e booko wi ede. Den Kotoigi be de taa fasi. Den á be e luku mi enke den taa sama di mi be e miti a sitaati, ma den be e lafu anga mi. Baka neigin mun, neen mi dopu.

A lasiti pisi fu a tekisi di mi lobi e taki: „Neen meke mi o taigi sama ala den sani di i du.” Mi be sabi taki a be o taanga gi mi fu peleiki. Mi sabi ete di mi be go a peleikiwooko a fosi leisi. Gaansama anga pikinengee be e daai luku mi. Den be waka a mi baka, da den e lafu a fasi fa mi waka. Ná pikin fii mi fii a sani de. Ma mi be e holi a pakisei taki leti enke fa mi abi a paladeisi fanowdu, a so denseefi abi en fanowdu tu. Na a sani de yeepi mi fu holidoo.

Mi be fende wan sowtu baisigii di i sa lei anga ana. A be e yeepi mi fu du a peleikiwooko moo bun. Te u be mu subi wan mongo, da a sama di mi anga en be e wooko be e toto a baisigii. Ma te u be e dongo a mongo, da a be e dyombo kon na baisigi baka. Winsi fa a be e taanga gi mi fu peleiki, tokuso a be e switi gi mi bakaten. Fu di a be e switi gi mi meke mi toon wan kowownu pionili aini 1998.

Mi sutudeli Beibel anga omen sama. Fo fu den sama ya dopu. Boiti dati, wan fu den sisa fu mi seefi kon a waaleiti. Te mi e yee fa taawan e go a fesi, da a sani de e gi mi taanga-sikin. Wan dei neen wan sama fu Ivoorkust sende wan biifi gi mi di malaaliya be kisi mi. Mi be bigin sutudeli Beibel anga wan boi neen doomofu aini Burkina Faso. Bakaten mi meke wan baala go sutudeli anga en. A boi ya be e go a heisikoo. Baka wan pisi ten a boi be foloisi go tan a Ivoorkust. Mi be poolo di mi leisi aini a biifi taki a toon wan peleikiman.

I wani sabi fa mi e solugu miseefi? Wan olikanisâsi di e yeepi malengii sama, be leli mi nain koosi. Di wan fu den leliman be si fa mi e wooko taanga, neen a taki: „Wi o leli i meke sopu.” A so den leli mi meke sopu. Nownow mi e meke sopu di sama e koboloiki fu wasi koosi anga tyobo sani. A osu mi e meke den sopu ya. Den sama lobi a sopu fu mi. Den e taigi taawan fu koboloiki en tu. A miseefi e tyai a sopu gi den sama. Mi e tyai en anga wan bolomu di abi dii banti.

Mi fika a pioniliwooko aini 2004, bika mi baka be e hati mi. Ai hati mi taki mi nái pionili moo. Ma te anga now mi e go aini a peleikiwooko.

Den sabi mi enke wan sama di lobi lafu. Ma a sani di e meke mi piisii, na a leli di mi leli sabi Gadu moo bun. A sani ya e switi gi mi.​—Enke fa Sarah Maiga seefi gi a toli.