1. Fu saide biibi a wan pelensipali sani? (Luku a fowtow na a bigin.)

YU AKISI iseefi wan dei kaba efu Yehofa o kibii i na a ten fu a gaan banowtu? A apostel Pawlesi be taki efu u wani pasa a gaan banowtu, u biibi mu taanga. A taki: „Sondee biibi wan sama á poi meke Gadu piisii” (Hebrewsama 11:6). Kande a gei enke a á taanga fu biibi Gadu, ma Beibel e soi kiin taki „a ná ala sama e biibi” (2 Tesalonikasama 3:2). Den tu Beibeltekisi ya e soi u taki u mu meke moiti fu u biibi kon moo taanga.

2, 3. (a) Saide meke biibi de fanowdu? (b) San wi o luku aini a artikel ya?

² A apostel Peitilisi be taki „tesi” e meke a biibi fu u kon moo taanga. (Leisi 1 Peitilisi 1:7.) A gaan banowtu de koosube, neen ede meke u wani de „sama di e biibi, bika a dati o meke u tan a libi” (Hebrewsama 10:39). Neen meke u mu du ala san u man fu taanga u biibi. U wani tan a libi te Yesesi Kelestesi, a Kownu fu u o kon. U wani Yesesi yeepi u fu u biibi kon moo taanga, leti enke a man di be begi en taki: „Yeepi mi efu mi abi moo biibi fanowdu!” (Malikisi 9:24) Efuso kande u wani de enke den apostel di be taki: „Meke a biibi fu u kon moo taanga baa.”​—Lukasi 17:5.

³ Aini a artikel ya, wi o luku fa u sa meke u biibi kon moo  taanga. Wi o luku tu fa u sa soi taki wi e biibi Gadu, anga fa u du sabi taki Gadu o aliki u te u akisi en fu a meke u biibi kon moo taanga.

4. Sowtu toli o yeepi u fu meke moiti fu taanga a biibi fu u?

⁴ Biibi de taanga fanowdu, neen ede meke Beibel e taki fu omen sama di biibi be taanga. Yehofa meke sama sikiifi den sani ya „fu leli u wan sani” (Romesama 15:4). Den toli fu Abalaham, Sala, Isaki, Yakopu, Mosesi, Rakab, Gidiyon, Barak anga omen taa sama o yeepi u fu taanga a biibi fu u (Hebrewsama 11:32-35). Boiti den toli fu den sama di sikiifi aini Beibel, a omen baala anga sisa aini a ten ya biibi taanga tu. U sa meke moiti fu waka a den baka. * (Luku a maiki a ondoo.)

5. Fa Eliya soi taki a be e biibi Yehofa anga en hii ati? San u mu akisi useefi?

⁵ Wan fu den sama di Beibel taki biibi be taanga, a Eliya. Luku feifi sani di Eliya du fu soi taki ai biibi Yehofa anga en hii ati. (1) A be taigi Kownu Akab taki Yehofa o meke wan gaan dee ten kon. A be taki: „Leti enke fa a ná a misi taki Yehofa a Gadu fu Islayeli di mi e dini de a libi, a leti so a ná misi tu taki aini den yali di e kon nawan doopu alen efuso dow o kai” (1 Kownu 17:1). (2) A be e biibi taki Yehofa be o yeepi en anga wantu taawan fu fende san den abi fanowdu na a dee ten (1 Kownu 17:4, 5, 13, 14). (3) Di a boi fu a uman fu Sarfat be dede, Eliya be e biibi taki Yehofa be poi weki en baka (1 Kownu 17:21). (4) A be e biibi taki Yehofa be o meke faya komoto a tapu boon a ofaandi di a be tyai a Karmel mongo (1 Kownu 18:24, 37). (5) Winsi fa alen á be baaka, tokuso Eliya taigi Akab taki: „Subi go na a mongo ede, nyan, da i diingi wan sani, bika mi e yee wan gaan alen e kon” (1 Kownu 18:41). Baka di u luku den sani ya, a bun fu akisi useefi taki: ’Mi biibi taanga enke du fu Eliya?’

6. San wi abi fanowdu fu taanga u biibi?

⁶ Useefi á poi meke u biibi taanga, neen ede meke u mu akisi Yehofa a santa yeye fi en. Saide? Bika biibi a wan fu den fasi di a santa yeye e meke sama abi (Galasiyasama 5:22). Efu u begi Yehofa fu a gi wi en santa yeye enke fa Yesesi be taigi u, da wi e soi taki u koni. Yesesi be paamisi u taki Yehofa o „gi den sama di akisi en a santa yeye.”​—Lukasi 11:13.

7. San u mu du efu u wani u biibi taanga?

⁷ Te wi e biibi Gadu anga u hii ati, da u mu meke moiti fu u biibi á swaki. Biibi a leti enke wan udu faya. Te i leti wan udu faya, a ná a fa a faya fi en bigi, efi i nái poti udu gi en, a o dede. Ala den udu o toon koofaya, da den toon asisi. Ma efu wi e poti udu gi en, a ná o dede. A so a biibi fu u de tu. Efu wi e ondoosuku a Wowtu fu Gadu ala dei, wi o moo lobi Yehofa anga a Beibel. A sani ya o moo taanga u biibi.

8. San o yeepi i fi i biibi kon moo taanga?

⁸ San o yeepi i fi i biibi kon moo taanga? Yu á mu denki taki den sani di i leli fosi i be dopu sai kaba (Hebrewsama  6:1, 2). Te yu e ondoosuku den polofeititoli fu Beibel di kon tuu kaba, i biibi o kon moo taanga. I sa koboloiki a Beibel tu fu luku efi i biibi taanga tuutuu.​—Leisi Yakowbesi 1:25; 2:24, 26.

9, 10. Fa u biibi e kon taanga te (a) wi abi bun mati? (b) wi e go a komakandaa? (c) wi e peleiki?

⁹ A apostel Pawlesi be taki Kelesten e „gi makandaa taanga” (Romesama 1:12). San a sani ya wani taki? Te wi e du sani makandaa anga taa baala anga sisa, da wi e taanga useefi. Wi e si a sani ya te wi e paa anga baala anga sisa di biibi kon moo taanga fu di „tesi” be miti den (Yakowbesi 1:3). Takuu mati e meke u biibi swaki, ma bun mati o meke a kon moo taanga (1 Korentesama 15:33). Neen meke Beibel e gi u taanga-sikin fu go a den komakandaa ala yuu, bika wi e gi useefi „taanga-sikin” na ape. (Leisi Hebrewsama 10:24, 25.) Boiti dati, den sani di wi e leli a den komakandaa e taanga u biibi tu. Beibel taki „a te wan sama yee a bosikopu fosi ai biibi” (Romesama 10:17). Neen meke i mu akisi iseefi taki: ’Mi e go a komakandaa ala yuu?’

¹⁰ A biibi fu wi e kon moo taanga te wi e paati a bun nyunsu fu Beibel anga taawan. Leti enke den Kelesten aini a ten fu den apostel, wi e fitoow Yehofa. Winsi san e pasa, u nái feele fu taki san wi e biibi.​—Toli 4:17-20; 13:46

11. Saide meke a biibi fu Yowsuwa anga Kalepu be taanga? Fa u sa waka a den baka?

¹¹ A biibi fu wi e kon moo taanga te wi e si fa Yehofa yeepi u, anga te wi e si fa ai aliki den begi fu u. Yowsuwa anga Kalepu be si a sani ya. Di den be kibii go luku a Paamisi Kondee den be soi taki den biibi taanga. Te den be e si fa Yehofa be e yeepi den, den biibi be e kon moo taanga. Neen meke Yowsuwa be taigi den Islayelisama taki: „Nawan fu den moin sani di Yehofa Gadu paamisi u, be misi fu kon tuu.” Bakaten a taigi den taki: „Ma mi anga mi osufamii, wi dati o dini Yehofa”  (Yowsuwa 23:14; 24:14, 15). U biibi e kon moo taanga te wi e si fa Yehofa e yeepi u fu di wi e fitoow en.​—Psalm 34:8.

12. Fa u sa soi taki u biibi taanga?

¹² Fa u sa soi taki u biibi taanga? A disipel Yakowbesi be taki: „Mi o du sani soi i taki mi e biibi” (Yakowbesi 2:18). A den sani di wi e du e soi efu u biibi taanga. Meke u luku fa.

13. Fa wi e soi taki wi e biibi Yehofa te wi e peleiki?

¹³ A peleiki di wi e peleiki e soi taki wi e biibi Yehofa. Fu saide? Bika te wi e peleiki, da a sani de e soi taki wi e biibi taki a kaba de koosube. Ai soi tu taki wi e biibi taki „a ná o kon lati!” (Habakuk 2:3) Efu u wani sabi efu u biibi taanga, da u mu akisi useefi taki: ’Fa mi e si a peleikiwooko? Mi e meke moiti fu du moo gi Yehofa?’ (2 Korentesama 13:5). Meke u soi ’a publiki taki wi abi biibi di o meke u kon fii’. A peleikiwooko na a moo bun fasi fu du a sani ya.​—Leisi Romesama 10:10.

14, 15. (a) Fa u sa soi taki wi e biibi Yehofa? (b) Sowtu ondoofenitoli e soi taki sama e biibi Yehofa anga den hii ati?

¹⁴ Wan taa fasi fa wi e soi taki wi e fitoow Yehofa, a te wi e holidoo te wi abi polobelema. Son leisi wi e fii booko-saka. Son wan fu u siki. Taawan a pootiman. Ma winsi san e miti u, u mu fitoow Yehofa anga Yesesi taki den poi „yeepi u na a yuu di de fanowdu” (Hebrewsama 4:16). Wi e soi Yehofa taki wi e fitoow en te wi e akisi en fu a yeepi u. Yesesi be taki u sa akisi Yehofa fu a gi wi „a beele di wi abi fanowdu tide” (Lukasi 11:3). Den toli di sikiifi aini Beibel e soi taki Yehofa poi gi wi san wi abi fanowdu. Di wan gaan dee ten be de aini Islayeli, Yehofa be e solugu Eliya. Beibel e taki: „Ala mamanten anga bakadina den baaka foo be e tyai beele anga sitimofu gi en” (1 Kownu 17:3-6). Useefi e biibi taki Yehofa poi gi u den sani di wi abi fanowdu.

 ¹⁵ Wi e biibi taki wi o poi solugu wi osufamii te wi e wooko anga den leli fu Beibel. Wan sisa aini Asiya di den e kai Rebecca taki en osufamii be wooko anga san sikiifi aini Mateyesi 6:33 anga Odo 10:4. A taki en man be e si enke a wooko fi en be e tapu en fu dini Yehofa enke fa a wani. Neen meke a fika a wooko. Ma den be abi fo pikin fu solugu. Neen meke den bigin meke nyanyan sani e seli. Fu di den be e wooko taanga, meke ala yuu den be abi moni sai fu solugu a osufamii. A sisa ya taki: „Noiti Yehofa fika u. Ala yuu u be abi sani fu nyan.” I si fa Yehofa yeepi i wan leisi kaba? A sani de taanga i biibi?

16. San o pasa te wi e fitoow Gadu?

¹⁶ Solanga wi e du sani enke fa Yehofa wani, a á de fu u feele. A o yeepi u. Pawlesi be taki aseefi sani di Habakuk be taki. A taki: „Wan sama di e libi a wan leti fasi o tan a libi fu di ai biibi” (Galasiyasama 3:11; Habakuk 2:4). Neen meke na a Sama di poi yeepi u tuutuu u mu fitoow. Pawlesi e membee wi taki „fu di a Gadu e meke en kaakiti wooko aini u, meke a man du moo san wi e begi en efuso san wi e denki” (Efeisesama 3:20). Den futuboi fu Yehofa e du ala san den man fu du sani enke fa a wani. Ma den sabi tu taki a ná ala sani den poi du. Ai bigi gi u taki Gadu de anga u. Ai bigi gi u tu taki ai belesi den moiti di wi e meke.

17. (a) Fa Yesesi soi taki a du san den apostel akisi en? (b) Saide meke u sa biibi taki Yehofa o aliki u te wi akisi en fu a meke u biibi kon moo taanga?

¹⁷ Kande den sani di u luku aini a artikel ya, e meke i taki aseefi sani di den apostel be akisi Yesesi. Den be taki: „Meke a biibi fu u kon moo taanga baa” (Lukasi 17:5). Yesesi du san den akisi en, bika den be fende a santa yeye aini a yali 33. A so den be man fusutan den sani di Gadu be abi a pakisei moo bun. A sani ya be taanga den biibi. Den go peleiki a peesi pe a bun nyunsu á be doo ete (Kolosesama 1:23). I si enke Yehofa o aliki u efu u akisi en fu a meke u biibi kon moo taanga? A paamisi u taki a o gi u san wi akisi en „solanga ai kai anga a wani fi en.”​—1 Yohanisi 5:14.

18. San Yehofa o du gi den sama di e meke moiti fu den biibi kon moo taanga?

¹⁸ Yehofa o piisii anga u te wi e fitoow en anga u hii ati. A o aliki u te wi o akisi en fu a meke u biibi kon moo taanga. Te u biibi kon moo taanga, da wi o „fiti fu go aini a Kownukondee fu Gadu”.​—2 Tesalonikasama 1:3, 5.