1, 2. Saide Yesesi be lobi Maata? San e soi taki Maata be e meke fowtu tu?

SAN E kon a yu pakisei te i denki a sisa fu Lasalesi di den e kai Maata? Beibel taki Maata a be wan fu den bun mati fu Yesesi. Yesesi be lobi a fasi fa a be de. Ma Maata á na a wan enkii umansama di Yesesi be lobi efuso be e lesipeki. Bika a sisa fu Maata di den e kai Maliya, a be wan bun mati fu Yesesi tu. Boiti dati, Yesesi be lobi en mma Maliya (Yohanisi 11:5; 19:25-27). Ma saide Yesesi be lobi Maata?

² Yesesi be lobi Maata fu di a be abi switifasi, a be lobi gi sama sani, a be e wooko taanga. Ma a sani di meke Yesesi be moo lobi en, na a biibi fi en. En biibi be taanga. Maata be e biibi ala den sani di Yesesi be e leli. A be e biibi tu taki a Yesesi na a Mesiyas (Yohanisi 11:21-27). Ma Maata seefi be e meke fowtu, leti enke wi. Wan leisi di Yesesi be go luku den, Maata ati be boon neen  sisa Maliya. A begi Yesesi fu a sende Maliya kon yeepi en. A taigi en taki: „Masaa, yu á si taki mi sisa fika mi wawan e wooko noh? Sende en meke a kon yeepi mi.” (Leisi Lukasi 10:38-42.) Saide Maata taki a sani ya? San wi e leli fu a sani di Yesesi taigi en?

3, 4. Saide Yesesi be gafa Maliya? San Maata leli fu a sani ya? (Luku a fowtow na a bigin.)

³ A be bigi gi Yesesi taki Maata anga Maliya kai en kon a den osu. Neen meke a be wani koboloiki a ten de fu leli den wantu sani. Maliya go sidon wanten „e aliki den sani di a be e taki”. A be wani a Gaan leliman leli en omen sani. Maata seefi be sa go sidon aliki den sani di Yesesi be e taki. Yesesi be o gafa en efu a be fika en wooko fu go aliki san a be e taki.

⁴ Ma Maata be meke taa sani puu en pakisei. A be e feti e seeka nyanyan gi Yesesi. A be e du omen taa sani tu fu meke Yesesi fii bun. Di a si taki Maliya á be e yeepi en, neen en ati boon te a go kuutu gi Yesesi. Yesesi be sabi taki den sani di Maata be wani du be ipi tumisi, neen meke a taigi en taki: „Maata oo, yu e booko yu ede anga omen sani.” A taigi en taki winsi a wan kodo sani a boli, a o sai. Bakadati Yesesi gafa Maliya taki a sidon aliki den sani di a be e taki. A taki: „Maliya teke a bun se. Mi ná o puu en neen ana.” Kande Maliya feegete san a be e nyan a dei di Yesesi be kon luku den, ma noiti a feegete den sani di Yesesi leli en. A á feegete taki Yesesi be gafa en tu. Baka 60 yali di a sani ya pasa, a apostel Yohanisi be sikiifi taki: „Yesesi ben lobi Maata anga en sisa” (Yohanisi 11:5). A sani ya e soi taki Maata be go sidon pakisei den sani di Yesesi be taigi en, bika en hii libi langa a dini Yehofa anga en hii ati.

5. Saide a moo taanga aini a ten ya fu poti ala u pakisei na a dini di wi e dini Yehofa? San wi o luku aini a artikel ya?

⁵ Aini a ten ya den sani di sa puu u pakisei na a dini di wi e dini Yehofa, ipi moo den wan di be de aini a ten fu Beibel. A Ingiisitongo Wakititolen fu 15 september 1958, be wasikoi den baala anga sisa taki den á mu meke den nyun sani di sama e meke, puu den pakisei na a dini di den e dini Yehofa. Aini a ten de seefi a be gei enke na ala dei sama be e meke wan nyun sani. Den sani di be de a modo a ten de a be sani enke tv, laadiyow, felon, anga buku di be abi moin kololu. A Wakititolen ya be taki, fu di a kaba e kon moo koosube, „meke den sani di sa puu wi pakisei na a dini di wi e dini Yehofa o kon moo ipi”. Aini a ten ya, den sani ya kon moo ipi tuu. Ma san u mu du efu u wani poti ala u pakisei na a dini di wi e dini Yehofa enke Maliya?

6. Fa a foluku fu Yehofa wooko anga den nyun sani di sama meke?

⁶ A foluku fu Yehofa e wooko anga den nyun sani di sama e meke te den e paati a bun nyunsu. Fosi a Fosi Goontapu feti, den be e daai wan felon gi sama di den e kai „Photo Drama of Creation” (A fowtow dalaama di e soi fa Gadu meke sani). A ten fu a Fosi Goontapu feti den be e daai en gi sama tu. Den be e daai a felon ya fu paati a bun nyunsu gi miliyunmiliyun sama aini omen kondee. A kaba pisi fu a felon be e soi fa a goontapu o de te Yesesi o tii enke kownu. Bakaten, a foluku fu Yehofa be e wooko anga laadiyow fu paati a bun nyunsu gi miliyunmiliyun sama a hii goontapu. Aini a ten ya wi e wooko anga computer anga Internet fu paati a bun nyunsu gi sama na ala se, te doo den peesi di useefi á poi doo.

7. (a) Saide u mu luku bun anga a fasi fa wi e koboloiki den sani fu a goontapu ya? (b) San na a moo pelensipali sani?

 ⁷ Beibel e wasikoi wi fu wi á lasi ala u ten a den sani fu a goontapu ya. (Leisi 1 Korentesama 7:29-31.) Son wan fu den sani ya á fowtu, ma den sa teke ala a ten fu u. Kande wi e koboloiki u ten fu leisi buku, luku tv, go koi, bai nyun telefon efuso computer. A omen sama lobi sende bosikopu a telefon efuso Internet gi taawan. Taawan lobi leisi nyunsu efuso toli fu sport. Ma a omen fu den sama ya á poi tan fika den sani ya moo (Peleikiman 3:1, 6). Efu wi e koboloiki gaanse fu u ten fu du den sowtu sani ya, da u ná o abi ten fu du a moo pelensipali sani. Dati na a dini di wi e dini Yehofa.​—Leisi Efeisesama 5:15-17.

8. Saide wi á mu lobi den sani fu a goontapu ya?

⁸ Saatan e du ala san a poi fu meke u lobi den sani fu a goontapu ya. A sabi taki den sani ya sa puu wi pakisei na a dini di wi e dini Yehofa. A be kisi sama anga den sani ya kaba aini a ten fu den apostel, ma a ten ya, a moo ogii (2 Timotiyesi 4:10). Neen ede meke u mu e ondoosuku useefi naamo fu sabi efu u lobi den sani fu a goontapu ya. Efu u si taki u mu du sani taa fasi wi á mu daaidaai. Beibel taki wi á mu lobi den sani fu a goontapu ya. Ai gi u taanga-sikin fu du ala san u man fu wi á meke a lobi di u lobi Yehofa kon koo. Efu u du a sani ya, da a o moo makiliki gi u fu libi enke fa Yehofa wani. A o moo makiliki gi u tu fu kon koosube neen.​—1 Yohanisi 2:15-17.

9. San Yesesi be taigi den bakaman fi en? Fa a soi taki enseefi e du san a leli den?

⁹ Leti enke fa Yesesi be wasikoi Maata, a so a wasikoi den bakaman fi en tu fu den á meke nawan sani puu den pakisei na a dini di den e dini Yehofa. A be taigi den fu den poti ala den pakisei na a Kownukondee fu Gadu anga a diniwooko. (Leisi Mateyesi 6:22, 33.) A fasi fa Yesesi seefi be e libi e soi taki a be e poti ala en pakisei na a Kownukondee fu Gadu. A á be abi omen gudu. A á be abi en eigi osu efuso dyali.​—Lukasi 9:58; 19:33-35.

10. Fa Yesesi be e du en diniwooko?

¹⁰ Yesesi á be e meke sani puu en pakisei na a peleikiwooko. Wan leisi neen den sama fu a foto Kaperna-um be wani a tan moo langa aini a foto fu den. San Yesesi du? A taigi den taki: „Mi mu paati a bun nyunsu fu a Kownukondee fu Gadu a taa foto tu, bika a fu dati ede Gadu be sende mi kon a goontapu” (Lukasi 4:42-44). Yesesi be e waka gaan langa pasi fu paati a bun nyunsu gi omen sama. Winsi a á be abi sondu, tokuso a be e weli fu  di a be e wooko taanga. Neen meke a be e teke boo son leisi.​—Lukasi 8:23; Yohanisi 4:6.

11. San Yesesi du di wan man akisi en fu a yeepi en anga a polobelema di a be abi anga en baala? San Yesesi leli den bakaman fi en?

¹¹ Wan leisi di Yesesi be e leli den bakaman fi en wan pelensipali sani, neen wan man koti en mofu. A man taigi en taki: „Leliman, taigi mi baala meke a gi mi fu mi se fu a gudu di u dda dede fika gi u.” Ma Yesesi á be wani mumui aini a toli fu a man ya anga en baala. A á meke a man ya puu en pakisei na a sani di a be wani leli den bakaman fi en. Ma a koboloiki a okasi de fu wasikoi den taki efu den e feti fu abi omen gudu, den ná o poti pakisei na a diniwooko moo.​—Lukasi 12:13-15.

12, 13. (a) San Yesesi du di foondoo den Giikisama? (b) San Yesesi taki di Filipesi taigi en taki den Giikisama be wani den anga en miti?

¹² Den lasiti dei di Yesesi be de a goontapu ya, á be makiliki gi en (Mateyesi 26:38; Yohanisi 12:27). A be sabi taki den be o pina en te enke a dede. A be sabi tu taki a be abi wooko di a be mu du ete fosi a dede. Pakisei san be pasa sonde 9 Nisan fu a yali 33. A dei de a go a Yelusalem anga wan buliki. Den sama be e bali wadaa gi en bika den be e si en enke den Kownu (Lukasi 19:38). A taa dei fi en, neen Yesesi yaki den giiliman di be e seli sani puu aini a tempel. Den man ya be e fufuu a foluku, bika den be e seli den sani fu den dii tumisi.​—Lukasi 19:45, 46.

¹³ Wantu Giikisama di be kon a Yelusalem fu fii a Paskafesa foondoo di den si san Yesesi du. Neen meke den akisi Filipesi efu den anga Yesesi be sa miti. Ma Yesesi á be e suku sama fu holibaka gi en efuso fu kibii en gi den feyanti fi en. A be sabi san be moo pelensipali. A be sabi taki Gadu be sende en kon a goontapu fu dede gi libisama fu den be sa fii fu sondu anga dede. Neen meke a membee den disipel fi en taki a á fika langa moo fu a dede. A taigi den taki den mu de kabakaba fu dede tu. A be taki: „A sama di e feti fu kibii en libi o lasi en. Ma a sama di ná abi toobi fu lasi en libi a goontapu ya, o fende teego libi.” A paamisi den tu taki: „Efu wan sama wani de mi futuboi, da mi Dda o gi en gaandi.” Filipesi be abi a okasi fu gi den Giikisama a bosikopu ya.​—Yohanisi 12:20-26.

14. San Yesesi be e du winsi fa a be e poti ala en pakisei na a peleikiwooko?

¹⁴ Di Yesesi be de a goontapu, na a peleikiwooko a be a moo pelensipali sani di a be e du. Ma winsi fa a be e poti ala en pakisei na a peleikiwooko, a be e du taa sani tu. A be go a wan toow fesa wan leisi, neen a meke wataa toon win (Yohanisi 2:2, 6-10). Boiti dati, a be e go nyan a wantu mati fi en efuso sama di be wani yee a bun nyunsu (Lukasi 5:29; Yohanisi 12:2). Ma san moo pelensipali, a be e teke ten tu fu begi, fu sidon pakisei anga fu teke boo.​—Mateyesi 14:23; Malikisi 1:35; 6:31, 32.

15. San Pawlesi be taigi den Kelesten? Fa enseefi be du a sani ya?

¹⁵ Pawlesi taki Kelesten de enke den sama di e sitee lon. A pasi di den mu lon langa. Ma a be taki efu den wani lon doo pe den e go, den mu towe ala den lai di sa tapu den fu den doo. (Leisi Hebrewsama 12:1) Pawlesi seefi soi u fa u mu du a sani ya. A be sa toon wan gudu Dyu keliki fesiman di be abi balinen. Ma a fika ala den sani de fu di a be wani poti ala en pakisei „a den moo pelensipali sani”. A be e wooko taanga aini a diniwooko. A peleiki a omen kondee enke Siriya, Pikin Asiya, Masedoniya, anga Yudeya. Pawlesi be e poti ala en  pakisei na a teego libi di a be o fende aini hemel. A be taki: „Mi feegete ala den sani di mi fika. Mi e meke taanga moiti fu lon go miti den sani di de a mi fesi. Neen meke mi e lon fu mi sa fende a pai fu Gadu” (Filipisama 1:10; 3:8, 13, 14). Pawlesi á be toow, neen meke a á be e ’meke sani puu en pakisei na a wooko fu Masaa’​—1 Korentesama 7:32-35.

16, 17. Fa u sa waka a Pawlesi baka, winsi u toow efuso wi á toow? Fa Mark anga Claire du a sani ya?

¹⁶ Leti enke Pawlesi a so wantu Kotoigi aini a ten ya á toow fu di den wani du moo aini a diniwooko (Mateyesi 19:11, 12). Gaanse fu den sama di toow abi moo faantiwowtu fu di den mu solugu den osufamii. Ma winsi u toow efuso wi á toow, tokuso ala u mu „towe ala den lai fu wi di á de fanowdu”, bika den sa tapu u fu dini Yehofa. Kande u mu fika wantu sani di u lobi, fu u sa abi moo ten fu du den sani di Yehofa wani u du.

¹⁷ Mark anga Claire kiya aini a kondee di den e kai Wales. Di den kaba sikoo, a so den bigin pionili. Baka di den toow seefi den go doo anga a pioniliwooko. Ma den be wani du moo gi Yehofa. Mark taki: „Mi anga mi uman seli a osu fu u di be abi dii kambaa. U fika u wooko tu fu u be sa go yeepi anga a bow wooko di a olikanisâsi e du a hii goontapu.” Aini den 20 yali di pasa, den go a omen Afiikan kondee fu yeepi meke Kownukondee zaal. Wan leisi a 15 Ameekan dala namo den be abi, ma tokuso Yehofa be e solugu den. Claire taki: „Ná pikin piisii wi e piisii taki u man wooko gi Yehofa ala dei. U meke omen mati. Boiti dati, wi abi ala san wi abi fanowdu. A piisii di wi e piisii fu du a fuuten-diniwooko ipi omen toon moo den sani di u fika.” A omen sama di e du a fuuten-diniwooko e ondoofeni a sani ya tu. *​—Luku a maiki a ondoo.

18. San u sa akisi useefi?

¹⁸ San i sa du efi i si enke i nái du a diniwooko anga i hii ati moo fu di taa sani e puu i pakisei? Kande i mu meke moiti fu leisi efuso fu ondoosuku a Beibel moo bun. A taa artikel o soi u fa u sa du a sani ya.