Te tu sama e taki anga denseefi den e toon moo bun mati. Leti enke fa tu mati e taki anga denseefi, a so Gadu wani u taki anga en tu. A sani de o meke wi anga en toon mati. Gadu taki: „U mu kai mi. U mu kon a mi tu. U mu begi mi, da mi o aliki u” (Yelemiya 29:12). Efu yu e taki anga Gadu, yu o „kon koosube [neen], da enseefi o kon koosube a yu” (Yakowbesi 4:8). Beibel taki: „Yehofa de koosube a den sama di e kai en” (Psalm 145:18). O moo wi e begi, o moo wi anga en e toon bun mati.

Yesesi be taki: „On du fu u o gi en boi wan siton efu a akisi en wan beele? Efu a akisi i wan fisi, i ná o gi en wan sineki, na so noh? Da efu u sabi fa fu gi u pikin bun sani anga ala fa wi abi takuu manii, da yu á denki taki u Dda di de a hemel o gi den sama di e akisi en bun sani tu noh?” (Mateyesi 7:9-11). Gadu wani i begi en, bika ai „solugu” i (1 Peitilisi 5:7). A wani i taki anga en te yu abi polobelema. Beibel taki: „Yu á mu booko yu ede anga nawan sani, ma taigi Gadu ala sani te yu e begi. Gi en daa, begi en fayafaya.”​—Filipisama 4:6.

Ondoosukuman kon si taki miliyunmiliyun sama abi a fii fu begi Gadu. Den kon si taki wantu sama seefi di nái biibi taki Gadu de, abi a fii de. * A sani ya e soi taki libisama meke anga a fii fu dini Gadu. Yesesi be taki: „Wan sama o de koloku te a sabi taki a abi Gadu fanowdu” (Mateyesi 5:3). Wan fu den fasi fa libisama sa fende san den abi fanowdu, a te den gwenti taki anga Gadu.

Sowtu wini wi o fende efu u begi Gadu enke fa a taigi u?