1, 2. San son sama e denki fu Gadu?

A OMEN sama e si enke Gadu nái booko en ede anga den sani di den e du. Den e si enke a nái booko en ede anga den sani di e miti den tu. Di wan gaan daaiwinta poli wan gaan pisi fu Filipeinikondee aini november 2013, neen wan edeman fu wan fu den gaan foto taki: „Gadu be de a wan taa peesi di a sani ya be e pasa.”

² Taawan e pakisei taki Gadu nái si den sani di den e du (Yesaya 26:10, 11; 3 Yohanisi 11). Wantu sama di be e libi aini a ten fu den apostel be e denki so tu. Pawlesi be taki: „Den á be wani sabi Gadu bunbun.” Den sama ya be giili, den be ogii, den á be e tyai denseefi bun tu.​—Romesama 1:28, 29.

3. San u mu akisi useefi?

³ Fa a de anga wi? U sabi taki Yehofa e si ala san wi e du. Ma wi e biibi tuutuu taki ai booko en ede anga u? Wi e si den sani di ai du gi u? Gadu e koboloiki en kaakiti fu yeepi den sama di e dini en. Ai koboloiki en fu wini den feyanti fi en  tu. (Leisi Deitolonomi 26:8.) Yesesi be taki son sama be o „si Gadu” (Mateyesi 5:8). Yu a wan fu den sama de? Ma fa u sa „si Gadu”? Wi o taki fu wantu sama aini Beibel di be e si den sani di Gadu be e du, anga taawan di á be e si den sani di Gadu be e du. Bakadati wi o luku fa biibi sa yeepi u fu si den sani di Gadu e du gi u.

4. Saide den feyanti fu den Islayelisama á be wani biibi taki a Yehofa be e feti gi a foluku fi en?

⁴ Fosi, a omen sama be abi a okasi fu si efuso yee fa Gadu be e yeepi den Islayelisama. Yehofa be du omen gaan wonduu fu fii a foluku fi en puu a Egepte. A be du omen wonduu tu fu wini den kownu aini a Paamisi Kondee (Yowsuwa 9:3, 9, 10). Winsi fa den taa kownu be yee efuso si fa Yehofa be e fii a foluku fi en, tokuso „ala den bonduu kon a wan fu go feti anga Yowsuwa anga den Islayelisama” (Yowsuwa 9:1, 2). Di den kownu be e feti anga den Islayelisama, den be abi a okasi fu si a kaakiti fu Gadu. Yehofa be meke „a san tan a pe a be de. A mun á diipi tu, te enke den Islayelisama wini ala den feyanti fu den” (Yowsuwa 10:13). Ma Yehofa be fika den feyanti fu den „taanga yesi”. Neen meke den go feti anga den Islayelisama (Yowsuwa 11:20). Den feyanti be lasi a feti fu di den á be wani biibi taki Yehofa be e feti gi a foluku fi en.

5. San Kownu Akab á be wani biibi?

⁵ A omen leisi a ogii Kownu Akab be abi a okasi fu si den sani di Yehofa e du. Eliya be taigi en taki: „Nawan doopu alen efuso dow o kai, boiti efu mi mofu taki so!” (1 Kownu 17:1). A Yehofa be meke a dee ten kon, ma toku Akab á be wani biibi a sani de. Wan taa leisi Eliya begi Yehofa, neen Yehofa piki a begi fi en fu di a meke faya komoto a tapu. Akab be si a sani de tu. Bakadati Eliya taigi Akab taki Yehofa o meke a alen kai baka (1 Kownu 18:22-45). Akab si ala den sani ya. Ma tokuso a á be wani biibi taki a Yehofa be e du den gaan wonduu ya. San a sani ya e leli u? U mu meke moiti fu si den sani di Yehofa e du gi u.

6, 7. San den Gibeyonsama anga Rakab be e biibi?

⁶ Den Gibeyonsama á be de enke den taa foluku di be e tan aini a Paamisi Kondee. Den be yee den sani di Gadu be du. Den á go feti anga den Islayelisama, ma den go meke mati anga den. Fu saide? Den taki a fu di den yee ala den sani di Yehofa du (Yowsuwa 9:3, 9, 10). Den be koni, bika den si taki a Yehofa be e feti gi den Islayelisama.

⁷ Rakab seefi be sabi taki a Gadu be e yeepi den Islayelisama. A be yee fa Yehofa be fii en foluku puu a Egepte. Di tu man fu Islayeli be kibii go luku a kondee, neen den go neen osu. Rakab taigi den man ya taki: „Mi sabi taki Yehofa o gi wi a kondee ya.” Rakab be e biibi taki Yehofa be sa kibii en anga en famii. A soi taki a be e biibi Yehofa, winsi fa a be sabi taki a be sa dede.​—Yowsuwa 2:9-13; 4:23, 24.

8. Fa wantu Islayelisama be soi taki den e biibi taki a Yehofa du a wonduu di den be si?

⁸ Akab á be e si enke a Yehofa be meke faya komoto a tapu di Eliya be begi. Ma  son wan fu den Islayelisama be e biibi taki a Yehofa be du a sani de. Den be bali taki: „A Yehofa na a tuu Gadu!” (1 Kownu 18:39) Den be biibi taki na a kaakiti fu Yehofa den si.

9. San o yeepi u fu si den sani di Yehofa e du?

⁹ U taki fu wantu sama di be si den sani di Yehofa be du, anga taawan di á be si den sani de. Den toli ya e yeepi u fu fusutan san a wani taki fu si den sani di Gadu e du. Te wi e leli sabi Yehofa moo bun, da wi o si den sani di ai du gi u (Efeisesama 1:18). Ala u wani de enke den sama di be e si taki a Yehofa be e yeepi a foluku fi en. Ma fa u du sabi taki Yehofa e yeepi sama aini a ten ya?

10. San e soi taki Yehofa e yeepi sama aini a ten ya? (Luku a fowtow na a bigin.)

¹⁰ A omen sani e soi taki Yehofa e yeepi sama aini a ten ya. Son leisi wi e yee fa son sama si fa Gadu yeepi den di den begi en (Psalm 53:2). Allan be e peleiki gi wan uman a wan pikin tabiki a Filipeinikondee, neen a uman bigin kee. Allan taki: „A mamanten de a uman ya be begi Yehofa fu den Kotoigi kon neen.” Di a be yonkuu, den Kotoigi be e sutudeli anga en. Ma di a toow, neen a foloisi go tan na a tabiki. Fanafu a ten de a á sutudeli moo. A uman ya á be poi biibi taki Gadu piki a begi fi en so gaw. A á doo wan yali, neen a dopu.

11, 12. (a) Fa Yehofa e yeepi den sama di e dini en? (b) Fa Yehofa be yeepi wan sisa?

¹¹ A omen sama di e dini Yehofa now, si fa Yehofa yeepi den fu tapu anga den takuu gwenti di den be abi fosi den kon a waaleiti. Son wan fu den sama ya be e somoko efuso koboloiki takuu tabaka. Taawan be e luku fa man anga uman e  didon anga denseefi aini buku efuso felon. Wantu fu den taki den be puubei fu tapu anga den takuu gwenti ya di den be de aini a goontapu, ma den á be poi. Ma di den akisi Yehofa fu a yeepi den, neen a gi den „a kaakiti di bigi pasa maiki”. Na a sani de yeepi den fu tapu anga den takuu gwenti di den be abi.​—2 Korentesama 4:7; Psalm 37:23, 24.

¹² Yehofa e yeepi den sama di e dini en te den abi polobelema tu. A so a be yeepi wan sisa den e kai Amy. Den be sende en go a wan tabiki fu yeepi meke wan Kownukondee zaal anga wan zendeling osu. Den sama fu a tabiki de be gwenti du sani taa fasi. Boiti dati, wataa anga faya á be e de son leisi. Den pasi be e sungu. Son leisi a be e angii fi en famii. Aini wan pikin kambaa a be tan a wan hotel tu. Wan dei neen a bali wan taa sisa di be e wooko anga en. Bakaten a be hati en taki a taki goofu anga a sisa. Di a go neen kambaa baka, neen a begi Yehofa fu a yeepi en. Di faya kon, neen a leisi wan artikel aini wan Wakititolen. A artikel be e taki fu aseefi polobelema di a be abi. Amy taki: „A Yehofa be taki anga mi a neti de. A artikel be gi mi taanga-sikin fu go doo anga a wooko fu mi.”​—Psalm 44:25, 26; Yesaya 41:10, 13.

13. San e soi taki Yehofa e yeepi a foluku fi en te den go a kuutu fu a bun nyunsu ede?

¹³ Yehofa e yeepi a foluku fi en tu te den mu go a kuutu fu a bun nyunsu ede (Filipisama 1:7). Te gaanlanti fu son kondee be e puubei fu tapu a peleikiwooko, da u be e go a kuutu. A 268 toli u wini a wantu gaan kuutu a hii goontapu kaba. Fanafu a yali 2000, u wini 24 fu den toli ya a den kuutubakaa di e sidon a den moo gaan kuutu fu Europa di e feti gi a leti fu sama. A sani ya e soi kiin taki sama á de di poi tapu Yehofa fu du san a wani!​—Yesaya 54:17; leisi Yesaya 59:1.

14. San a den taa sani di soi taki Yehofa de anga a foluku fi en?

¹⁴ A peleikiwooko di e du a hii goontapu a wan taa sani di e soi taki Yehofa e yeepi a foluku fi en aini a ten ya (Mateyesi 24:14; Toli 1:8). Winsi fa a omen sowtu nasi sama de aini a olikanisâsi fu Yehofa, tokuso den poi libi na a wan fu di Yehofa e yeepi den. A sani ya a wan wonduu. Sama di nái dini Yehofa seefi e taki: „Gadu de anga u tuu” (1 Korentesama 14:25). A omen sani e soi taki Yehofa  e yeepi a foluku fi en. (Leisi Yesaya 66:14.) Fa a de anga yu? Yu e si den sani di Yehofa e du gi i?

15. Fu saide son leisi u nái si den sani di Yehofa e du gi u?

¹⁵ Kande son leisi u nái si san Gadu e du gi u. Fu saide? Te wi abi polobelema, da kande wi e feegete taki a Yehofa na a sama di lobi yeepi u. A sani ya be pasa anga Eliya. A be abi deki-ati. Ma di a Kownu-uman di den e kai Iseibel be wani kii en, a be feele. A ten de a feegete taki a Yehofa be e yeepi en. Beibel e soi taki Eliya be begi Yehofa fu a meke a dede (1 Kownu 19:1-4). Pe a be o fende yeepi anga taanga-sikin? A be mu suku yeepi a Yehofa!​—1 Kownu 19:14-18.

16. San o yeepi u fu si den sani di Yehofa e du gi u te wi abi polobelema?

¹⁶ Den booko-ede fu Yopu meke a á be e si sani enke fa Yehofa e si sani moo (Yopu 42:3-6). Son leisi den booko-ede fu u sa meke u nái si den sani di Yehofa e du gi u moo. San o yeepi u fu si san Gadu du gi u? U mu sidon denki den sani di Beibel e taki, da wi o fusutan fu saide wi abi booko-ede. Wi o sabi tu san o yeepi u anga den booko-ede de. A sani ya o yeepi u fu si Yehofa enke u tuutuu mati. Wiseefi o man taki: „Mi be yee fi i, ma now miseefi si i.”

17, 18. (a) San o yeepi i fu si den sani di Yehofa e du gi i? (b) Sowtu ondoofenitoli e soi taki Yehofa e yeepi wi aini a ten ya?

¹⁷ San o yeepi i fu si den sani di Yehofa e du gi i? Kande i si fa Yehofa yeepi i fu fende a tuu biibi. Kande i yee wan lezing a komakandaa wan leisi, neen i taki: „Na a sani ya mi be abi fanowdu!” Kande i si fa Yehofa piki wan begi fi i. Efuso kande i be wani du moo gi Yehofa, neen i si fa a yeepi i fu doo a maiki de. Kande i fika i wooko tu fu di a be e tapu i fu dini Yehofa enke fa a wani. Di i du so, neen i si taki Yehofa du san a paamisi. A taki: „ Noiti mi o fika i wawan” (Hebrewsama 13:5). Den sani ya a wantu fasi fa u sa si fa Yehofa e yeepi u. Efu wi anga Yehofa a bun mati, a ná o taanga gi u fu si den sani di ai du gi u.

¹⁸ Wan sisa fu Keniya di den e kai Sarah taki: „Mi be e si enke wan fu den sutudi fu mi á be kaba lobi den sani di a be e leli. Neen mi begi Yehofa. Mi akisi Yehofa efu mi á mu go leli en moo. Fa i si mi taki ’Amen’, neen mi telefon bali. Na a sutudi be bel fu akisi efu a sa kon a komakandaa anga mi. Ná pikin foondoo mi foondoo!” Te wi e teke ten pakisei den sani di Gadu e du gi u, da wi o si fa ai yeepi u. Wan sisa aini Asiya di den e kai Rhonna taki:„Ai teke ten fu u fusutan fa Yehofa e yeepi u. Ma te i fusutan kaba, yu o foondoo fu si fa ai booko en ede anga u!”

19. San u mu du fu si Gadu?

¹⁹ Yesesi be taki den sama di o „si Gadu” mu abi „wan kiin ati” (Mateyesi 5:8). San a sani ya wani taki? Wi á mu e pakisei sani di á fiti. Wi á mu du sani di á fiti tu. (Leisi 2 Korentesama 4:2.) Aini a artikel ya, u leli taki efu u wani si den sani di Gadu e du gi u, da wi anga en mu de bun mati. Aini a taa artikel, wi o si taki u biibi mu taanga fu man si den sani di Yehofa e du gi u aini a ten ya.