1, 2. San libisama poi du di meti á poi du?

A FASI fa a masonson fu libisama meke a wan foondoo sani. Bika ai yeepi u fu leli wan nyun tongo. U man taki, sikiifi, fusutan efuso leisi a tongo de tu. Boiti dati, a masonson e yeepi u fu begi efuso singi gafa Yehofa. Neen ede meke libisama anga meti a ná aseefi. Te anga now ondoosukuman á kaba fusutan ete fa a fusutan fu u man du ala den sani ya.

² A taki di u poi taki a wan kado di Yehofa gi u (Psalm 139:14; Openbaring 4:11). A gi u wan taa kado tu di a á gi den meti. A meke libisama „enke fa enseefi de”. A nái dwengi u fu libi enke fa wani, ma ai gi wi a okasi fu useefi koboloiki a tongo di wi e taki fu dini en efuso fu gafa en.​—Genesesi 1:27.

3. San Yehofa gi u fu meke u koni?

³ Yehofa gi wi a Beibel fu di a wani u sabi fa u mu dini en, anga fa u mu gafa en. Den puu a hii Beibel efuso son pisi fi en poti aini moo enke 2800 tongo. Te wi e sidon pakisei den sani di u leisi aini a Beibel, da a sani de e yeepi u fu denki enke fa Yehofa e denki (Psalm 40:5; 92:5; 139:17). Te wi e  denki enke fa Yehofa e denki, da wi o koni. Wi o fende teego libi tu.​—Leisi 2 Timotiyesi 3:14-17.

4. San a wani taki fu teke ten pakisei wan sani? San wi o luku aini a artikel ya?

⁴ Te wan sama e teke ten pakisei wan sani, da dati wani taki a sama e poti ala en pakisei na a sani de. A nái meke taa sani puu en pakisei (Psalm 77:12; Odo 24:1, 2). A moo bun sani di u sa sidon pakisei, a den sani di wi e leli fu Yehofa anga Yesesi (Yohanisi 17:3). Wi o taki fu wantu akisi aini a artikel ya. Den akisi ya na: Fa u mu leisi efu u wani sidon pakisei den sani di wi e leisi? San a den sani di u mu sidon pakisei? San o yeepi u fu e sidon pakisei den sani di wi e leli? San u mu du efu u wani a sani de gi u piisii?

5, 6. San u mu du efu u wani fusutan efuso holi den sani di wi e leisi a ede?

⁵ I sabi taki u poi du son sani sondee fu poti pakisei na a sani di wi e du? U poi hali boo, waka efuso lei baisigii sondee fu u pakisei de na a sani de. Aseefi sani ya sa pasa tu te wi e leisi. Son leisi wi e leisi wan sani, ma u pakisei de a wan hii taa se. Ma san o yeepi u fu a sani de á pasa anga u? A de taanga fanowdu fu poti ala u pakisei na a sani di wi e leisi. U mu meke moiti tu fu sabi san den sani di u leisi wani taki. Te i kaba leisi wan paragraaf efuso wan pisi fu wan artikel, da i mu teke ten pakisei den sani di i leisi. Bakadati i mu luku efi i fusutan ala sani bun.

⁶ Ondoosukuman kon si taki efu wan sama e yee san ai leisi, da a moo makiliki gi en fu holi den sani di a leisi a ede. Yehofa sabi a sani ya, neen meke a be taigi Yowsuwa fu a leisi den wowtu fu a Weiti „saafi”. (Leisi Yowsuwa 1:8.) Te wi e leisi a Beibel u mu yee san wi e leisi. Dati o yeepi u fu poti u pakisei a den sani di wi e leisi. A o yeepi u fu holi den sani di wi e leisi a ede tu.

7. On ten moo bun fu sidon pakisei den sani di wi e ondoosuku aini Beibel? (Luku a fowtow na a bigin.)

⁷ A bunbun moiti u mu meke efu u wani poti ala u pakisei a den sani di sikiifi aini Beibel. Neen meke a ná te u weli u mu sidon pakisei den sani di u leisi. Wi á mu e sidon pakisei a peesi pe sama e takitaki efuso a peesi pe sani sa puu u pakisei. A psalm sikiifiman David be e teke ten pakisei a Wowtu fu Gadu a neti te a be didon (Psalm 63:6). Te Yesesi be wani sidon denki, a be e go a peesi pe sani á be e puu en pakisei. A den sowtu peesi ya a be e go begi tu.​—Lukasi 6:12.

8. (a) San u sa sidon pakisei? (b) Fa Yehofa e fii te wi e taigi taawan den sani di a leli u?

⁸ Boiti den sani di sikiifi aini Beibel, u sa sidon pakisei den sani di Yehofa meke tu. Te i si wan moin sani di Yehofa meke, teke i ten da i akisi iseefi taki: ’San a sani ya e leli mi fu Yehofa?’ Te yu e akisi iseefi den sani ya, da den o gi i taanga-sikin fu gi Yehofa daa te yu e begi. Da te i de anga taawan, a den toli de yu o wani gi den (Psalm 104:24; Toli 14:17). Yehofa e si te wi e sidon pakisei den sani di ai leli u. Ai si te wi e begi tu anga te wi e taigi taawan den sani di u leli. Den sani ya e meke a piisii. Beibel e taigi u taki: „Yehofa meke sama sikiifi wan buku fu membee den sama di e lesipeki en, anga den sama  di e sidon denki a nen fi en.”​—Maleyaki 3:16.

9. (a) San Pawlesi be taigi Timoteyesi? (b) San u mu du te wi e seeka fu go sutudeli anga wan sama?

⁹ A apostel Pawlesi be gi Timotiyesi taanga-sikin fu sidon pakisei a fasi fa ai taki, a fasi fa ai tyai enseefi anga a fasi fa ai leli sama. (Leisi 1 Timotiyesi 4:12-16.) Iseefi sa sidon pakisei den sani ya tu. Te wi e seeka fu go a den sutudi fu u, da u mu pakisei luku san u sa akisi ibiiwan fu den fu si fa den e denki fu den sani di den e leli. U sa luku sowtu ageisitoli wi o koboloiki fu yeepi den tu. Efu yu e seeka iseefi so fosi i go sutudeli anga wan sama, i biibi o taanga. Yu o man leli den moo bun. Yu o leli den anga i hii ati. Yu o fende wini tu te yu e teke ten fu pakisei san yu o taki anga den sama aini a peleikiwooko. (Leisi Esra 7:10.) Kande i sa leisi wan kapitel fu Toli fu den apostel. A sani ya o yeepi i fu toon wan moo bun peleikiman di e peleiki anga en hii ati. I sa teke ten tu fu sidon pakisei den tekisi di yu o koboloiki a dei de, anga den buku di i wani paati (2 Timotiyesi 1:6). Teke ten pakisei den sama di e tan na a pisi pe yu e peleiki. Pakisei san i sa taki fu den sa aliki i. Efu yu e seeka iseefi so, yu o sabi fa i mu koboloiki a Beibel te yu e peleiki gi sama.​—1 Korentesama 2:4.

10. San a den taa sani di u sa sidon pakisei?

¹⁰ San a den taa sani di u sa sidon pakisei? Te wan baala e holi wan lezing a komakandaa, kelen-komakandaa efuso konkelesi, da i sa sikiifi den sani di i leli. Teke ten leisi den baka. Bakadati akisi iseefi a sani ya: ’San den sani ya e leli mi  fu Yehofa anga a olikanisâsi fi en? I sa teke ten tu fu pakisei den sani di i leisi aini den Wakititolen anga Ontwaakt!, efuso den nyun sani di u fende a den konkelesi. Te i leisi wan ondoofenitoli aini a jaarboek, da teke ten denki fi en fu a doo yu ati. Te yu e leisi den buku fu u, da i sa maiki den moo pelensipali sani, efuso i sa sikiifi son sani a den paragraaf sikin. A sani ya o yeepi i te yu e go a wan sama di i be peleiki gi kaba. A o yeepi i tu te yu e go luku baala anga sisa fu gi den taanga-sikin, efuso te yu o holi wan lezing. Te yu e teke ten pakisei san i leisi, da yu e meke den sani di i leisi doo yu ati. A dati na a moo pelensipali sani. Yu o gi Yehofa daa tu fu den moin sani di ai leli i.

11. San na a moo pelensipali sani di u mu e sidon pakisei? Fu saide? (Luku san sikiifi na a maiki tu.)

¹¹ U mu e sidon denki den sani di sikiifi aini Beibel, bika a dati na a moo pelensipali buku di Gadu gi u. Ma efu lanti puu a Beibel a wi ana wan dei noh? San wi o du? * (Luku a maiki a ondoo.) We, sama á poi tapu i fu sidon denki den sani di i sabi kaba, sani enke den tekisi anga den Kownukondee singi di i lobi (Toli 16:25). A yeye fu Gadu o yeepi i fu membee den sani di i leli. A so yu o man tan dini Gadu anga i hii ati.​—Yohanisi 14:26.

12. San a wan fasi fa i sa leisi Beibel ala dei?

¹² San a wan fasi fa i sa leisi Beibel ala dei? Kande wantu dei aini a wiki i sa leisi a pisi di u mu leisi gi a Teyokalasiya Diniwooko-sikoo. Den taa dei i sa leisi Mateyesi, Malikisi, Lukasi anga Yohanisi. Teke ten tu fu pakisei den sani di Yesesi be taki anga den sani di a be du te yu e leisi den pisi de (Romesama 10:17; Hebrewsama 12:2; 1 Peitilisi 2:21). Wan buku de tu di e taki fu a libi fu Yesesi. A buku ya o yeepi i fi i moo fende wini te yu e leisi Mateyesi, Malikisi, Lukasi anga Yohanisi.​—Yohanisi 14:6.

13, 14. Saide a de taanga fanowdu fu sidon pakisei den toli fu Yehofa anga Yesesi di u sabi? Sowtu taanga-sikin a sani de o gi u?

¹³ Te wi e sidon pakisei den toli fu Yehofa anga Yesesi di u sabi, u biibi o taanga (Hebrewsama 5:14; 6:1). Wi anga Yehofa sa poli saafisaafi efu u nái sidon pakisei den toli fi en di u sabi. A sani de sa meke u gwe fika en tu (Hebrewsama 2:1; 3:12). Yesesi be taki den sama di nái meke a wowtu „goo aini den ati” ná o fende wini, ma den „booko-ede, gudu anga a fasi fa sama e meke piisii” sa meke den gwe fika Yehofa.​—Lukasi 8:14, 15.

¹⁴ Meke u sidon pakisei den sani di wi e leisi aini Beibel, fu u sa sabi Yehofa moo bun. Te u sabi en moo bun, da a sani de o gi u taanga-sikin fu meke moiti fu abi denseefi manii fi en (2 Korentesama 3:18). U mu e meke moiti naamo fu sabi Yehofa moo bun, da u waka neen baka fu teego. Sani á de di bigi enke a gaandi ya!​—Peleikiman 3:11.

15, 16. (a) Sowtu wini i fende di i teke ten pakisei den toli di i sabi fu Yehofa anga Yesesi? (b) Saide a á makiliki fu sidon pakisei den sani di wi e leisi aini Beibel, ma saide u mu tan meke a moiti de?

¹⁵ Te yu e sidon pakisei den toli fu Yehofa anga Yesesi di i sabi, yu o lobi a waaleiti anga i hii ati. A sani de o gi taa baala anga sisa taanga-sikin. A o gi den sama di  yu e miti aini a peleikiwooko taanga-sikin tu. Te yu e sidon denki a sende di Yehofa sende Yesesi kon dede gi u, yu o teke en fu bigi taki yu anga Yehofa a mati (Romesama 3:24; Yakowbesi 4:8). Wan baala fu Zuid-Afiikan di den e kai Mark be de dii yali a sitaafu fi en biibi ede. A taki: „I mu si a sidon di yu e sidon denki enke te yu e go koi a wan peesi di yu á sabi. O moo wi e teke ten pakisei den sani di u leli, o moo wi e leli nyun sani fu Yehofa Gadu. Te mi booko-saka efuso te mi e booko mi ede anga a ten di e kon, da mi e teke a Beibel. Mi e leisi wan pisi aini, da mi e sidon pakisei san mi leisi. A sani de e yeepi mi tuutuu.”

¹⁶ A á makiliki fu sidon pakisei den sani di wi e leisi aini Beibel, bika a goontapu lai anga sani di e teke a ten fu u. Wan baala fu Afiikan di den e kai Patrick taki a omen sowtu sani e kon aini en pakisei ala dei. Son wan fu den bun, ma taawan a sani di a á wani denki seefiseefi. A taki: „Mi abi fu begi Yehofa fu a yeepi mi puu den sani di mi á wani pakisei aini mi ede, fosi mi man sidon pakisei den sani di mi leisi aini Beibel. Winsi fa a sani ya e teke ten, tokuso ai yeepi mi fu sidon pakisei den sani di sikiifi aini a Beibel. Mi e fii taki mi de moo koosube a Yehofa. Mi e fusutan a waaleiti moo bun tu” (Psalm 94:19, Luku a maiki a ondoo). A sani di a baala ya taki a tuu. A omen wini wi o fende te wi e teke ten ala dei fu sidon pakisei den sani di wi e leisi aini Beibel.​—Toli 17:11.

17. Fa yu e du fende ten fu sidon denki den sani di i leisi aini a Beibel?

¹⁷ Son sama e opo fuuku mamanten fu leisi, sidon denki anga begi. Taawan e du den sani ya te den e teke boo a wooko. Kande a moo bun ten gi yu a neti, efuso fosi i go didon. Son sama e leisi Beibel a mamanten, da den e leisi en baka fosi den go didon (Yowsuwa 1:8). A moo pelensipali sani a fu „koboloiki a ten fu wi a wan koni fasi”, fu u sa fende ten fu sidon denki den sani di wi e leisi aini Beibel.​—Efeisesama 5:15, 16.

18. Sowtu wini den sama di e sidon denki san den e leisi aini Beibel o fende?

¹⁸ Beibel taki te sama e sidon denki den sani di sikiifi aini a Wowtu fu Gadu, anga te den e wooko anga den sani de, da Yehofa o belesi den. (Leisi Psalm 1:1-3.) Yesesi be taki: „A den sama di e yee a wowtu fu Gadu, da den du san a wowtu e taki o de koloku!” (Lukasi 11:28). A sidon di wi o sidon denki den sani di wi e leisi aini Beibel, o meke u tyai useefi a wan fasi di e gi Gadu gaandi. Dati na a moo pelensipali sani. Te wi e du a sani ya, da Yehofa o meke u piisii nownow kaba. Boiti dati, a o gi u teego libi aini a nyun goontapu.​—Yakowbesi 1:25; Openbaring 1:3.