Fosi i go du wan sani, da kande yu e akisi iseefi taki: ’Sowtu wini mi o fende fu a sani ya?’ I si enke a fowtu fu akisi iseefi sowtu wini yu o fende te yu e begi? Nono. A wani u wani sabi efu wi o fende wini te wi e begi. Yopu seefi be akisi enseefi wan leisi taki: „Di mi o kai en, a o piki mi?”​—Yopu 9:16.

Aini den fosi artikel, u be si taki a ná kelikisama wawan e begi. U be si tu taki begi a ná wan sani di e meke sama fii bun da a kaba. A tuu Gadu e aliki u te wi e begi. Efu wi e begi enke fa a wani, efu wi e akisi en sani di bun, da a o aliki u. Enseefi e kai u fu u kon koosube neen (Yakowbesi 4:8). Ma sowtu wini wi o fende efu u gwenti begi? Meke u go luku wantu wini di wi o fende.

Yu e booko yu ede tumisi te yu abi polobelema? Beibel taki u mu e „begi naamo” te wi abi booko-ede. Boiti dati, i mu „taigi Gadu ala sani te yu e begi” (1 Tesalonikasama 5:17; Filipisama 4:6). Beibel taki te wi e begi, „da a freide fu Gadu di libisama á poi fusutan o kibii wi ati anga u fusutan” (Filipisama 4:7). Wi o fii moo bun te u taigi u Dda a hemel sowtu booko-ede wi abi. Gadu seefi e gi u taanga-sikin fu taigi en san a den booko-ede fu u, bika Beibel taki: „Fiingi den lai fi i gi Yehofa, da enseefi o holibaka gi i” (Psalm 55:22).

A omen sama a hii goontapu ondoofeni a sani ya. Wan uman aini Zuid-Koreya di den e kai Hee Ran taki: „Winsi fa mi abi gaan polobelema, mi e  fii enke wan koko komoto a mi ati te mi begi. Mi e fii taki mi kisi kaakiti fu holidoo.” Cecilia di e tan aini Filipeinikondee taki: „Mi e booko mi ede anga den umanpikin fu mi. Mi e booko mi ede anga mi mma tu. Nownow a nái sabi mi moo. Ma begi e yeepi mi fu mi á booko mi ede tumisi. Mi sabi taki Yehofa o yeepi mi fu solugu den.”

Yu e kusumi fu di wan gaan ogii miti i, efuso fu di yu abi wan gaan polobelema? Yu o fii moo bun te yu e begi „a Gadu di e toosutu u”. Beibel e soi taki ai „toosutu u te u de aini banowtu” (2 Korentesama 1:3, 4). Di sani be e moo Yesesi wan leisi, neen „a sutu kini a doti neen a bigin begi”. Neen „wan  engel komoto a hemel kon gi en taanga-sikin” (Lukasi 22:41, 43). Wan taa man di be e dini Gadu anga en hii ati, a be Nehemiya. A omen ogii sama be wani tapu en fu du a wooko fu Gadu. Neen meke Nehemiya be begi Gadu taki: „Gi mi deki-ati.” Beibel e soi taki Gadu be gi en deki-ati tuutuu, bika a be kaba du a wooko fi en (Nehemiya 6:9-16). Reginald di e tan aini Gaana taki: „Te mi e begi, moomoo te sani e moo mi, da mi e fii enke mi e taki anga wan sama di poi yeepi mi anga den booko-ede fu mi. Mi e fii enke a sama de e taigi mi taki a á de fu mi booko mi ede.” Den sani ya e soi kiin taki Gadu e toosutu u te wi e kusumi.

Son sani di wi e du sa tyai bun efu ogii gi wi anga den sama di u lobi. San o yeepi u fu du sani di o meke u fende wini? Beibel e taki: „Efu iniiwan fu wi e mankei koni [moomoo te tesi e miti en], da meke a tan begi Gadu. Bika Gadu e gi sama sani anga en hii ati. A nái suku fowtu a sama. Neen meke Gadu o gi a sama de a koni di a abi fanowdu” (Yakowbesi 1:5). Efu wi akisi Gadu fu a gi u koni, da a o gi wi en santa yeye. A santa yeye o yeepi u fu du sani di o tyai wini gi u. U sa akisi Gadu fu a gi wi en santa yeye tu, bika Yesesi be taki: ’U Dda di de aini hemel o gi den sama di akisi en a santa yeye.’​—Lukasi 11:13.

Yesesi seefi be e akisi en Dda fu a yeepi en te a be de fu du wan pelensipali sani. Beibel e soi u taki „a begi Gadu a hii neti” fosi a luku sama a be o teke fu toon den 12 bakaman fi en.​—Lukasi 6:12.

Leti enke Yesesi, a omen sama fende taanga-sikin di den si fa Gadu yeepi den fu du sani di tyai wini gi den. Wan sisa aini Filipeinikondee di den e kai Regina e taki fu den somen polobelema di a be abi. Baka di en man dede neen be mu solugu en osufamii. Ma a be lasi en wooko. Boiti dati, a be taanga gi en fu kiya den pikin fi en. San yeepi a sisa ya fu du sani anga koni? A taki: „Begi e yeepi mi fu fitoow Yehofa.” Wan baala aini Gaana di den e kai Kwabena e taki saide ai akisi Gadu fu a yeepi en. A taki: „Mi be abi wan wooko di be e pai bun. Ma mi lasi a wooko de.” Baka di a sidon denki san a mu du, a taki: „Ala yuu mi be e begi Yehofa fu a yeepi mi fu sabi san mi mu du. Mi si fa Yehofa yeepi mi fu fende wan wooko fu solugu mi osufamii. Mi e fende ten tu fu du a diniwooko.” Te yu e akisi Yehofa san i mu du fu toon bun mati anga en, da iseefi o si taki a o yeepi i.

U taki fu wantu wini di i sa fende te yu e begi (Efi i wani sabi wantu taa wini di i sa fende, da luku a faki „ Den wini di i sa fende te yu e begi.”) Ma efi i wani fende den wini ya, i mu leli sabi Gadu. I mu leli sabi san Gadu wani tu. Efu na a sani ya i wani, da wi e gi i taanga-sikin fu akisi wan Yehofa Kotoigi fu kon sutudeli Beibel anga i. * Disi na a fosi sani di i mu du efi i wani kon moo koosube na „a sama di e aliki begi.”​—Psalm 65:2.