Gadu e booko en ede anga den sama di e pina aini a ten ya. A o yeepi den tu (Psalm 72:13, 14). Gadu paamisi wi aini Beibel taki den sama di e „pina o fende yeepi”. On ten? „Te Masaa Yesesi soi enseefi a hemel anga den taanga engel fi en . . . a ten de a o puu boon ati a den sama di á sabi Gadu, anga den sama di nai aliki a bun nyunsu di e taki fu a Masaa fu wi, Yesesi” (2 Tesalonikasama 1:7, 8). A sani ya o pasa aini a ten di e kon. Beibel e kai a ten de „a gaan feti di o feti na a dei fu Gadu”, efuso Alimakedon.​—Openbaring 16:14, 16.

Aini a feti de, a ná libisama Gadu o sende fu feti anga den sama di e du ogii. Ma neen manpikin Yesesi Kelestesi, anga den engel o feti a feti de. Den o puu a pina di sama e pina taawan.​—Yesaya 11:4; Openbaring 19:11-16.

Te enke now na aseefi fasi Gadu e si feti. Leti enke fa a be e feti gi den sama di e dini en te taawan be e pina den, a leti so a o feti gi den sama di e dini en aini a ten ya. Ma leti enke a ten di pasa, a Gadu o taki sama mu go feti anga on ten den mu go feti. Gadu poti wan dei kaba di a o kii den sama di e pina taawan efuso den sama di e du ogii anga taawan. Neen manpikin Yesesi Kelestesi o feti a feti de. A sani ya e soi taki a ná  Gadu e sende sama fu go feti aini a ten ya. A nai holibaka gi den, winsi a yeepi den e go yeepi sama di e pina.

Efi i wani fusutan a sani ya moo bun, da pakisei tu boi di bigin feti anga denseefi di den dda gwe. Di den feti té, den tapu, neen den bel den dda. Wan fu den taigi a dda taki na a taawan bigin a feti. A taawan taki na a taawan fosi suku toobi anga en. Ala den tu wani den dda yeepi den. Ma di a dda aliki ala den tu man, neen a taigi den fu den á feti moo. A taigi den taki a o seeka a toli te a kon a osu. Den tu pikin ya wakiti a dda wan pisi ten. Ma a á teke langa seefi neen den bigin feti baka. Di a dda doo osu, a sitaafu ala den tu pikin, bika nawan fu den aliki en.

Den kondee di e feti aini a ten ya e begi Gadu fu a yeepi den. Ma Gadu nai yeepi nawan kondee te den e feti. Gadu taki aini Beibel taki: „Wi á mu pai ogii fu ogii.” Boiti dati a taki: „Ná du ogii anga den sama di e du ogii anga yu” (Romesama 12:17, 19). A taki u mu wakiti te enke a puu ala ogii na a ten fu Alimakedon (Psalm 37:7). Te wan foluku go feti anga wan taa foluku fu di den á wani wakiti Gadu, da Gadu ati e boon. Na a ten fu Alimakedon Gadu o puu boon ati a den ogii sama. Boiti dati, „a o tyai wan kaba kon a feti na ala se fu goontapu” (Psalm 46:9; Yesaya 34:2). Na a ten fu Alimakedon Gadu o tyai wan kaba kon na a feti di sama e feti anga denseefi.

Te Gadu Kownukondee o tii feti ná o de moo. Dati a wan fu den wini di wi o fende. Yesesi be taki fu a Kownukondee ya di a be taki: „I Kownukondee mu kon. Meke sani waka enke fa i wani a goontapu, enke fa sani e waka a hemel” (Mateyesi 6:10). Boiti taki Gadu Kownukondee o puu feti na a hii goontapu, a o puu ogii tu, bika na a sani de meke sama e feti anga denseefi (Psalm 37:9, 10, 14, 15). * Neen meke a nai foondoo wi taki den bakaman fu Yesesi e angii fu fende den wini di Gadu Kownukondee o tyai gi den.​—2 Peitilisi 3:13.

On ten Gadu Kownukondee o puu pina anga ogii? Den sani di e pasa nownow e soi kiin taki wi e libi aini „den kiiboi dei” fu a goontapu ya (2 Timotiyesi 3:1-5). * Dyonson Gadu Kownukondee o tyai wan kaba kon a den lasiti dei, na Alimakedon.

Enke fa u be si kaba, den sama di o dede na a lasiti feti a „den sama di nai aliki a bun nyunsu di e taki fu a Masaa fu wi, Yesesi” (2 Tesalonikasama 1:8). Ma ná feegete taki Gadu nai piisii te sama dede, winsi a wan ogii sama (Eseikiyeli 33:11). A di „a á wani nawan sama dede” na a lasiti feti, meke a gi wantu sama a wooko fu paati a bun nyunsu fu Masaa Yesesi „na a hii goontapu meke ala sama yee” fosi a kaba doo (2 Peitilisi 3:8, 9; Mateyesi 24:14; 1 Timotiyesi 2:3, 4). A peleiki di den Yehofa Kotoigi e peleiki na a hii goontapu meke sama abi a okasi fu sabi Gadu, fu aliki a bun nyunsu di e taki fu Yesesi, anga fu libi na a ten te feti ná o de moo.