1. San Manowa du di a yee taki a o meke wan pikin?

MANOWA anga en uman be sabi taki den á be poi meke pikin. Ma wan dei, neen wan engel fu Yehofa taigi a uman fu Manowa taki a o meke wan boi. Ná pikin foondoo a foondoo di a yee a sani de! Di a taigi Manowa, neen Manowa poolo. Ma a be e booko en ede pikinso. A be akisi enseefi fa Yehofa be wani a kiya a pikin, bika a omen sama aini Islayeli á be e tyai denseefi bun. Fa Manowa anga en uman be mu kiya a pikin fu a be sa lobi Yehofa? Fa den be sa yeepi en fu a dini Yehofa anga en hii ati? Manowa be begi Yehofa fu a sende a engel fi en kon a den baka. A akisi Yehofa taki: „Gaantangi sende a man fu a tuu Gadu kon baka, fu a taigi u fa u mu kiya a pikin di wi o meke.”​—Kuutubakaa 13:1-8.

2. San i mu leli i pikin? San o yeepi i fu du a sani ya? (Luku a faki „ A fosi sama di i mu leli.”)

² Efu yu abi pikin, da kande yu e fusutan fa Manowa be e fii. Iseefi abi a faantiwowtu fu yeepi den pikin fi i fu sabi Yehofa. A yu mu yeepi den fu lobi Yehofa tu * (Luku a maiki a ondoo.) (Odo 1:8). Te yu e holi a Osufamii Anbegi, yu abi a okasi fu yeepi den pikin fi i fu sabi Yehofa anga den toli di sikiifi aini Beibel. Ma a ná sutudeli i mu sutudeli anga i pikin ala wiki da a kaba.  (Leisi Deitolonomi 6:6-9.) San i mu du moo fu yeepi den fu lobi Yehofa? Aini a artikel ya wi o taki fu a libi fu Yesesi. Winsi Yesesi á be abi pikin, u sa waka neen baka te u luku a fasi fa a be yeepi den disipel fi en fu dini Yehofa. Yesesi be lobi den. A be abi sakafasi. Boiti dati, a be sabi fa den e denki anga fa den e fii. Neen meke a be sabi fa a be mu yeepi den. Meke u go luku fa u sa waka a Yesesi baka.

3. Fa den disipel fu Yesesi be du sabi taki Yesesi lobi den?

³ Yesesi be lobi taigi den disipel fi en taki a lobi den. (Leisi Yohanisi 15:9.) A be e meke ten tu fu du sani makandaa anga den (Malikisi 6:31, 32; Yohanisi 2:2; 21:12, 13). Ná leli namo Yesesi be e leli den disipel fi en. En anga den a be mati tu. Den disipel fi en be e si taki a be lobi den tuutuu. San yu e leli fu Yesesi?

4. Fa i sa soi i pikin taki i lobi en? (Luku a fowtow na a bigin.)

⁴ Taigi den pikin fi i taki i lobi den. I mu du sani tu fu soi den taki i lobi den (Odo 4:3; Titesi 2:4). Wan baala fu Australiya di den e kai Samuel taki: „Di mi be moo nyoni, nda be lobi leisi a Mi buku nanga Bijbel tori gi mi ala neti. A be e taigi mi den sani di mi be wani sabi, a be e baasa mi, a be e bosi mi fosi mi go didon tu. Mi foondoo di mi kon fusutan bakaten taki nda kiya aini wan osufamii pe den á be gwenti du den sani ya. Ma tokuso a be e meke moiti fu soi mi taki a lobi mi. A sani de be meke mi anga en toon mati. Mi be e piisii, mi be e fii bun tu.” Yeepi i pikin fu a fii so tu. Taigi en taki: „Mi lobi i.” Baasa den, bosi den. Meke ten fu taki anga den. Pee anga den. Sidon nyan anga den tu.

5, 6. (a) San Yesesi be e du fu di a be lobi den disipel fi en? (b) Fa i mu kaasi i pikin?

⁵ Yesesi be taki: „A den sama di mi lobi mi e kaasi.” * (Luku a maiki a ondoo.) (Openbaring 3:19). A omen leisi den disipel be e sitee anga denseefi fu sabi on du fu den na a moo gaanwan. Yesesi á be e du enke a nai si. Winsi fa a omen leisi a be mu taki anga den fu aseefi sani, tokuso a be abi pasensi anga den. A be abi switifasi. Boiti dati, a be e luku a moo bun yuu fu taki anga den. A be e luku pe na a moo bun peesi fu taki anga den tu.​—Malikisi 9:33-37.

⁶ Soi i pikin taki a di i lobi en meke yu e kaasi en. Son leisi te i taigi den saide den mu du wan sani, efuso saide den á mu du en, da den e aliki i. Ma efu dati á yeepi noh? (Odo 22:15) Waka a Yesesi baka. A be abi pasensi ala yuu te a be e soi den disipel fi en fa den mu tyai denseefi. A be abi pasensi tu te a be e leli den wan sani. Luku sowtu peesi anga sowtu yuu moo bun fu taki anga a pikin. Taki switi anga en. Wan sisa fu Zuid-Afiikan di den e kai Elaine taki ai membee ete fa en mma anga en dda be e taki anga en. Te den be kaasi en, den be e taigi en fu saide. Efu den be taigi en taki den be o sitaafu en te a taangayesi, den á be e kengi mofu. Ma a sisa taki: „Noiti den sitaafu mi anga boon ati. Fosi den sitaafu mi den be e taigi mi fu saide.” Fu di en mma anga en dda be e du a sani ya, meke a be sabi taki den lobi en.

7, 8. (a) San den disipel fu Yesesi be leli di den be yee fa Yesesi e begi? (b) San den pikin fi i sa leli te den e yee fa yu e begi?

⁷ Di den de fu kisi Yesesi tyai go kii, a begi en Dda taki: „Abba, Nda, sani á de di yu á poi du. Puu a kan ya gi mi baa. Ma a ná san mi wani mu pasa. Meke sani waka enke fa i  wani.” * (Luku a maiki a ondoo.) (Malikisi 14:36). Fa i denki den disipel be fii di den yee a begi fu Yesesi efuso di den leisi fi en bakaten? Den si taki anga ala fa Yesesi á be abi sondu, tokuso a be e begi en Dda fu a yeepi en. A sani de leli den taki denseefi mu abi sakafasi. Boiti dati, den leli taki den mu fitoow Yehofa.

⁸ Sowtu wini den pikin fi i o fende te den e yee fa yu e begi? U sabi taki a ná di u wani leli den pikin begi, meke u mu e begi fu den yee. Ma te den yee fa yu e begi, da a sani de sa yeepi den fu fitoow Yehofa. Te wi e begi, a ná den pikin fu u wawan u mu akisi en fu a yeepi, ma u mu akisi en fu a yeepi u tu. Wan sisa fu Balazilikondee di den e kai Ana taki: „Wan fu den polobelema di u be abi, na a siki fu mi gaanmma anga mi gaandda. Te u be abi den sowtu polobelema ya, da mi mma anga nda be e begi Yehofa fu a gi den kaakiti fu holidoo. Den be e akisi en koni fu den sabi san den mu du. Winsi fa a polobelema be bigi, tokuso den be e fika ala sani gi Yehofa. A sani de leli mi taki te mi abi polobelema mi mu fika den gi Yehofa.” Te i pikin e yee fa yu e begi Yehofa fu a gi i deki-ati fi i peleiki gi wan biitisama, efuso fu akisi i wooko basi wantu dei fu go a wan konkelesi, da den o si taki yu e si Yehofa enke a sama di sa yeepi i anga i polobelema. Denseefi o si Yehofa so tu.

9. (a) Fa Yesesi leli den disipel fi en fu abi sakafasi anga fu den á denki denseefi namo? (b) San den pikin fi i o leli, te yu abi sakafasi anga te i nai denki iseefi namo?

⁹ Yesesi be leli den disipel fi en taki den mu abi sakafasi. A be e leli den tu taki den á mu e denki denseefi namo. Yesesi seefi be e du den sani di a be e leli den. (Leisi Lukasi 22:27.) Den disipel fi en be e si taki a be e du ala san a be man fu dini Yehofa. Den be e si taki ai du ala san a man fu yeepi taa sama tu. A so Yesesi leli den fu du aseefi sani tu. Iseefi mu du den  sani di yu e leli den pikin fi i. Debbie a wan sisa di abi tu pikin. A taki: „Noiti mi be e dyalusu te mi man be e meke ten gi taawan enke owluman. Mi be sabi taki te u be abi en fanowdu, a be e meke ten gi u” (1 Timotiyesi 3:4, 5). Sowtu wini den pikin fende di den luku fa Debbie anga Pranas be e tyai denseefi? Pranas taki ala yuu den pikin be de kabakaba fu yeepi a den gaan komakandaa. Den be de koloku, den be abi bun mati, a be e switi gi den fu de anga baala anga sisa tu. Ala den de aini a fuuten diniwooko nownow. Efu yu abi sakafasi, i nai denki iseefi namo, den pikin fi i o du aseefi tu.

10. San e soi taki Yesesi be sabi fa sama e denki di wantu sama fu Galileya be e suku en?

¹⁰ Yesesi be sabi fa sama e denki. A á be e luku san sama e du namo, ma a be e luku saide den e du wan sani. A be man si sama ati. Wan leisi neen wantu sama fu Galileya kon suku en (Yohanisi 6:22-24). A be fusutan taki a ná fu di den be wani yee den leli fi en meke den be e suku en so, ma a nyanyan den be wani (Yohanisi 2:25). Yesesi be sabi san den be e denki. Anga ala pasensi a soi den saide a denki de á bun. A soi den taki den mu kengi a fasi fa den e denki.​—Leisi Yohanisi 6:25-27.

11. (a) Fa i sa meke moiti fu sabi efi i pikin lobi a peleikiwooko? (b) San i mu du fu meke den lobi en?

¹¹ Anga ala fa wi á poi si sama ati, tokuso u sa meke moiti fu sabi fa u pikin e denki. Meke moiti fu kon sabi fa i pikin e si a peleikiwooko. I mu akisi iseefi taki: Te u de aini a peleikiwooko, na a nyan di wi e nyan te wi e boo na a wan enkii sani di den lobi? Efi i si taki den pikin fi i á kaba lobi a peleikiwooko, da du ala san i man fu yeepi den fu lobi en. Gi den pikinpikin sani fu du, da den o fii taki a ná sosokaali den e go anga u aini a peleikiwooko.

12. (a) Sowtu wasikoi Yesesi be gi den disipel fi en? (b) Saide den be mu luku bun anga a sani ya?

¹² Yesesi be soi tu taki ai fusutan saide sama e du son sani. A be sabi taki te wan sama meke wan fowtu, da a sa meke taa fowtu tu. Te fu kaba a sa du gaan sondu. A be wasikoi den disipel fi en gi a sani ya. Den disipel be sabi taki a á bun fu didon anga wan sama di yu á toow anga en. Ma Yesesi soi san e tyai wan sama go didon anga wan taawan di á de en toowpaa. A be taki: „Ala sama di e luku wan uman naamo anga a fii fu didon anga en, didon anga en kaba aini en ati. Efi i leti se ain e meke yu e du ogii, tokoo en puu, da i fiingi en towe” (Mateyesi 5:27-29). A kondee pe den disipel fu Yesesi be e tan be lai anga Romesama. Den sama ya be lobi go luku pee pe den e soi fa man anga uman e didon anga denseefi efuso pee pe sama e kosi. Yesesi be wasikoi den fu den á du nawan sani di be o meke a taanga gi den fu libi enke fa Yehofa wani.

13, 14. San o yeepi den pikin fi i fu koti pasi gi sani di Yehofa á lobi?

¹³ Efi i wani yeepi i pikin fu a á du sani di  Yehofa e buuse, i mu taki anga den a wan koni fasi. A tyali taki aini a ten ya, a á taanga gi pikinengee fu fende sani luku di e soi fa man anga uman e didon anga denseefi. Boiti taki i mu taigi i pikin taki den á mu luku den sowtu sani ya, i mu du ete wantu sani fu kibii den. Akisi iseefi taki: ’Den pikin fu mi sabi fu saide den á mu luku buku efuso felon pe man anga uman e didon anga denseefi? San o gi den a fii fu luku den sowtu sani ya? Mi e gi den a okasi fu kon taki anga mi te den abi a fii fu luku fa man anga uman e didon anga denseefi?’ Winsi a pikin fi i nyoni, tokuso i sa taigi en taki: „Efi i si wan sani a Internet di e gi i a fii fu go luku sani di e soi fa man anga uman e didon anga denseefi, gaantangi kon taki anga mi baa. A á de fi i feele. Sen á mu kisi i fu kon a mi. Mi wani yeepi i.”

¹⁴ I mu sidon pakisei san yu e du fu meke piisii. Bika a den sani de den pikin fi i o du tu te den e meke piisii. Pranas di u be taki fi en a fesi taki: „I sa taki anga den pikin fa i wani, ma a san den si yu e du denseefi o du.” Efu yu e luku sowtu buku yu e leisi, sowtu poku yu e aliki anga sowtu felon yu e luku, da yu e yeepi i pikin fu du aseefi sani tu.​—Romesama 2:21-24.

15, 16. (a) Saide meke i sa biibi taki Yehofa o yeepi i fu leli i pikin? (b) San wi o luku aini a taa artikel?

¹⁵ San Yehofa du di Manowa akisi en fu a taigi en fa a mu kiya a pikin? „A tuu Gadu aliki Manowa” (Kuutubakaa 13:9). Mma anga dda, efu u begi Yehofa fu a yeepi u, a o aliki u. A o yeepi u fu kiya u pikin enke fa a wani. A o yeepi u fu soi u pikin taki u lobi den. A o yeepi u fu abi sakafasi. A o yeepi u tu fu sabi fa den pikin e denki anga fa den e fii.

¹⁶ Leti enke fa Yehofa man yeepi i fu leli i pikin te a nyoni, a so a man yeepi i tu fu leli den te den kon moo bigi. Yesesi be lobi den disipel fi en, a be abi sakafasi, a be e fusutan fa den e denki anga fa den e fii. A taa artikel o soi fa mma anga dda sa waka a Yesesi baka. Den sani ya o yeepi i fu leli den pikin fi i fu dini Yehofa te den kon moo bigi.