Kon u taki i go fositoon a wan taa kondee. Yu e miti sama di e du sani di yu á be gwenti. Den e nyan taa sowtu nyanyan. I be o fuka fu di yu á gwenti den sani ya, ná so noh?

Kande a so i fii di i leisi Beibel a fosi leisi. Te yu e leisi a Beibel da a leti enke yu e go a wan fositen kondee, di yu á gwenti. Yu e leisi toli fu Filisteyasama, yu e si taki sama be e ’piitii den koosi’ te den be e kee. Yu e leisi tu fu wan nyanyan di den e kai mana, anga a wooko di sama be e wooko anga solufu moni (Ekisodesi 16:31; Yowsuwa 13:2; 2 Samuweli 3:31; Lukasi 15:9). Ala den sani ya, sa buuya i te yu e leisi a Beibel. Leti enke fa yu o piisii efu wan sama di sabi a kondee kaba o yeepi i fu sabi a kondee moo bun, a leti so yu o piisii efu wan sama yeepi i fu fusutan Beibel moo bun.

Fanafu di sama bigin sikiifi Beibel aini a yali 1513 fosi Kelestesi, neen den be e yeepi sama kaba fu man fusutan san sikiifi aini. Mosesi a be a fosi edeman fu den Islayelisama. A be e yeepi a foluku fu „fusutan san sikiifi aini a Weiti”.​—Deitolonomi 1:5.

Wan dunsu yali baka Mosesi, sama be de ete di be e yeepi taawan fu fusutan a Wowtu fu Gadu. Aini a yali 455 fosi Kelestesi, wan gaan kulu Islayelisama be kon a wan peesi aini Yelusalem. Pikinengee be de ape tu. Den leliman be e go ape tu fu „leisi a buku pe den weiti fu a tuu Gadu sikiifi” fu meke a foluku yee. Ma boiti dati, „den be e yeepi a foluku fu den fusutan den sani di den be leisi gi den”.​—Nehemiya 8:1-8.

Baka 5000 yali, Yesesi be e du aseefi sani ya. Den sama be sabi en enke wan leliman (Yohanisi 13:13). Son leisi a wan sama namo a be e leli. Ma a omen leisi a leli gaan kulu sama tu. Wan leisi a be taki anga wan gaan kulu sama a wan mongo. „Den sama foondoo di den si fa a leli den” (Mateyesi 5:1, 2; 7:28). Aini a yali 33 di Yesesi anga tu disipel fi en be de a pasi e go a wan peesi koosube a Yelusalem, a ’meke den fusutan finifini san sikiifi aini Gadu Buku’.​—Lukasi 24:13-15, 27, 32.

Den disipel fu Yesesi be e yeepi sama fu fusutan Gadu Wowtu tu. Wan leisi wan bigiman fu Etiopia be e leisi wan pisi aini Gadu Wowtu. Di a disipel di den e kai Filipesi go neen, a akisi en taki: „Yu e fusutan san yu e leisi?” A Etiopia man piki Filipesi taki: „Fa mi o fusutan efu sama á yeepi mi?” Neen Filipesi yeepi en fu a fusutan a pisi di a be e leisi.​—Toli 8:27-35.

Leti enke fa den leliman fu a ten fu Beibel be e yeepi sama fu fusutan a Wowtu fu Gadu, a so Yehofa Kotoigi e yeepi sama fu fusutan a Beibel tu. Den e leli sama aini 239 kondee (Mateyesi 28:19, 20). Ala wiki a moo enke 9 miliyun sama den e yeepi fu fusutan a Beibel. Somen fu den sama ya a ná Kelesten. I ná abi fu pai fu den kon leli i. Den sa kon a yu osu efuso wan taa peesi di bun gi i. Son sama a telefon den e leli den, taawan a computer.

Efi i wani sabi finifini fa den Yehofa Kotoigi e leli sama, da gaantangi akisi wan fu den. Iseefi o si taki Beibel „bun fu gi sama leli, fu poti sama a pasi, fu soi den fa den mu waka leti, anga fu wasikow den fu den mu du sani a wan leti fasi”. A o yeepi i „fu de seeka seeka fu du ala sowtu bun wooko.”​—2 Timotiyesi 3:16, 17.