A omen yali kaba sama e si bedaki enke wan fesa di Kelesten e fii fu membee a dei di Yesesi meke. Ma somen fu den sani di den e du te den e fii bedaki e meke sama foondoo, bika den e akisi denseefi efu a den sani ya be pasa tuutuu di Yesesi meke. Ma fa a du kon taki den mokisa den sani di den e du a bedaki anga a dei di Yesesi meke?

Te sama e fii Bedaki den lobi soi wan gaanbee dda a tv di den e kai Sinterklaas. A wan fabiliki aini Ameekankondee be meke wan anainsitoli fu a man ya aini 1931 fu den be sa meke moo moni. Aini 1950, neen wantu sama fu Balazilikondee be meke den eigi Sinterklaas. Den be e kai en a Ingii Dda. Fa sani be waka? Sinterklaas be popileli moo a Ingii dda. Wan man di den e kai Professor Carlos E. Fantinati taki a be popileli moo Yesesi tu. A taki te sama be yee Bedaki, da a Sinterklaas den be e pakisei. Ma a Sinterklaas na a wan enkii polobelema te sama e fii Bedaki? Efu u wani sabi a piki, da u mu luku den fosi Kelesten.

Wan buku (Encyclopedia Britannica) taki a ten fu den fosi Kelesten, den Kelesten á be e fii a dei di Yesesi meke. Saide? A sama di nai dini Gadu be e fii fuuyali. Neen meke den á be e fii den sowtu fesa ya. Boiti dati, nawan peesi aini Beibel sikiifi on ten Yesesi meke.

Winsi fa den fosi Kelesten á be e fii bedaki, tokuso a Lomusu keliki bigin fii bedaki fo ondoo yali baka Kelestesi. Den be du a sani ya, fu di den be wani moo sama aini a keliki. Den sabi taki den Romesama be abi omen sowtu dei di den e fii. Fanafu 17 december te go miti 1 yanuari, da ala yali gaanse fu den Romesama be e nyan, diingi, den be e piisii, den be e gi den gadu fu den gaandi tu (Christmas in America, by Penne L. Restad). A 25 december den be e fii a dei di a san meke. Di a Lomusu keliki poti 25 december enke a dei di Yesesi meke, a omen Romesama den kisi. Den á be e fii a dei di a san meke moo. Fanafu a ten de, na a dei di Yesesi meke den be e fii. Wan buku taki a denseefi sani di den Romesama be gwenti du te den be e fii a dei di a san meke, den be e du te den be e fii Bedaki (Santa Claus, a Biography, by Gerry Bowler).

Den sani ya e soi kiin taki Kelesten á be e fii Bedaki, ma a den sama di á be e dini Gadu. Wan man di den e kai Stephen Nissenbaum sikiifi taki a du sama e du enke a Yesesi fuuyalidei den e fii te den e fii Bedaki (The Battle for Christmas). Bedaki nai hei Gadu anga en Manpikin Yesesi Kelestesi. U mu si a sani ya enke wan lawlaw sani? Beibel taki: „U si enke leti-du anga ogiidu e paa? Efuso u si enke kiin anga dunguu e go?” (2 Korentesama 6:14) Leti enke wan koon bon di á poi hali seeka, a leti so Bedaki a wan fesa di ná o poi seeka kon bun.​—Peleikiman 1:15.