A TOLI DI SIKIIFI A FESISE | I SA FUSUTAN A BEIBEL
Saide a de fanowdu fu fusutan a Beibel?
„A Beibel a wan keliki buku di ala sama sabi. Ma a wan taa kondee buku. Sineisi ná abi en fanowdu.”—LIN, CHINA
„A den santa buku fu a Hindustani biibi seefi mi nai fusutan. Da na a Beibel mi o fusutan?”—AMIT, INDIA
„Mi e lesipeki a Beibel, bika mi yee taki a wan gaandi buku di sama e bai moo ala taa buku. Ma mi á si wan Beibel wanten.”—YUMIKO, YAPAN
A omen sama a hii goontapu e lesipeki a Beibel anga ala fa den á sabi san sikiifi aini, moomoo miliyunmiliyun sama fu Asiya. Sama di e tan aini kondee seefi pe a Beibel lai nai kaba fusutan en bunbun tu.
Kande yu e akisi iseefi taki: „Saide a de fanowdu fu mi fusutan a Beibel?” Efi i fusutan a buku ya,
-
Yu o de koloku
-
Yu o sabi san i mu du te yu abi polobelema aini yu osufamii
-
Yu o sabi san i mu du te yu abi booko-ede
-
Yu o sabi fa i mu libi anga taawan
-
Yu o sabi fa i mu koboloiki i moni
Luku a toli fu Yoshiko di e tan a Yapan. A be wani sabi san sikiifi aini Beibel, neen meke a leisi en. Baka di a leisi en, a taki: „Beibel yeepi mi fu fusutan saide mi de a libi. Mi e piisii te mi e pakisei a ten di e kon.” A taki a nai fii enke a fu soso a de a libi moo. Amit di u be taki fi en a fesi seefi go ondoosuku a Beibel. A taki: „Mi foondoo tuutuu. A omen sani sikiifi aini Beibel di abi wini gi ala sowtu sama.”
A omen miliyunmiliyun sama Beibel yeepi fu abi wan moo bun libi. Kande i sa ondoosuku en luku fu si sowtu wini yu o fende.
