PANAYIOTA kiya a wan fu den gaan tabiki fu a Mindiikondee Se. Di a be moo yonkuu a be e mumui aini politiki. Bakaten a be e wooko enke seketasi gi wan politiki palitei na a pisi pe ai tan. A be e waka a sama osu fu suku moni gi a palitei fi en. Ma baka wan pisiten a be fii booko-saka. Bika a famii anga mati wawan den sama fu a politiki palitei be e yeepi. Den be e feti fu abi moo makiti, den be e kwali anga denseefi tu. Aladi den be e taki den a mati, tokuso den be e dyalusu anga denseefi.

Daniel kiya aini wan osufamii di á be e meke sipowtu anga a keliki fu den. Den be e tan aini Ierland. A sabi bunbun ete fa den pilisite fu a keliki be e diingi duungu, anga fa den be e dobel. A sabi ete fa den be e nyan a moni fu a keliki, anga ala fa den be e leli en taki a o boon aini wan gaan faya efu a sondu.

Jeffery wooko omen yali gi son bodeleifi aini Ameekankondee anga Ingiisikondee. Den bodeleifi ya be abi gaan sipi di e tyai lai. A sabi ete fa den bisnisman be e pai lantiman efuso du taa sani fu fende a pampila di den be wani. Den be e taki ala sowtu sani, winsi a lei, fu sama be sa wooko anga den.

Ma a ná den sama ya wawan e bidiigi taawan. Na ala se fu goontapu sama e bidiigi taawan. Den politikiman, den fesiman fu keliki anga den bisnisman e bidiigi omen sama. Aini Giikitongo, a wowtu bidiigi e soi go a wan sama di e wei sani tapu en fesi te ai pee fu sama á sabi sama neen. Bakaten, sama koboloiki a wowtu ya fu soi go a wan sama di nai meke sama sabi fa a de tuutuu. Ai koli taawan fu a sa fende wini.

Te wan sama fusutan taki wan taawan bidiigi en, en ati e boon. A sani ya sa meke a bigin buuse a sama de. Kande ai akisi enseefi taki: „A bidiigi di sama e bidiigi taawan o kaba wan dei?” Ai bigi gi u taki Beibel e soi taki aini a ten di e kon, sama ná o bidiigi taawan moo.

Enke fa Beibel e soi, a ná libisama fosi bigin bidiigi taawan. Ma a wan yeye di den e kai Saatan Didibii. Na a bigin a be koboloiki wan sineki fu koli  a fosi uman di den e kai Efa (Genesesi 3:1-5). Fanafu a ten de, neen sama bigin bidiigi taawan. Den e koli taawan fu fende wini.

Di den Islayelisama be bigin dini falisi gadu, anga di den be e du enke den e dini Gadu anga den hii ati, neen Yehofa wasikoi den omen leisi taki sani ná o waka bun gi den. Yehofa be meke a polofeiti Yesaya taigi den taki: „Anga mofu a foluku ya e dini mi. Anga mofu den e gafa mi, ma ná anga den ati” (Yesaya 29:13). Fu di a foluku á be wani aliki, meke Yehofa fika den taa foluku fu booko a tempel fu Yelusalem pe den Dyu be e dini en. A fosi leisi di sama booko a tempel, a di den suudati fu Babilon booko en aini a yali 607 fosi Kelestesi. Du fu tu leisi a di den suudati fu Rome be booko en aini a yali 70 baka Kelestesi. A toli ya e soi taki Gadu ná o meke bidiigiman tan fu alaten.

Gadu anga en manpikin lobi sama di nai bidiigi taawan. Di Yesesi be de a goontapu, neen wan man di den e kai Nataniyeli be waka go miti en. Di Yesesi si ai kon, neen a taki: „I si a man de, a wan Islayelisama di nai bidiigi sama” (Yohanisi 1:47). Nataniyeli di den be e kai Baatolomeyesi, toon wan fu den 12 apostel fu Yesesi.​—Lukasi 6:13-16.

Yesesi be e meke ten gi den apostel fi en. A be leli den tu fa den mu libi enke fa Yehofa wani. Den á be mu bidiigi taawan. Yesesi be wasikoi den taki den á be mu e bidiigi sama enke den keliki fesiman fu a ten de. Luku san den keliki fesiman be e du.

Den be e du „sama ain sani”. Yesesi be taigi den sama di e aliki en taki: „Te wi e du bun, wi á mu du sama ain sani . . . enke fa den bidiigiman e du fu sama gafa den.” A be taigi den tu taki ’sama ná abi fu sabi taki den du wan pootiman wan bun’. Den á be mu e begi fu di den wani sama si den. A so den be o soi taki den e dini Gadu tuutuu. Den Dda a hemel be o piisii anga den tu.​—Mateyesi 6:1-6.

Den be lobi kuutu sama. Yesesi be taki: „U bidiigiman! Puu a ponsu di de aini yu ain fosi, da yu o moo si bun fa i mu puu a pikin fini tiki ai baala ain” (Mateyesi 7:5). Efu wi e meke gaan fowtu, ma tokuso wi e poti pakisei na ala den pikinpikin fowtu fu taawan, da a du wi e du enke wi e tyai useefi bun. Bika „ala sama e sondu. Nawan sama poi dyendee enke Gadu”.​—Romesama 3:23.

A soso ogii den be e pakisei. Wan leisi neen den disipel fu den Faliseiman anga den bakaman fu Herodes poti wan akisi gi Yesesi fu lantimoni. Fu di den be wani Yesesi piki den meke den be e du enke a gafa den be e gafa en. Den taigi en taki: „Leliman, u sabi taki den sani di yu e taki a tuu, yu e leli sama a pasi fu Gadu enke fa a de tuutuu.” Bakadati neen den poti wan akisi gi en fu fende fowtu neen. Den akisi en taki: „A fiti fu pai Gaankownu a lantimoni, efuso wi á mu pai en?” Neen Yesesi piki den taki: „U bidiigiman. Saide meke wi e tesi mi du?” A fiti fa Yesesi be kai den bidiigiman bika ná wani den be wani sabi san den mu du, ma den be wani „fasi Yesesi anga den sani di ai taki”.​—Mateyesi 22:15-22.

A sama di be e taki san tuu be de aini a Kelesten kemeente di be sete na a Pinksterfesa aini a yali 33. Den á be e bidiigi taawan. Wan fu den 12 apostel di den e kai Peitilisi be gi taa Kelesten taanga-sikin fu „aliki a tuu leli”. A be taigi den tu fu lobi den baala anga den hii ati (1 Peitilisi 1:22). Pawlesi be gi Kelesten taanga-sikin fu den lobi taawan anga den hii ati, wan kiin konsensi, anga fu di den abi tuutuu biibi.​—1 Timotiyesi 1:5.

Leti enke fa den leli fu Yesesi anga du fu den apostel be yeepi sama fu den kengi den libi aini a ten di pasa, a so den leli ya e yeepi sama aini a ten ya fu kengi den libi tu. A apostel Pawlesi be sikiifi taki: ’Bika a wowtu fu Gadu de a libi. A abi kaakiti. A saapu moo wan feti-how di saapu a tu se. Ai koti dipi, taki ai tyai kon a kiin fa wan sama de tuutuu. Ai paati bon anga bonfatu. A poi si kiin san  wan sama e denki aini en ati anga san a wani du’ (Hebrewsama 4:12). A omen sama di be e bidiigi taawan kengi den libi di den sutudeli Beibel. Nownow den nai bidiigi taawan moo. Luku fa sani waka anga den dii sama di u be kai na a bigin.

Di Panayiota go a wan komakandaa fu Yehofa Kotoigi di den kai en, neen a sani de kengi en libi. A á si nawan sama di be e du enke a bun moo taawan. A taki: „Mi si taki den Kotoigi lobi denseefi tuutuu. Den e booko den ede anga taawan. A omen yali mi de aini politiki, ma noiti mi si a sani ya.”

Di Panayiota bigin sutudeli Beibel, neen a bigin kengi a fasi fa a be e libi. Bakaten neen a dopu. Nownow a dopu 30 yali kaba. A taki: „Nownow a libi fu mi e gi mi piisii. A tuu libi a ná a waka di mi be e waka go a sama fu gi den taanga-sikin fu holibaka gi politiki, ma na a bun nyunsu fu Gadu Kownukondee di mi e paati. Na a Kownukondee namo o yeepi wi anga den polobelema di wi abi.”

Daniel be e go a fesi aini a Kelesten kemeente. Den be gi en wantu faantiwowtu aini a kemeente. Ma baka wantu yali neen a meke wan fowtu. A sani de meke en kosensi be e fon en. A taki: „Mi be membee a bidiigi di den keliki fesiman fu a keliki pe mi be de fosi be e bidiigi sama. Mi á be wani de enke den. Fu di mi á be wani de enke wan sama di e bidiigi taawan meke mi á be wani tyai den faantiwowtu fu mi moo. Bika den baala anga sisa be o go e si mi enke bunbun sama, anga ala fa mi sabi bunbun taki mi meke wan fowtu.”

Ma a wan piisii sani taki baka wan pisiten Daniel be man tyai faantiwowtu aini a kemeente anga wan kiin konsensi baka. A so den sama di e dini Gadu anga wan kiin ati e tyai denseefi. Den sama ya leli fu ’puu a ponsu di de aini den ain’, fosi den meke moiti fu „puu a pikin fini tiki” aini den baala ain.

Jeffery di be e du bisnis omen yali taki: „O moo mi be e sutudeli Beibel, o moo mi be e si taki mi á mu bidiigi taawan. Mi be fusutan taki mi á be mu e lei fu meke sama wooko anga mi. A sani di sikiifi aini Odo 11:1 a wan fu den sani di doo mi ati. Ape sikiifi taki: ’Yehofa á lobi wan wegi di nai wooko soifili.’” Jeffery á de enke den man di be kon akisi Yesesi a toli fu a lantimoni. Nownow a nai koli taawan, ma ai du sani anga wan kiin ati gi den Kelesten baala fi en, anga taa sama.

Den miliyunmiliyun Yehofa Kotoigi di de a hii goontapu e meke moiti fu libi enke fa Beibel leli den. Den e meke moiti fu ’kengi den fasi fu den fu toon nyun sama di de enke fa Gadu wani, dati wani taki bun ati sama di ala yuu e du san Gadu taki’ (Efeisesma 4:24). U wani gi i taanga-sikin fu leli sabi sama a den Yehofa Kotoigi, san den e biibi, anga fa den sa yeepi i fu sabi moo fu a nyun goontapu di Gadu paamisi u. „Na ape sani o waka a wan leti fasi”. Sama ná o bidiigi taawan moo tu.​—2 Peitilisi 3:13.