Bana bena ba mákoke̱ ba be̱n m’bē̱ munde̱ne̱ ma bakise̱ ná bayedi babu ba mákokwe̱ mimbu ba mabongwabe̱ bwam. Bibe̱l e makwala ná ba bana bangame̱n “se̱le̱ jokwa o lee̱le̱ dube̱ la Loba o ndabo abu mo̱me̱ne̱, ba timbise̱le̱ basango na bańango babu bwam . . . ; ebanja nika e do̱li oboso ba Loba.” (1 Timoteo 5:4) Bana be te̱ bongwa bayedi babu ba mákokwe̱ mimbu, be pe̱ nde sengane̱ byanedi be maso̱be̱ o Bibe̱l be makwale̱ ná ba bole bayedi babu edube.—Efeso 6:2, 3.

 Bibe̱l e si mabola bediedi ba tobotobo ba ne̱ni bongwa bayedi ba mákokwe̱ mimbu. Nde e be̱n byembilan ba bome na bito ba dube̱ bena ba boli nika. E mabola pe̱ malea ma bwam me ná mongwane̱ ba bena be o bongwe̱ bayedi babu.

•  O mińa ma Bibe̱l, ne̱ni belongi ba mbia bō̱ be tano̱ bombwea bayedi babu ba ta ba mákokwe̱ mimbu e?

•  Njika malea ma Bibe̱l me ná mongwane̱ ba bena be o bongwe̱ bayedi babu e?

•  Mo̱ Bibe̱l e makwala ná bayedi ba mákokwe̱ mimbu bangame̱n nde bongwabe̱ o mboa e?

 Ba boli nika o mbadi jita, mō̱ te̱ bupisane̱ bete̱medi bao.

•   Yosef a ta a ja etum na sango ao, Yakob. Ponda epolo ye̱ne̱ne̱no̱, Yosef a boli nde ná Yakob a be̱ mo̱ be̱be̱. Yosef a jese̱ sango, a dese̱ mo̱, nde a tata pe̱ mo̱.—Bebotedi 45:9-11; 47:11, 12.

•   Rut alo o ja o ekombo a ńango ńa diba, na mo̱ a bola pe̱ ebolo na ngińa o bongwa mo̱.—Rut 1:16; 2:2, 17, 18, 23.

•   Yesu, obiana a mawo̱, a po̱si moto nu me̱nde̱ bongwe̱ ńango Maria, nu ta nde yen ebe mukusa.—Yohane 19:26, 27. a

 Bibe̱l e be̱n malea me ná mongwane̱ ba bena be o bongwe̱ bayedi babu o lembe̱ mitakisan mena beno̱ ná ba be̱ne̱ jombwea dibongo la bayedi babu.

•   Bola bayedi bo̱ngo̱ edube.

   Nje Bibe̱l e makwalano̱: “Dube̱ so̱ngo̱ na ńo̱ngo̱.”—Bebusedi 20:12.

   Neni be bete̱sedi ba Bibe̱l beno̱ ná be we̱le̱be̱ o ebolo e? O mabola bayedi bo̱ngo̱ edube ke̱ o mese̱le̱ ná babo̱me̱ne̱ ba bole mambo mō̱ ngud’abu e madie̱le̱no̱ babo̱ o bola. E we̱li te̱ be̱, ese̱le̱ ná babo̱me̱ne̱ ba po̱se ne̱ni ba mapulano̱ ná bombweye babo̱. O mulemlem ma ponda, lee̱le̱ babo̱ edube tongwea na bola nje ye o ngud’ango̱ o jongwane̱ babo̱.

•   Be̱ ńai ni maso̱ṅtane̱ na ni malakise̱.

   Nje Bibe̱l e makwalano̱: “Dibie̱ di mabola moto a si wamse̱ linga, ye pe̱ nde mo̱ edube o lakise̱ mawuse̱.”—Minia 19:11.

   Neni be bete̱sedi ba Bibe̱l beno̱ ná be we̱le̱be̱ o ebolo e? Moto nu mákokwe̱ mimbu a kwali te̱ lambo di si te̱nge̱n, to̱so̱ o mo̱nge̱le̱ te̱ ná a si matimbise̱le̱ te̱ masoma ońola dibongo o mawaneano̱ mo̱, baise̱ wame̱ne̱ ná, ‘Ne̱ni mba na wusano̱ senga yete̱na mba nde na be̱ o bete̱medi bao e?’ O po̱ngi te̱ miwe̱n ná o so̱ṅtane̱ o lakise̱ pe̱, o si me̱nde̱ bola ná bete̱medi be be̱ bobe buka nje beno̱.

•   Baise̱ bape̱pe̱ malea.

   Nje Bibe̱l e makwalano̱: “Myano mi masambwa ke̱ malea ma titi; malea me te̱ jita, mi matongwa.”—Minia 15:22.

   Neni be bete̱sedi ba Bibe̱l beno̱ ná be we̱le̱be̱ o ebolo e? Po̱ngo̱ muwaso o bia ne̱ni beno̱ ná ba bo̱lise̱ maboa mena bayedi bo̱ngo̱ ba be̱nno̱. Wasa mado̱kita me ná mombwea babo̱ owe̱ni o majano̱. Kwala na bato bena ba bongo bayedi babu ba mádune̱. O be̱n te̱ bonańango, ombwa nga bińo̱ le ná lo te̱se̱ ndongame̱n a mbia ná lo kwaleye ońola ńo̱ng’a bayedi bańu na dibongo labu, na ne̱ni mō̱ ńańu te̱ eno̱ ná ongwane̱.

•   Bia myoyo mo̱ngo̱.

   Nje Bibe̱l e makwalano̱: “Dibie̱ le omboa ba ba sibise̱ ńolo.”—Minia 11:2.

   Neni be bete̱sedi ba Bibe̱l beno̱ ná be we̱le̱be̱ o ebolo e? Emba ná o be̱n myoyo. K’eyembilan, we ná o si be̱ne̱ ponda to̱ ngudi. Nika ńe ná e bola ná o si bolea bayedi bo̱ngo̱ ka nje te̱ o mapulano̱. E po̱i pe̱ te̱ ná dibongo la bayedi bo̱ngo̱ le o wo̱lise̱ wa jita, baise̱ jongwane̱ la bene̱ belongi ba mbia to̱ la ba bena ba bi y’ebolo.

•   Ombwea pe̱ wame̱ne̱.

   Nje Bibe̱l e makwalano̱: “To̱ moto a si singe̱ eyobo ao ponda to̱ po̱; nde a mabongwa nde mo̱ na jombwea pe̱ ońol’ao.”—Efeso 5:29.

   Neni be bete̱sedi ba Bibe̱l beno̱ ná be we̱le̱be̱ o ebolo e?To̱ nika o be̱nno̱ m’bē̱ ma bongwa bayedi bongo̱, wangame̱n pe̱ jombwea ńo̱ng’ango̱, na ya mbia mo̱ngo̱ yete̱na o bai to̱so̱ o babe̱. Wangame̱n da bwam. Wangame̱n wumse̱ bwam, na ko̱ iyo̱ bwam. (Mulangwedi 4:6) Epolo ye̱ne̱ne̱ te̱, wangame̱n pe̱ no̱ngo̱ wumse̱. O boli te̱ nika, o me̱nde̱ be̱ne̱ ngudi ni mapule̱ ná o we̱le̱ bongwa bayedi bo̱ngo̱.

 Bibe̱l e si mabola bediedi ba tobotobo be makwale̱ ná bana bangame̱n nde bongwa bayedi babu o mboa. Mbia mō̱ mi po̱si o jombwea bayedi babu o mboa etum te̱ nika ńeno̱ ná e we̱le̱ bolane̱. Nde ombusa ponda, mi timbi je̱ne̱ ná ye bwam ná balane̱ babo̱ o ndabo a dibongo. Belongi ba mbia be̱se̱ bangame̱n ko̱to̱me̱ ná ba no̱nge bedomsedi bena be do̱lisan babo̱ be̱se̱.—Galatia 6:4, 5.