Sinima ya mako̱to̱ne̱ masu mande̱ne̱ i matapa biso̱ mulema jita, yongwane̱ pe̱ biso̱ o bata so̱ṅtane̱ belēdi ba Bibe̱l. Jako̱to̱ne̱ Dinde̱ne̱ la 2020 “Bwa muńe̱nge̱ ponda ye̱se̱”! di be̱n 114 sinima, na 43 ma bekwali belongi ba Dibe̱le̱ di Madie̱le̱ na bongwanedi babu ba tombise̱no̱. Mo̱ o mábaise̱ na wame̱ne̱ njika miwe̱n mi mapo̱ngo̱be̱ na mwaninga ma mo̱ni mu mabusisabe̱ o bwam ba busise̱ yi sinima e?

 Lambo ka 900 ba bonasango na bonańango o wase ńe̱se̱ ba boli pond’abu na bia labu la bola o jongwane̱ ná mun mudango mu busisabe̱. O mususu mwe̱se̱, y’ebolo e no̱ngi 100 000 la hawa o pambo a ponda ńa mbu miba. O 100 000 la hawa, busise̱ la sinima Nehemia: “Muńe̱nge̱ ma Yehova nde mwe ngiń’ańu” ńa 76 minuti mo̱me̱ne̱ mō̱ di no̱ngi 70 000 la hawa.

 Ye̱ke̱i te̱ le o so̱ṅtane̱ ná e ta e pula mo̱ni eyaka ná bate̱ mpuli ońola y’ebolo ba kuse da, wum’a boja, bepolo b’ebolo, masin m’ebolo na bene̱ belongisan bepe̱pe̱.

 Munasango Jared Gossman mute̱ mpuli o o̱fis a Sinima na Bosenga a teleye̱ ná: “Epep’a Belēdi ya Dibe̱le̱ di Madie̱le̱ e mapula ná ńai na ńai a bose̱di na bekombo be̱ne̱ne̱ o sinima yasu. Ni mbad’a bola e mabonde̱ ná bwē ná je nde mbia ma bonasango na bonańango ma wase ńe̱se̱. Ońola nika nde 24 ma mabo̱to̱ ma bonasango o 11 bekombo ma bolino̱ ebolo mwemba o bwam ba londise̱ mun mpuli. Ná ban bonasango be o ńai na ńai a bepolo ba we̱le̱ bola ebolo mulatako e ta e pula mo̱ni eyeka, te̱se̱ la mambo la bwam, na jakwalisane̱ la bwam.”

 E ta pe̱ e pula ńai na ńai a belongisan na bepolo ba tobotobo ońola dongo dinde̱ne̱ la sinima yasu. K’eyembilan, o busise̱ sinima Nehemia: “Muńe̱nge̱ ma Yehova nde mwe ngiń’ańu” di longi bepolo oteten a wum’a no̱ngo̱ la madoi ye o Mudongo ma Ebo be̱be̱ na Patterson o Ńu York, o Amerika. Bonasango ba ta ba pula bolane̱ mo̱ni bwam, nde ba ta pe̱ ba pula ná sinima e lee̱ mambo ná te̱ite̱i ka nje te̱ ma tano̱ o mińa ma Nehemia. Babo̱me̱ne̱ so̱ nde ba po̱ngi belongisan na mambo ma wam ná ba we̱le̱ longa edim’a Yerusalem ńa kwaṅ. Elongisan te̱ e po̱ngo̱be̱ nde n’ebambu a meta mutoba o jasame̱, e lalabe̱ na belalan ba mo̱ńmo̱ń be penabe̱ ná be̱ne̱ne̱ ka madale ma mbale̱. Be “bedima” be wusa so̱ bambabe̱ na bo̱bise̱ la ńolo, na te̱se̱be̱ pe̱ o ńai na ńai a mbadi o bwam ba po̱ngo̱ ńai na ńai a maduta, nika ńe̱se̱ ńongwane̱ o wutise̱ muso̱ngi ma belongisan be ta be pula o busise̱ ńai na ńai a bepolo. Nde to̱ na nika, buka te̱ ońola nin sinima, belongisan ba longa la bepolo mo̱me̱ne̱ mō̱ be no̱ngi 100 000 dollar (50 000 000 frank CFA). a

 Bia la man me̱se̱ di mabola ná di bate timbise̱le̱ masoma ońola mudango ma jako̱to̱ne dinde̱ne̱ la mun mbu. Je mbaki ná ombusa mu ntu na miwe̱n me̱se̱ mi po̱ngo̱be̱ o bwam ba busise̱ din jako̱to̱ne̱, bonasango o wase ńe̱se̱ ba me̱nde̱ timbise̱le̱ Yehova masoma na sesa pe̱ mo̱ na doi diwo̱. Di matimbise̱le̱ bińo̱ masoma ońola mabea mańu ma wonja lo mabolano̱ o sue̱le̱ ebol’a wase ńe̱se̱ tongwea na donate.pr418.com na yine̱ mbadi ipe̱pe̱.