Ńo̱ng’a Dibe̱le̱ di Madie̱le̱ ńe nde ná ba bolane̱ mo̱ni mu mawe̱ na mabea ma wonja, ná di be̱ne̱ milongi mi mongwane̱ ná ebol’a dikalo la Janea yale oboso. K’eyembilan o mbu m’ebolo ma 2023, mikanjo m’ebolo ma Mboṅ a Yehova o wase ńe̱se̱ mi busise̱ buka 500 ba lodun la do̱lar o janda, o longa, o po̱ngulane̱ na o sabangane̱ mandabo ma Janea name̱ne̱ pe̱ na mandabo ma mako̱to̱ne̱. a Mu muso̱ngi mu si mombwea nje myemba ma wase ńe̱se̱ mo̱me̱ne̱ mi busise̱no̱ o sabangane̱ mandabo ma Janea mena mi mabolane̱no̱.

 O sumo te̱ nika, di mabolane̱ pe̱ mabea ma wonja o longa na o sabangane̱ milongi ma mikanjo m’ebolo, mena mi mongwane̱ o te̱se̱ na o sue̱le̱ ebol’a dikalo o wuma na wuma te̱. Ye mbale̱ ná kana di wamse̱no̱ ebolo e mabolane̱ o mikanjo m’ebolo, je ná di bata mo̱ni o sue̱le̱ ebol’a longa na ya po̱ngulane̱ mandabo ma Janea na mandabo ma mako̱to̱ne̱. To̱ na nika, e mapula te̱ nde eyek’a mo̱ni ná di po̱ngulane̱ milongi ma mikanjo m’ebolo to̱ ná di longe pe̱te̱ mo̱ peńa. Ońola nje nika ńeno̱ mweńa e? Nate̱na o njika dikala jongwane̱ la mikanjo m’ebolo leno̱ mweńa ońola ebol’a dikalo e? Jombwe.

 Milongi ma jita la mikanjo m’ebolo mi mábuka 30 to̱ 40 ma mbu! Nicholas ńena nu mabole̱ ebolo na o̱fis ni mombweye̱ ebol’a longa o wase ńe̱se̱ (WDC), a kwali ná: “To̱ o sabangane̱ nde bolongi bwam ne̱ni, nik’e si meka ná na ponda bo dune. Po̱ngulane̱ la bolongi di mabatea mo̱ mimbu ma longe̱, ńai jeno̱ ná di benga bolane̱ mo̱.”

 Jangame̱n pe̱ tukwa milongi ma Bete̱l bupisane̱ ńo̱ng’a bebokedi. Muso̱ngi ma bate̱ dikalo o wase ńe̱se̱ mu bati to̱ndo̱ jita, buka nje mu tano̱ ponda mikanjo m’ebolo jita mi longabe̱no̱. Di be̱n ńo̱ng’a bato jita ba mabole̱ ebolo o mi mikanjo m’ebolo, o bwam ba sue̱le̱ mu muto̱nde̱. Nik’e mabola so̱ ná Bete̱l yena i ta i be̱ne̱ mute̱ mu dongame̱n ońol’ebolo ponda i longabe̱no̱ i másala nde tatan!

 Lambo dipe̱pe̱ le mweńa jita le nde to̱ti la mbo̱le̱. Kana jāno̱ nde o su la mińa misukan ma nin wase, mbeu a ńolo jita yena ye ná i wana kwedi i mako̱. (Lukas 21:11) Ponda di mapo̱ngulane̱no̱ milongi ma bebokedi, di mabolane̱ nde mbad’a longa i sukan busisabe̱; nik’e mabola ná mi milongi mi bate be̱ mbaki ońola ba bena ba mabole̱ ebolo oten. Mi mpo̱ngulan mi mabola pe̱ ná e be̱ lambo di wam ońola bonasango o te̱se̱ bebolo ba wana la jongwane̱ na o jongwane̱ ná ebol’a dikalo yale oboso, ke̱ mbeu a ńolo e kwedi.

 Owas’a bediedi ba Dibe̱le̱ di Madie̱le̱, bonasango ba boli bebolo ba mweńa o 43 ma Bete̱l o mbu m’ebolo ma 2023. Nik’e mapula kwala ná be bebolo be tapi be̱be̱ na dongo diwo̱ la maba la Bete̱l o wase ńe̱se̱. Jombwe ngus’a byembilan be malee̱ ońola nje nik’ e tano̱ mweńa.

 Angola. Matt ńena ńe elong’a dibe̱le̱ la mukanjo m’ebolo ma Angola a kwali ná: “Di be̱n edube ya je̱ne̱ ne̱ni eding’a Hagai 2:7 yeno̱ londa o mbadi ni si ta ni máje̱ne̱ne̱. O pambo a ponda ńa dom la mbu buka te̱, je̱n muto̱nde̱ ma bate̱ dikalo o dime̱ne̱ la 60%! Ná di be̱ ńai jeno̱ ná di sue̱le̱ ebolo nik’e mabaise̱no̱, e ta e pula ná muso̱ngi ma babole̱ ebolo o Bete̱l mu bate ngedi ilalo buka nje mu tano̱. Nde Bete̱l asu e si ta e be̱ne̱ epolo o kasa mu muso̱ngi munde̱ne̱ ma bato. Jita la bonasango ba ta so̱ ba bola ebolo buka dime̱ne̱.”

 Bonasango bō̱ ba po̱so̱be̱ ná bombweye nje ye ná e bolabe̱. O bebotedi ba se̱le̱ nde jo̱nge̱le̱ ná nje e wam o bola ye nde ná ba wane mpo̱ngulan o milongi ma Bete̱l ńasu. Nde ombusa babo̱ bata jombwea mambo bwam, ba so̱ṅtane̱ ná nik’e titi mbad’a bwam ńa bolane̱ mo̱ni ma mabea ma wonja. Ba timbi so̱ domse̱ ná ye bwam ná bande bolongi bō̱ bwena bo ta be̱be̱ na Bete̱l, nde ba po̱ngulane̱ pe̱ mo̱. Matt mo̱ ná: “Ponda ba wanedino̱ dibe̱le̱ la mukanjo m’ebolo di jo̱nge̱le̱ la janda na po̱ngulane̱ bolongi bope̱pe̱, di ta di bwa bo̱ngo̱ ná bo bolongi bo si me̱nde̱ be̱ bwam ońola ebol’asu ka bolongi bwena bebokedi mo̱me̱ne̱ be longino̱. Nde tatan ebolo e mábo̱no̱, di me̱ne̱ ná bo malondise̱ ńo̱ng’asu bwam jita. Yehova a namse̱ be bedomsedi.”

 Na ponda, e me̱nde̱ pula yen ebe ná ba kolise̱ mukanjo m’ebolo ma Angola. Nde tatan mu be̱nno̱ bo bolongi ba peńa, milongi beno̱ ná ba tukwa ombusa ponda, name̱ne̱ pe̱ na milongi Bete̱l e re̱ntino̱ o mbasan, mukanjo m’ebolo mu kolo ńai mweno̱ ná mu sue̱le̱ muto̱nde̱ o mōnda mao.

 Yapan. Bete̱l ńaboso e longabe̱ nde yā be̱be̱ na 40 ma mbu, e si ta pe̱ to̱ e mákusa mpo̱ngulan munde̱ne̱. Bonasango ba boli ebolo jita ná ba sabangane̱ mi milongi, nde mbale̱ ńe nde ná di bolane̱ mo̱ pond’a bwaba buka nje e ta e te̱se̱be̱. Ońola nika nde ebolo ende̱ne̱ ya po̱ngulane̱ mo̱ yeno̱ o wase.

 Mbadi mambo ma matombano̱ o Bete̱l pe̱ e tuko na ponda. Oboso ba mbu 2015, kicin ńa Bete̱l nde e ta ńipe̱ mada ma buńa bwe̱se̱ ońola baboleye̱ o Bete̱l. Nik’e ta e bola ná tuṅ ya Bete̱l o Yapan i si ta i be̱ne̱ kicin ńa mbale̱. Nde tatan, baboleye̱ o Bete̱l mo̱me̱ne̱ nde ba mipe̱ dongo dinde̱ne̱ la nje ba madano̱. O pond’a mpo̱ngulan, ba boli ná tuṅ ya Bete̱l i be̱ne̱ kicin ni dongame̱n ná moto te̱ ipe̱ na bo̱bise̱ la ńolo. Munańango Kumiko nu maboleye̱ o Bete̱l a Yapan mo̱ ná: “Tatan na be̱nno̱ kicin, na masenga na mbame̱ne̱ ná ne nde ombo’am na mbale̱, nik’e mongwane̱ pe̱ mba o sue̱le̱ na mulema mwe̱se̱ mbad’a bola mambo ńa peńa o Bete̱l.”

 Ebolo e bolabe̱ o Bete̱l a Yapan ye mweńa jita ońola ebol’a dikalo o wase ńe̱se̱. (Mateo 28:19, 20) Bete̱l a Yapan ńe nde po̱ ná Bete̱l iba yena mo̱ nde i mabusise̱ Bibe̱l a mususu o mapapa. Dongo diwo̱ l’ebolo ye o bolane̱ oten le nde te̱se̱ la belongisan be madute̱ mbudu ma pepa na dibudu, o bwam ba tata ja la bwam la bonasango ba mabole̱ ebolo o wum’a busise̱ la kalati. Ná jande di te̱se̱ pe̱ be belongisan, nik’e no̱ngo̱ne̱ biso̱ be̱be̱ na 1 000 000 ma do̱lar; nde nika ńe mweńa ná mu mukanjo m’ebolo mu benge busise̱ na camane̱ kalati yena i mongwane̱ o jouse̱ dube̱ lasu, sepo̱n Bibe̱l.

 Bonasango bombwedi ná Bibe̱l i benge busisabe̱ niponda ebolo e tano̱ e bolane̱. Trey ńena ńe elong’a dibe̱le̱ la mukanjo m’ebolo ma Yapan e tele̱ye̱ ná: “Niponda be bebolo ba longa be tano̱ be bolabe̱, muso̱ngi ma Bibe̱l bebokedi basu be mabusise̱no̱ mu bati, bato jita pe̱ ba ta ba be̱ne̱ ńo̱ng’a Bibe̱l o wase ńe̱se̱. O̱fis jita i ta yangame̱n bola ebolo mwemba o te̱se̱ mambo bwambwam ńai kalati i mabengano̱ busisabe̱ nde belongisan ba peńa pe̱ be te̱se̱be̱.” To̱ na mi mitakisan, di ta di busise̱ lambo ka 220 000 ba Bibe̱l mo̱di te̱ oteten a So̱ṅe̱ na Dingindi 2023, ńena ni ta nde pambo a ponda dongo l’ebolo dinde̱ne̱ di tano̱ di bolabe̱ o wum’a busise̱ la kalati. Y’ebolo ye̱se̱ e bolane̱ pe̱ esibe̱ baise̱ mo̱ni ma mbata.

 Lambo la mweńa dipe̱pe̱ di mombweano̱ ke̱ di mapo̱ngulane̱ milongi masu le nde ne̱ni bola ná di si busise̱ pe̱ mo̱ni jita ońola kuran. Belongisan ba peńa be madute̱ ngiń’a wei bena di me̱nde̱no̱ te̱se̱, be me̱nde̱ bola ná di po̱nge ekoted’a lambo ka 120 000 do̱lar. Di me̱nde̱ pe̱ te̱se̱ winda i be̱n me̱ne̱ malalo, i mongwane̱ ná di si bolane̱ pe̱ kuran jita; nik’e me̱nde̱ bola ná di po̱nge ekotedi ya lambo ka 10 000 do̱lar mbu te̱. To̱ná be belongisan beno̱ diye̱ jita, miso̱ngi mi po̱ngo̱be̱ mi malee̱ ná be me̱nde̱ jongwane̱ biso̱ o po̱ngo̱ ekotedi ya buka 3 500 000 do̱lar o pambo a ponda ńe̱se̱ di me̱nde̱no̱ bolane̱ mo̱. Be me̱nde̱ pe̱ bola ná milongi masu mi si takise̱ epolo e dinge̱le̱ mo̱.

 Bebolo be bolabe̱ o mi mikanjo m’ebolo miba be malee̱ ná e mapula ebolo ende̱ne̱ ná Bete̱l yasu i be̱ ńai yeno̱ ná i benga londise̱ ńo̱ng’a mōnda ma dikalo. Nde, ebolo e si bedi bo̱. Aaron nu mabole̱ ebolo na o̱fis ni mombweye̱ ebol’a longa o wase ńe̱se̱ (WDC) mo̱ ná: “Bonasango ba boli ebolo ende̱ne̱, nde ebolo e dia te̱ nde jita.” Ne̱ni di me̱nde̱no̱ we̱le̱ o bola mo̱ e? Alo oboso na kwala ná: “O sumo te̱ mabea ma wonja ma mongwane̱ ná di kuse mo̱ni ońola be bebolo ba mweńa, di mabwa pe̱ muńe̱nge̱ jita ná bonasango na bonańango bemedi o sue̱le̱ be bebolo, bape̱pe̱ pe̱ be o wana mawengisan ná ba be̱ ńai beno̱ ná ba sue̱le̱ bebolo be maye̱. Jongwane̱ bonasango asu ba mawanano̱ e be̱ na mabe̱ne̱ mabu to̱ ngud’abu di malee̱ ná bwē ná Yehova a manamse̱ y’ebolo.”​—Myenge 110:3.

 Bebolo basu ba longa be̱se̱ na ba po̱ngulane̱ la milongi masu be masuabe̱le̱ nde na mabea ma wonja, mena jita lao di mabolabe̱ nde tongwea na donate.pr418.com. Di masoma bińo̱ jita ońola sanga lańu la mulema dinde̱ne̱.