“Na to̱ndi ndabo am ńa Janea,” nika nde Nicole eso̱mb’a munańango ya Ko̱lo̱mbia e kwalino̱. “Ńe nde epolo biso̱ na mbia mam ma mudī di madongame̱ne̱no̱.” Mo̱ mulemlem ma basengedi nde wa pe̱ o be̱nno̱ e?

 O wase ńe̱se̱, Mboṅ a Yehova i be̱n ko̱lo̱ngo̱ne̱ o ko̱to̱me̱ ońola ndongame̱n o lambo ka 63 000 la mandabo ma Janea. Ma mandabo ma titi buka te̱ bepolo ba bwam owe̱ni di mowe̱no̱ Loba. Munasango mō̱ nu mabelabe̱ ná David ńe paonia o Ko̱lo̱mbia mo̱ ná: “Mandabo masu ma Janea ma mabata bola bato ńo̱ng’a senga mwe̱ndi masu. Bato jita di mabele̱no̱ o ndongame̱n ba mabe̱ ba ńaka jita ke̱ ba po̱i nde be̱ne̱ nate̱na o njika dikala di masabangane̱no̱ mo̱ bwam.” Nde nik’e mabaise̱ ebolo jita. Di mabola ebolo na ngińa o sangise̱ na o sabangane̱ mandabo masu ma Janea. Ne̱ni di mawe̱le̱no̱ bola nika e?

 Myemba mena mi mabolane̱ ndabo a Janea nde mi be̱n mboṅ a sabangane̱ mo̱. Ońola nika, bonasango na bonańango ba masangise̱ ndabo abu ńa Janea ponda ye̱se̱. Ba mabe̱ pe̱ ba po̱ngulane̱ ngus’a mambo yena i ńam oten.

 Ná bongwane̱ bonasango na bonańango o sabangane̱ ndabo abu ńa Janea, o̱fis ni mombweye̱ ebol’a longa o mukanjo m’ebolo te̱ (LDC), e mapo̱so̱ bonasango bō̱ ná ba longe belongi ba myemba ońola ebol’a sabangane̱ la milongi. Mō̱ ńabu te̱ a mombwea lambo ka mandabo ma Janea mutoba to̱ dom. A mayo̱mbo̱ so̱ o ma mandabo ma Janea o bwam ba longa bate̱ dikalo ná ba bie sabangane̱ ndabo abu ńa ndongame̱n. Ombusa mbu milalo te̱, a mano̱ngo̱ ponda o jombwea epolo te̱ ná a bie nga mambo me oten bangame̱nno̱ po̱ngulane̱ to̱ mena me ná ma wana mbeu a ńolo.

 Bonasango na bonańango ba mabwane̱ belongedi ba makusane̱no̱ ba bonasango muńe̱nge̱. Munańango Indhumathi nu maje̱ o India mo̱ ná: “Belongedi be ta bwam jita. Na ta muńe̱nge̱ jita o jokwa ne̱ni kombe̱ ndabo asu ńa Janea o mbad’a bwam.” Evans, munasango mō̱ ńa Kenya mo̱ ná: “Joko ná po̱ngulane̱ la ngus’a mambo o mulopo ma jese̱le̱ ná ma timbe mitakisan minde̱ne, di mongwane̱ o po̱ngo̱ ekotedi ende̱ne̱.”

 Bupisane̱ wuma ndabo a Janea te̱ e te̱mno̱, mimbu mao na muso̱ngi ma myemba mi mabolane̱ mo̱, ye ná e pula lambo ka bebwea ba do̱lar to̱ nate̱na lokoli la do̱lar a mbu te̱, o bongwa na o sabangane̱ mo̱. Owe̱ni mu mo̱ni mu mawano̱ e?

 Mo̱ni mu mapule̱ o sabangane̱ ndabo a Janea mu mawa nde o mabea ma wonja. Munasango Alexander nu maje̱ o Kazakhstan a matele̱ye̱ ná: “Di mabolane̱ mu mo̱ni o sawa inte̱rne̱t na mambo ma mweńa mape̱pe̱ ka madiba na mwaye. Oten pe̱ nde di mano̱ngo̱no̱ mo̱ni o janda mambo ma mweńa mape̱pe̱ ka pep’a ndabo a mbusa, gaṅ, na mambo ma mapule̱ ońola bosangi.” O ma mabea ma wonja pe̱ nde mo̱ni mu mano̱ngo̱be̱no̱ o lomabe̱ o sue̱le̱ ebolo o wase ńe̱se̱, na o jongwane̱ bebolo bende̱ne̱ ba sabangane̱ milongi ma bebokedi o wase ńe̱se̱.

 Yete̱na mo̱ni mu mapule̱ o sabangane̱ ndabo a Janea mu buki nje myemba mi yo̱kino̱ busise̱ ońol’ao o pambo a ponda ńa myo̱di miba to̱ milalo, batudu ba mabīse̱ munasango ńa LDC nu be̱n mboṅ a belongedi o ni ndabo a Janea nika. Yete̱na LDC e boli wonja ná y’ebolo e bolane̱, mo̱ni mu mapule̱ mu mabe̱ nde mu no̱ngo̱be̱ o mabea ma wonja ońola ebolo o wase ńe̱se̱. O mbu m’ebolo ma 2023, di boli 8 793 ba bebolo ka ben, di busise̱ pe̱ 76 600 000 ma do̱lar ońol’ao. Jombweye ben byembilan beba be mabupe̱.

 O Angola, ndabo a Janea po̱ ńena ni ta ni mábe̱ne̱ 15 la mbu e ta e be̱ne̱ mambo jita ba tano̱ bangame̱n po̱ngulane̱. E ta e pula ná ba tukwe misinga ma kuran me̱se̱, bedima be ta be mábe̱ne̱ m’bando, baje̱ o mbasan pe̱ ba ta ba to̱kisane̱ ná madiba ma makomea ombo’abu. LDC e te̱se̱ so̱ ná ebolo e bolabe̱ o bwam ba po̱ngulane̱ ma mambo me̱se̱. Mo̱ni mu busi ońola nika mu ta 9 285 la do̱lar. Baje̱ o mbasan ba timbise̱le̱ biso̱ masoma, ba ńaki pe̱ o je̱ne̱ mbad’a bwam ebolo e bolabe̱no̱.

 O Poland, muńua ma ndabo a Janea po̱ mu ta mu to̱, tapis ni ta o wase pe̱ e ta e máńama ná bambam. LDC e boli wonja ná ba po̱ngulane̱ muńua na belongisan be meke̱ ná mu si to̱ pe̱, ba we̱le̱ pe̱ tapis ńa peńa o wase. Mo̱ni mu busi ońola nika mu ta 9 757 la do̱lar. Ni ndabo a Janea e me̱nde̱ ja mimbu jita esibe̱ be̱ne̱ ńo̱ng’a ebolo ende̱ne̱ to̱ ewo̱.

 Ebol’a sabangane̱ milongi e si mongwane̱ buka te̱ o bolane̱ mabea ma wonja bwam, e mabola pe̱ ná Yehova a sesabe̱. Munasango Shaun nu maje̱ o epolo e mabelabe̱ ná Tonga mo̱ ná: “Nika di masabangane̱no̱ ndabo asu ńa Janea, je ná jowe̱ Yehova o epolo e sangi, ye ne̱te̱, na e mabole̱ ná bato ba mundi ba kwale mambo ma bwam ońola dina lao. Je muńe̱nge̱ o bele̱ bato o ndabo asu ńa Janea.”

 Biso̱ be̱se̱ je ná jongwane̱ o sangise̱ na o sabangane̱ epol’asu ya jowe̱. Munasango Marino nu mabole̱ belongedi ońola ebol’a sabangane̱ o Ostralia mo̱ ná: “Biso̱ be̱se̱ je ná di be̱ne̱ edube ya no̱ngo̱ dongo o ebol’a sabangane̱ la mandabo masu ma Janea. Na nika, di mongwane̱ bebokedi o po̱ngo̱ ekotedi ende̱ne̱ na o bolane̱ mo̱ni ma mabea ma wonja owe̱ni ńo̱ngi ńeno̱ na mbale̱.”

 Munasango Joel ńa India a to̱ndi no̱ngo̱ dongo o ebol’a sabangane̱ la ndabo ao ńa Janea. Mo̱ ná: “Bola l’ebolo na bonasango am di mongwane̱ mba o dutea ne̱ni was’a peńa e me̱nde̱no̱ be̱.” Nicole ńena di máse̱le̱no̱ kwalea mo̱ ná: “Ye ponda to̱ ininga ke̱ bonasango be o po̱ngulane̱ muńua ma ndabo a mbusa, mba na ta nde na tuta madiba ma ta o wase. Ye mbale̱, seto̱ mba nde na po̱ngulane̱ nje e ta e ńama, nde nje na bolino̱ yongwane̱ ná to̱ moto a si kusa sese.”

 Yete̱na o mapula no̱ngo̱ dongo o sabangane̱ ndabo ango̱ ńa Janea, langwea batudu ba mwemba mo̱ngo̱ nika. Mabea mo̱ngo̱ ma wonja pe̱ ma masue̱le̱ ebol’a sabangane̱ ndabo ango̱ ńa Janea, name̱ne̱ pe̱ na mandabo ma Janea mape̱pe̱ o wase ńe̱se̱. We ná o we̱le̱ jabea lo̱ngo̱ o bekwe̱m ońola mabea ma wonja o ndabo ango̱ ńa Janea to̱ bola mo̱ tongwea na donate.pr418.com. Di masoma wa jita ońola sanga lo̱ngo̱ la mulema.