Lambo diwo̱ Mboṅ a Yehova ye̱se̱ i tano̱ yenge̱le̱ na ńo̱ngi ninde̱ne̱ mun mbu le nde busisabe̱ la Dongo 1 la sinima Myango ma bwam jombwea Yesu. Lodun la bato lo máje̱ne̱ mo̱. Ni sinima ńe̱se̱ e me̱nde̱ pe̱ be̱ne̱ nate̱na 18 la mongo! Njik’ebolo bonasango na bonańango beno̱ bola ná ni sinima ńe̱se̱ e we̱le̱ busisabe̱ e, ne̱ni bińo̱ pe̱ lo sue̱le̱no̱ y’ebolo e?

 O mukanjo m’ebolo ma Ostralasia nde dongo dinde̱ne̱ la sinima Myango ma bwam di mokabe̱no̱. a Ponda te̱ son a dongo la ni sinima leno̱ jokabe̱, lambo ka 50 to̱ 80 ma bato be owan; babo̱ be̱se̱ bangame̱n pe̱ kusa da la idiba, la ko̱si na l’ebiamu, name̱ne̱ pe̱ na ngus’a mambo ipe̱pe̱. Mada mena ma mipabe̱ ma mapo̱so̱be̱ nde oboso ba ponda. Esther nu mabole̱ ebolo o o̱fis ni mombweye̱ da a mateleye̱ ná: “Di manda nje e mapule̱ biso̱ o sapi jita, ná di we̱le̱ kusa mada ma bwam o mususedi ma bwam. Ponda ye̱se̱ pe̱, di matukwa dime̱ne̱ la da di mipabe̱, ná da di si ńamsabe̱.” Da la moto mō̱ buńa te̱ di mano̱ngo̱ lambo ka do̱lar ine̱i.

 Nde seto̱ da buka te̱ nde di mapule̱ ekip asu, e mapula pe̱ babo̱ betatedi. Njika pat’a betatedi e? Wei i mabusa o Ostralia ponda ye̱se̱, nde mińa mō̱ miso̱nji ma wei mena me bobe ońola ja la bwam, mi yo̱ki ko̱ oten. O bwam ba tata bato be̱se̱ na ni ngiń’a wei, bonasango na bonańango ba mabola ebolo na ngińa o boṅsane̱ mino̱ko̱ na bepolo ba mulo̱lo̱ko̱; ba mabakise̱ pe̱ ná ba be̱n njoaso’a mo̱ki te̱nge̱ne̱ wei, mbuledi na madiba. Kevin ńa o̱fis a bosenga/sinima mo̱ ná: “Jita oteten a ba bonasango na bonańango be nde baboleye̱ o Bete̱l bena ba si maje̱ o Bete̱l. Ba mabola be bebolo be̱se̱ na bepe̱pe̱ na sibise̱ la ńolo dinde̱ne̱, na muńe̱nge̱ pe̱. Di si wusa we̱le̱ londise̱ yen ebolo esibe̱ jongwane̱ labu.”

 Ná mongo ma sinima mō̱ ma buse bwam, ma titi ná mokabe̱ oteten a mukanjo m’ebolo, jangame̱n nde wala duta mo̱ o bepolo bepe̱pe̱. Ońola mongo ma sinima jombwea longe̱ o pond’a kwaṅ mangame̱n nde jokabe̱ o bepolo be si be̱n misinga ma kuraṅ, goudron o mangea to̱ milongi ma nde̱ki minde̱ne̱, e mapula ná boke̱ sinima na ekip e madute̱ babo̱ bale nde o bepolo be po̱ti. Moto angame̱n be̱ nu maboṅsane̱ mbo̱t’abu ya sinima na mane̱ mambo, name̱ne̱ pe̱ na belongisan, nu malane̱ mo̱ wuma sinima e mokabe̱no̱ nde a kombe̱ pe̱ mo̱ ńai a bwam. Bonasango ba mombweye̱ ekip ba mabakise̱ ná ba be̱n grup ońola kuraṅ, madiba ma ńo̱, na bepolo bato beno̱ ná ba wumse̱. Boke̱ sinima na ekip e madute̱ babo̱ ba mabe̱ nde ba ja omboa Mboṅ a Yehova ye o mbasan, na o mitoa minde̱ne̱ ba po̱ngulane̱no̱ ka milongi, to̱ o hotel.

 Ponda sinima e mokabe̱no̱ o bepolo be po̱ti, nik’e mano̱ngo̱ mo̱ni na ponda jita, e mabatea pe̱ bato be̱se̱ ebolo ende̱ne̱. Ońola nika nde o mbu 2023 Dibe̱le̱ di Madie̱le̱ di bolino̱ wonja ná di busise̱ 2 500 000 la do̱lar o janda elongisan a tobotobo; nika ńe nde je̱ne̱ dinde̱ne̱ di malee̱ bedingedinge̱ na lena di mabole̱ ná ye̱ne̱ne̱ biana bato be nde o bepolo bepe̱pe̱. Di je̱ne̱ di malee̱ bedinge̱dinge̱ be ná pe̱ń, mwe̱ne̱n mao pe̱ mu mabola ná ye̱ne̱ne̱ biana boke̱ sinima be nde o ’boko na mbale̱. Na nika, di titi pe̱ eto̱m o wala joka sinima o bepolo be po̱ti. Darren ńe elong’a dibe̱le̱ la mukanjo m’ebolo ma Ostralasia mo̱ ná: “Bolane̱ la je̱ne̱ di malee̱ bedinge̱dinge̱ di mongwane̱ ná boke̱ sinima ba si tuse̱ ńolo jita, di mabola pe̱ ekip e madute̱ babo̱ epolo o timba duta mongo ma sinima mō̱ ngedi jita. K’eyembilan, yete̱na sinima ńe nde jokabe̱ o ’boko, ekip e be̱n nde ngus’a minuti buka te̱ ná e dute besibedi ba wei obiana be mańo̱ngo̱. Nde na je̱ne̱ di malee̱ bedinge̱dinge̱, je ná di timbise̱le̱ besibedi ba wei ngedi na ngedi natē̱ di we̱le̱ duta di dongo la sinima ka ne̱ni di mapulano̱.”

 Ońola dongo diwo̱ te̱ la sinima Myango ma bwam, e mapula bebwea ba bato ba moke̱ mo̱ na jita la bato bape̱pe̱ bena ba mongwane̱. Ne̱ni ba me̱ne̱no̱ miwe̱n me̱se̱ mi mapo̱ngo̱be̱ o bongwa babo̱ e?

 Amber ńena ńasumwe̱ ombo’ao o Melbourne ńe etum a buka 700 ba kilometa o po̱ sue̱le̱ y’ebolo, a tili ná: “Botea ná na tunge̱no̱ o aeroport, bonasango ba Bete̱l ba sabangane̱ mba bwam jita. Jita ba bele̱ mba o po̱ da na babo̱ to̱ o ńo̱ ti. O epolo sinima e mokabe̱no̱, be̱se̱ ba mabola ná na senge bwam ne̱ne̱ pe̱ ná ba to̱ndi mba. Din lo̱ndo̱ di wanedi mba minam jita. Na si bo̱lo̱ne̱ to̱ lambo!”

 Derek nu mabole̱ ebolo na ekip a sinima a kwali ná: “O̱fis jita ya Bete̱l i sue̱le̱ biso̱ botea ná y’ebolo e botedino̱. Na matimbise̱le̱ Loba masoma jita ná na dingabe̱le̱ na bonasango na bonańango bena ba boli pond’abu, mabe̱ne̱ mabu na ngud’abu ońola yen ebolo. Ba masue̱le̱ biso̱, be jemea, be pe̱ muyao. Ye̱ke̱i te̱ Yehova a namse̱ babo̱, na biso̱ pe̱. Ne mbaki ná a si mombwea buka te̱ ne̱ni y’ebolo e me̱nde̱no̱ be̱ o su, nde a mombwea pe̱ mbadi di mabolano̱ mo̱.”

 Di masoma bińo̱ ońolana lo sue̱le̱ busisabe̱ la ni sinima tongwea na mabea mańu ma wonja, name̱ne̱ pe̱ na ma mena ma mabolabe̱ tongwea na donate.pr418.com.