O Dimo̱di 2021, Dibe̱le̱ di Madie̱le̱ di bīse̱ busisabe̱ la elongisan a peńa ońola jokwa la Bibe̱l, Be̱ne̱ longe̱ le bonam o bwindea! a Ne̱ni o kasino̱ bo bobia e? Matthew ńa Kanada mo̱ ná: “Na ta muńe̱nge̱ kańena! Muńe̱nge̱ mam mu bati pe̱ nde kola ke̱ ne o jombwa bekwali na sinima bena ba tele̱ye̱ ońola nje ni kalati e busisabe̱no̱, na ne̱ni ba kekise̱no̱ mo̱ o mōnda. Na ta musunga o je̱ne̱ mo̱ na o botea bolane̱ mo̱.”

 Be̱ne̱ longe̱ le bonam o bwindea! e wan mbad’a peńa ńa tombise̱ mokwa ma Bibe̱l. Nde seto̱ nika buka te̱ nde e mawe̱le̱ ni kalati diwengisan na yine̱ kalat’a jokwa i se̱le̱. Yete̱na o mabolane̱ nde kalati Be̱ne̱ longe̱ le bonam o bwindea! ńa mapapa, yen ebe o maki ná ńe pe̱ diwengisan ke̱ o matapa mo̱. Ná di bie ońola nje, jombweye ne̱ni ni kalati e po̱ngo̱be̱no̱.

 Pepa ni dili. Ońola nje nika e tano̱ mweńa e? Be̱ne̱ longe̱ le bonam o bwindea! e be̱n buka 600 ba maduta ma be̱n miso̱no̱; nika ńe lambo ka dom la ngedi buka kalati Okwe̱le̱ biso̱! Ni kalat’a peńa e be̱n pe̱ jita la bepolo bena be si be̱n matila to̱ maduta. Man mambo maba me ná ma takise̱, ońolana pepa e wam te̱ maduta me ná me̱ne̱ne̱ o nine̱ mbus’a dipapa. Ná ba sambe mi mitakisan, bonasango ba O̱fis ni mombweye̱ mandabo ma druk (IPD), ńe o Wallkill o Ńu Yo̱rk o Amerika, ba kekise̱ pat’a pepa ine̱i di mabolane̱no̱ o mandabo masu ma druk. Epep’a Betiledi ya Dibe̱le̱ di Madie̱le̱ yombwedi pat’a pepa te̱ ba bolane̱no̱, nde e po̱so̱ ni ni dili buka yine̱. To̱ná mususedi ma ni pepa mu bukino̱ ma ni di mabolane̱no̱ ońola jita lasu la kalati 16%, ni pepa e mongwane̱ bokwe̱ Bibe̱l o langa dipapa te̱ la Be̱ne̱ longe̱ le bonam o bwindea! esibe̱ ná maduta me o nine̱ mbusa ma takise̱ babo̱.

 Ngutu ńe diwengisan. Ngut’a ni kalat’a peńa ńe diwengisan na ya yine̱ kalat’asu ke̱ o matapa mo̱, ebanja ba kudumane̱ mo̱ na ekai ye diwengisan. Diwengisan na ekai e maso̱nje̱ di ko̱lo̱ngo̱nno̱ bolane̱, ni kalat’a peńa e be̱n nde ekai e si maso̱nje̱, yena e mabole̱ ná duta la ngut’a kalati le̱ne̱ne̱ bwam. Y’ekai e mongwane̱ pe̱ ná kalati e si pomane̱ duna. Nde mususedi ma ekai e si maso̱nje̱ mwe ná mu buka mu ma ekai e maso̱nje̱ lambo ka ngedi itanu. Mikanjo m’ebolo jita mi boli so̱ ebolo mwemba ná mi kuse mo̱ o mususedi mu sibi.

 Ońola nje di po̱sino̱ o bolane̱ ben belongisan be diye̱ e? Munasango mō̱ nu mabole̱ ebolo o IPD a tele̱ye̱ ná: “Di mo̱nge̱le̱ ná bato ba me̱nde̱ bolane̱ ni kalati jita, di mapula so̱ ná e benge je̱ne̱ne̱ bwam to̱ ba bolane̱ nde mo̱ jita la ngedi.” Eduardo nu mabole̱ ebolo o ndabo a druk ńa mukanjo m’ebolo ma Bresil a kwali ná: “Je muńe̱nge̱ jita o je̱ne̱ ná bebokedi ba Yehova be bolane̱ belongisan ba bwam o busise̱ nin kalati ńe mpesa, ni minde̱, ni do̱li pe̱ o tapa, nde be bolane̱ pe̱ mabea ma wonja o mbad’a bwam.”

 Di botedi nde busise̱ kalati Be̱ne̱ longe̱ le bonam o bwindea! o mapapa o mo̱di ma So̱ṅe̱ 2021. Nik’e ta nde o pond’a diboa la COVID-19, lena di wan mitakisan jita. Kana Bete̱l i tano̱ i dibangane̱, mandabo masu ma druk ma si wusa pe̱ kusa jongwane̱ la bate̱ mpuli to̱ no̱ngo̱ baboledi ba Bete̱l ba peńa. Nik’e boli ná mandabo ma druk mō̱ ma si ta pe̱ ma be̱ne̱ baboledi ndongo, mape̱pe̱ pe̱ ma ta ma kwesame̱ ońola son a ponda bupisane̱ mambenda ma go̱bina.

 Ne̱ni di we̱lino̱ buka mi mitakisan e? Ponda mandabo ma druk ma telame̱no̱ pe̱te̱, bonasango na bonańango ba o̱fis ipe̱pe̱ ya Bete̱l ba lomabe̱ o wala jongwane̱ oten. Joel nu mabole̱ ebolo o IPD mo̱ ná: “Ko̱d’abu na ńo̱ng’abu ńa jokwa bebolo ba peńa bongwane̱ jita ná y’ebolo e bolane̱.”

 To̱ na mi mitakisan, di mábusise̱ lodun la kalati Be̱ne̱ longe̱ le bonam o bwindea! Po̱ngo̱ la yi kalati di mabaise̱ ńai na ńai a belongisan ka bebambu be matombe̱le̱ matila na maduta, ekai, pepa, tinte na kol. Ombusa myo̱di mitanu m’ebolo, di busise̱ buka 2 300 000 la do̱lar ńa Amerika o janda la belongisan buka te̱. Ná di si ńamse̱ mo̱ni, di no̱ngi jangame̱ye̱ ná di busise̱ nde muso̱ngi ma kalati myemba mi be̱nno̱ ńo̱ngi na mbale̱.

 Nje batombise̱ mokwa ma Bibe̱l na bokwe̱ Bibe̱l na babo̱ ba mo̱nge̱le̱no̱ jombwea y’elongisan a peńa ońola jokwa la Bibe̱l e? Paul, munasango mō̱ ńa Ostralia mo̱ ná: “Be̱ne̱ longe̱ le bonam o bwindea! e mabwesane̱ muńe̱nge̱ kańena na ta musunga o tombise̱ mokwa ma Bibe̱l oten. Mbadi ni kalati e longedino̱ e mabola moto ńo̱ng’a langa mo̱ na ńa bola jo̱nge̱le̱ lao. E be̱n belēdi be ná se̱ṅse̱ṅ, myuedi mi matute̱le̱ moto o bola jo̱nge̱le̱ lao, sinima, maduta, bebambu, na mambo mokwe̱ Bibe̱l angame̱nno̱ bola, bena ba latabe̱ o mbad’a bwam. Ni kalati ńe nde ebol’a wedi yena e matute̱le̱ mba o po̱ngulane̱ mbad’am ńa lee̱.”

 Mokwe̱ Bibe̱l mō̱ ńa Amerika a kwali ná: “Na to̱ndi ni kalat’a peńa jita. Maduta ma mongwane̱ mba o so̱ṅtane̱ mato̱ti ma mweńa. Sinima i matapa mulema mam, i matute̱le̱ pe̱ mba o ebolo.” Nu mokwe̱ Bibe̱l a mokwa ngedi iba woki te̱, a mukea pe̱ o ndongame̱n ponda ye̱se̱.

 Jangame̱n pe̱te̱ busise̱ lodun la kalati Be̱ne̱ longe̱ le bonam o bwindea! O mapapa, o leme̱ jita. Dibe̱le̱ di Madie̱le̱ di mábola wonja ná ni kalati e busisabe̱ o 710 ba leme̱, nik’e petane̱ kalati Okwe̱le̱ biso̱ na 340 ba leme̱!

 Owe̱ni mo̱ni ma busise̱ ni kalati mu mawano̱ e? Mu mawa nde o mabea ma wonja ońol’ebolo o wase ńe̱se̱, mena jita lao di mabolabe̱ nde tongwea na donate.pr418.com. Di masoma bińo̱ ońola sanga lańu la mulema, lena di mongwane̱ biso̱ o busise̱ belongisan ońola jokwa la Bibe̱l ońola ba bena ba mapule̱ o jokwa bia Yehova, na o “kusa munam bebe be̱se̱.”—Myenge 22:27.