Ninka mbu ma 2023 mweno̱ botea, di pite̱ ná mambo ma bwam ma me̱nde̱ po̱ye̱ biso̱ na mbia masu. Ońola nje jeno̱ ná di pite̱ kie̱le̱ ni maye̱ ńa bwam e?

 Bibe̱l e be̱n myango ma bwam, mi makwale̱ ná mitakisan di malembe̱no̱ we̱nge̱ me nde ma ponda po̱ te̱nge̱, na ná mi me̱nde̱ bo̱ son a ponda. Bibe̱l e “tilabe̱ nde o lee̱ biso̱ ná ońola . . . lo̱ko̱mea la betiledi di be̱ne̱ dipita.”—Roma 15:4.

•   Ná o bate bia mambo jombwea makaki ma Bibe̱l, langa mulopo m’ekwali “Dipita la mbale̱ ońola kie̱le̱ ni maye̱ ńa bwam.”

 Dipita lena Bibe̱l e mabolano̱ le nde “biso̱ ka diyo.” (Bonahebe̱r 6:19) Di dipita di mabola ná di si ponga. Di mongwane̱ biso̱ o lembe̱ mitakisan di be̱nno̱ we̱nge̱, o panga mo̱nge̱le̱ ma bobe, na o be̱ mbo̱le̱ na mbale̱. K’eyembilan:

•   E̱ne̱ ne̱ni dipita la Bibe̱l longwane̱no̱ moto mō̱ o bo̱le̱ ede̱mo a bobe ewo̱. Ombwa sinima Je ne supportais plus ma façon de vivre.

•   E̱ne̱ ne̱ni dipita la Bibe̱l leno̱ ná longwane̱ biso̱ ke̱ di bo̱lo̱ne̱ ńandolo. Ombwa sinima Lo̱ko̱mea ońola ba bena ba wese̱.

 Bato jita ba pite̱ ná mambo ma bwam ma me̱nde̱ po̱ye̱ babo̱, nde ba titi mbaki na nika. Mambo mena Bibe̱l e kakanno̱ me diwengisan. Ońola nje e? Ońolana makaki ma Bibe̱l ma mawa nde na Yehova Loba a mo̱me̱ne̱, “nu si mato̱pe̱ lobango.” (Tito 1:2) Yehova mo̱me̱ne̱ mō̱ nde a be̱n ngińa o londe̱ makaki mao; e ná a bola “to̱ nje a to̱ndino̱.”—Myenge 135:5, 6.

 Di mabele̱ wa o tombwane̱ dipita la mbaki lena Bibe̱l e mabolano̱. We ná o longa dube̱ lo̱ngo̱, yete̱na o ‘wasi betiledi.” (Bebolo 17:11) Ná wame̱ne̱ o bole nika, keka botea jokwa la Bibe̱l na biso̱ esibe̱ sawa. Botea mbu 2023 na dipita ońola kie̱le̱ ni maye̱!