Bupisane̱ Organisation Mondial de la santé (OMS), nika ńe nde Bebokedi be mombweye̱ ja la bwam o wase ńe̱se̱, nate̱na o 23 má Emiase̱le̱ 2022, COVID e ta e mábwa be̱be̱ na lodun la bato 6 n’epasi. Nde o bobia bō̱ bo busi o ńuspepa o 5 má Emiase̱le̱ 2022, OMS e kwali ná muso̱ngi ma ba bena ba wedi mu buki bo bolangi nate̱na o ’yidi. E kwali ná oteten a 2020 na 2021, “muso̱ngi ma bato COVID e bono̱ o nin mbadi to̱ nine̱ mwe be̱be̱ na 15 la lodun.” Mo̱ Bibe̱l e makwala lambo jombwea yi ńai a ndutu inde̱ne̱ e?

•    Yesu a ta a bīse̱ ná maboa ma bobe, to̱ maboa ma ngińa ma malańe̱ ma me̱nde̱ be̱, o pond’a “mińa misukan.”—Lukas 21:11, 2 Timoteo 3:1.

 Eding’a Yesu ye o londa nin we̱nge̱. Ná o bate so̱ṅtane̱, langa mulopo m’ekwali “Nje ye eyemban a ‘mińa misukan,’ to̱ ‘pond’a sukan’ e?“

•    “Loba la lo̱ko̱mea le̱se̱, nu malo̱ko̱me̱ye̱ biso̱ o ndut’asu ye̱se̱.”—2 Korinto 1:3, 4.

 Mwe̱ndi ma Bibe̱l mu wanedi jita bena ba bo̱lo̱ne̱ ńandolo lo̱ko̱mea. Ná o bate bia, langa milopo ma bekwali “Comment revivre: ce que vous pouvez faire“ na “Une aide incomparable.“

•    “Janea lo̱ngo̱ di ye. Jemea lo̱ngo̱ di bolabe̱ o wase kana o mo̱ń.”—Mateo 6:10.

 Son a ponda “janea la Loba” di me̱nde̱ bola ná “To̱ moto a si me̱nde̱ pe̱ kwala na: Na si jai bwam.” (Marko 1:14, 15; Yesaya 33:24) Ná o bate so̱ṅtane̱ ońola di janea la mo̱ń na nje di me̱nde̱no̱ bola, ombwa sinima Janea la Loba le nde nje e?

 Di mome̱le̱ wa ná o bate jokwa bia nje Bibe̱l e makwalano̱ ná wa na mbia mo̱ngo̱ lo tombwane̱ malea mao ma dibie̱ name̱ne̱ pe̱ na makaki mao ma betańsedi.