Eti, 20 ma Tinini 2022, ndongame̱n ninde̱ne̱ po̱ ńena ni jai mińa jita ba bele̱no̱ ná COP27, e po̱i o su. Manea na bamabie̱ ba nin wase bena bukedi o ni ndongame̱n bemedi ná mo̱ni mu bolabe̱ bekombo be tue, o bwam ba jongwane̱ babo̱ o lembe̱ mbeu a ńolo yena betukwedi ba klima be wanno̱. Nde jita labu bembi ná nik’e si me̱nde̱ jeka ná klima e benge tukwa.

•   O 19 ma Tinini 2022, António Guterres, mutiledi ńa ONU mo̱ ná: “Bedomsedi di no̱ngino̱, ba busise̱ mo̱ni o jongwane̱ ba bena betukwedi ba klima be matakise̱no̱, be mabwese̱ mba muńe̱nge̱ jita. Nde mbale̱ ńe nde ná nik’e si dongame̱n . . . Ngo̱nd’asu e dia te̱ nde o bete̱medi ba bobe.”

•   O 20 ma Tinini 2022, Mary Robinson, ńena nu ta nde Ńango a Ekombo o Ireland, na mombwed’a wonj’a bato o ONU, a kwali ná: “Mbeu a ńolo i mawe̱ na betukwedi ba klima i si bo̱i.”

 Beso̱mbe̱ tobotobo be mataka ońola kie̱le̱ ni maye̱ ńa ngo̱nd’asu. Nde matumba me so̱ ná ma bola ebolo mwemba o bwam ba londe̱ kakane̱ labu la jeka mbeu a ńolo betukwedi ba klima be mawanano̱ e? Nje Bibe̱l e makwalano̱ e?

 Bibe̱l e makwala ná to̱ na miwe̱n me̱se̱ mi me̱nde̱ po̱ngo̱be̱, nje ye̱se̱ yena matumba ma me̱nde̱no̱ we̱le̱ bola e si me̱nde̱ dongame̱ne̱. Njo̱m iba yin:

•   “Nje e pengam e titi ná e te̱se̱be̱ na sim.”—Mulangwedi 1:15.

   Beteledi: Manea ma be̱n nde myoyo ońolana bato ba benama ba si wekabe̱ o die̱le̱ babo̱me̱ne̱. (Yeremia 10:23) To̱ matumba ma lata nde, e be̱ to̱ njika miwe̱n ma me̱nde̱no̱ po̱ngo̱, ma si me̱nde̱ te̱ nde we̱le̱ bo̱le̱ mitakisan me o nin wase.

•   “Ebanja bato ba me̱nde̱ be̱ bato̱nde̱ babo̱ mo̱me̱ne̱, bato̱nde̱ mo̱ni, . . . ba si to̱ndi do̱lisane̱.”—2 Timoteo 3:2, 3.

   Beteledi: Bibe̱l e bīse̱ ná o mińa masu, jita la bato ba me̱nde̱ be̱ mukubo, na ná ba si me̱nde̱ pe̱ to̱ pula bola mambo ońola bwam ba bato be̱se̱.

 Kie̱le̱ ni maye̱ ńa ngo̱nd’asu e si nanga omo̱ń a makaki ma manea ma bato ba benama. Loba a po̱si Mudied’a wase ńangame̱n, ńe nde Yesu Kristo. Bibe̱l e makwala jombwea mo̱ ná:

•   “Janea di me̱nde̱ be̱ o makata mao, ba me̱nde̱ bele̱ mo̱ ná Mot’a myano ńa mańaka, Loba la ngum, Tete̱ ńa bwindea, Mwaned’a musango.”—Yesaya 9:5.

 Yesu nde e Kiṅ’a Janea la Loba, to̱ Janea la mo̱ń. (Mateo 6:10) A be̱n ngińa, dibie̱, na ńo̱ngi o jombwea ngo̱nd’asu na baje̱ oten. (Myenge 72:12, 16) Owas’a bediedi bao, di janea di me̱nde̱ ńamse̱ be̱se̱ bena “ba mańamse̱ wase” na bo̱lise̱ ngo̱nde̱.—Bebīsedi 11:18; Yesaya 35:1, 7.

 Ná o bate jokwa mambo mape̱pe̱ jombwea ne̱ni mitakisan ma klima mi me̱nde̱no̱ bo̱, langa mulopo m’ekwali “Les changements climatiques et notre avenir—qu’en dit la Bible ?”