Mibia mi londi na mambo ka byala ba bosinga, ebwan e tutabe̱le̱ na ndando, njo te̱nge̱ne̱ bato ba matumba mape̱pe̱, na bila.

•   “O nin we̱nge̱, o njo̱m a bila oteten a Israel na Gasa name̱ne̱ pe̱ na bato ba masue̱le̱ njo na bosinga, di masenga byala ba bosinga jita o mibia.”—Ńuspepa The New York Times ńa 15 ma Tinini 2023.

•   “Botea mińa 7 ma Maye̱se̱, o wase ńe̱se̱ bosinga, byala ba bosinga na ebwan, ba bati lańa o dikala di si ta di máje̱ne̱ne̱.”—Dennis Francis, dikonge̱ la ndongame̱n a tobotobo ńa Matumba ma lati, 3 ma Tinini 2023.

 Byala ba bosinga, njo na bila, ba titi mambo ma peńa. Bibe̱l e makwalea ońola bato bō̱ ba pond’a kwaṅ bena ba ta ‘bangwa byala ba njongi biana nke̱ti,’ na bena ba ta ba to̱ndo̱ bila na njo. (Myenge 64:4; 120:7; 140:2) Nde Bibe̱l e malee̱ ná bosinga di me̱ne̱no̱ o nin we̱nge̱ bo be̱n njo̱m a tobotobo.

 Bibe̱l e mabola njo̱m iba ońola nje bosinga bo lańno̱ ninka o nin we̱nge̱.

1.  1. E ta e bīse̱ pambo a ponda ńena ‘ndol’a bajita e me̱nde̱no̱ wo̱ye̱.’ (Mateo 24:12) O mulopo ma lee̱le̱ ndolo, bato jita ba me̱nde̱ nde be̱ne̱ bedangwedi be mawane̱ bosinga.—2 Timoteo 3:1-5.

2.  2. Bosinga ba jita bwe o nin we̱nge̱ bo mawa nde na ngiń’a bobe ńa Satan Diabolo. Bibe̱l e makwala ná ‘wase ńe̱se̱ ńe nde owas’a ngiń’a ńabobe.’—1 Yohane 5:19; Bebīsedi 12:9, 12.

 Nde Bibe̱l e malee̱ pe̱ ná son a ponda Loba a me̱nde̱ bo̱le̱ nje ye̱se̱ ye njo̱m a bosinga. Omo̱ń a nika pe̱, a me̱nde̱ bo̱le̱ take ńe̱se̱ bosinga bo wanno̱. Bibe̱l e makakane̱ ná:

•   Loba a “me̱nde̱ tuta miso̱di me̱se̱ o miso̱ mabu; kwedi e si me̱nde̱ pe̱ be̱, male̱bo to̱ musea to sese ba si me̱nde̱ pe̱ be̱; ebanja mambo maboso ma mátomba.”—Bebīsedi 21:4.