Rusia e botedi so̱lo̱ne̱ sonj’ao ya bila o Ukre̱n o 24 ma Ngo̱nde̱ 2022. Nika e wan mpungu munde̱ne̱ e tute̱le̱ pe̱ lodun la bato o pomane̱ ńa mīla. a

 “Ko̱s’a dibumbe i ta yangwabe̱. Nika e ta e bwesane̱ bo̱ngo̱ kańena ye ndutu jita o teleye̱ nika na byala. Di sengino̱ ná ba me̱nde̱ busise̱ bato tongwea na masin ma ndio, di domse̱ nde o wala. Di ta jangame̱n jese̱le̱ bema basu ombusa, nje ye̱se̱ e ta e pula biso̱ e ta nde yangame̱n koka o son a mukuta. Di wusa so̱ nde no̱ngo̱ buka te̱ mapapa masu ma mweńa, myanga, madiba na bewolo. Jese̱le̱ mane̱ mambo me̱se̱, jala o wum’a no̱ngo̱ la masin ma ndio to̱ na ko̱s’a dibumbe yena i ta yangwabe̱.”—Nataliia, o Kharkiv, Ukre̱n.

 “Nate̱na o ponda nisukan, di si ta jo̱nge̱le̱ ná bila be me̱nde̱ be̱. Na sengi mumban ma ko̱s’a dibumbe o bepolo bō̱ o mundi, wind’a milongi pe̱ i ta i soa. Na domse̱ so̱ o wala na buka te̱ nje e ta mba mweńa na mbale̱. Nasumwe̱ nde o mboa 8:00 ya idiba, na no̱ngo̱ masin ma ndio o wala o Lviv denge̱ bus o wala o Poland.”—Nadija, o Kharkiv, Ukre̱n.

O nin tema

•  Nje ye mom ma njo̱m mu matute̱le̱ bato o wasa diwutamea e?

•  Owe̱ni bawase̱ diwutamea beno̱ ná ba so̱ dipita e?

•  Mo̱ Bibe̱l ńe ná ńongwane̱ bawase̱ diwutamea we̱nge̱ e?

 Nje ye mom ma njo̱m mu matute̱le̱ bato o wasa diwutamea e?

 Ponda Rusia e so̱lo̱ne̱no̱ sonj’ao ya bila o Ukre̱n nde bato ba botedino̱ wasa diwutamea. Nde, Bibe̱l e mabola njo̱m inde̱ne̱ ipe̱pe̱ i matute̱le̱ bato o wasa diwutamea:

•   Manea ma bato o wase ńe̱se̱ ma si we̱li bola bato nje e mapule̱ babo̱. Ponda iwo̱ ba ba madie̱le̱ ba mabolane̱ nde doi ba be̱nno̱ o banda bane̱.—Mulangwedi 4:1; 8:9.

•   Satan Diabolo, “mwaned’a wase,” a be̱n ngińa omo̱ń a mbel’a moto kańena Bibe̱l e makwala ná: “Wase ńe̱se̱ ńe owas’a ngiń’a bobe.”—Yohane 14:30; 1 Yohane 5:19.

•   O sumo te̱ mitakisan mbel’a moto e be̱nno̱ ye we̱nge̱ bebwea ba mimbu, tatan je nde o pambo a ponda Bibe̱l e bīse̱no̱ ná: “O mińa misukan pond’a bobe e me̱nde̱ po̱.” (2 Timoteo 3:1) Nje e me̱nde̱ je̱ne̱ne̱ o ni ponda ye nde bila, mbeu a ńolo y’epańpań, si be̱ne̱ la da ndongo, na maboa—mambo ma matute̱le̱ bato o ńa mīla.—Lukas 21:10, 11.

  Owe̱ni bawase̱ diwutamea beno̱ ná ba so̱ dipita e?

 Bibe̱l e malee̱ ná Muweked’asu, Yehova, b e nde Loba la ndolo lena di mabweye̱ bawase̱ diwutamea na njan a bato ndedi. (Ndimbisedi 10:18) A kakane̱ o bo̱le̱ mitakisan ma bawase̱ diwutamea tongwea na Janea la Loba le o mo̱ń na lena di me̱nde̱ timbane̱ manea ma bato ba benama. (Daniel 2:44; Mateo 6:10) Yehova a me̱nde̱ bolane̱ Janea lao o dakea Satan Diabolo. (Roma 16:20) Di Janea lena di me̱nde̱ die̱le̱ wase ńe̱se̱ di me̱nde̱ sumwa myoyo oteten bekombo. Mbel’a moto ńe̱se̱ e me̱nde̱ nde be̱ mbia mō̱ mu lati o wase ńe̱se̱. To̱ moto a si me̱nde̱ pe̱ ńa mbo’ao mīla ebanja Bibe̱l e kakane̱ ná: “Moto te̱ a me̱nde̱ ja owas’a mao mudiki ma wań na bao bwele ba jangolo, to̱ moto a si me̱nde̱ sisa babo̱, ebanja mudumbu ma Yehova ńa mamuti nde mu to̱pi.”—Mika 4:4.

 Janea la Loba buka te̱ nde di me̱nde̱ bo̱le̱ din to̱ti la bawase̱ diwutamea di be̱nno̱ we̱nge̱. Yehova a me̱nde̱ sumwa mitakisan me̱se̱ mi mańakisane̱ bato o timba bawase̱ diwutamea. Byembilan bō̱ ben:

•   Bila. “[Yehova] a mabo̱le̱ bila.” (Myenge 46:10) O so̱ṅtane̱ ne̱ni Loba a me̱nde̱no̱ bo̱le̱ bila, langa tema “La paix dans le monde: Comment sera-t-elle établie?”

•   Mabandan na njo. “[Yehova] a mawunja midī mabu na mabandan na matusan.” (Myenge 72:14) O so̱ṅtane̱ ne̱ni bato beno̱ ná bese̱le̱ mo̱nge̱le̱ ma bobe, langa tema i mabupane̱le̱ “Briser le cercle de la haine.”

•   Tue. “[Yehova] a me̱nde̱ sunga mutuedi nu mate̱ misea.” (Myenge 72:12) O so̱ṅtane̱ ne̱ni Yehova a me̱nde̱no̱ bo̱le̱ tue ná bambam, langa tema “Peut-on espérer un système économique plus juste?”

•   Si be̱ne̱ la da ndongo. “Mbasi i tute o ekombo.” (Myenge 72:16) O so̱ṅtane̱ ne̱ni Yehova a me̱nde̱no̱ bola ná to̱ moto a si bwa pe̱ njai, langa tema “Plus jamais la faim dans le monde?”

Mo̱ Bibe̱l ńe ná ńongwane̱ bawase̱ diwutamea we̱nge̱ e?

 E. O sumo te̱ ná Bibe̱l e mabola bawase̱ diwutamea dipita la mbaki ońola kie̱le̱ ni maye̱, ńe ná pe̱ ńongwane̱ babo̱ o lembe̱ mitakisan ba be̱nno̱ tatan.

 Bete̱sedi ba Bibe̱l: “Lo si no̱ngo̱ mutaka ońola to̱ lambo, nde o mambo me̱se̱ ese̱le̱ ná mpuli mańu mu biane̱ oboso ba Loba tongwea na muka na beso̱so̱medi na bola la masoma. Nde musango ma Loba mwena mu buki dibie̱ le̱se̱ mu me̱nde̱ kombe̱ milema mańu na mo̱nge̱le̱ mańu.”—Filipi 4:6, 7.

 Beteledi: O to̱ njika bete̱medi o maso̱be̱no̱, baise̱ Loba musango ma teten to̱ musango ma mudī. Ombwa tema “Philippiens 4:6, 7—‘Ne vous inquiétez de rien.’”