Diba la kriste̱n di tongo te̱, nik’e mabola Yehova edube e wanea pe̱ mome na muto muńe̱nge̱. (Mr 10:9) Ná diba labu linde di be̱ pe̱ bonam, kriste̱n yangame̱n bupe̱ bete̱sedi ba Bibe̱l ponda i mapo̱so̱no̱ mom’abu to̱ munj’abu.

O mapula te̱ yengea moto ońola diba, enge̱le̱ ná “pond’a diba” e po̱, ke̱ o mátomba ponda ńo̱ng’a lata ńeno̱ ngińa ńai yeno̱ ná e be̱ wa ndutu o no̱ngo̱ bedomsedi ba bwam. (1Ko 7:36) Ye dibie̱ ná o bolane̱ ponda weno̱ mulamba o jouse̱ mulatako mo̱ngo̱ na Loba, na o sa bede̱mo ba bwam. Na nika o me̱nde̱ be̱ ka ni dongame̱n o bola ná diba lo̱ngo̱ di tongwe.

Obiana o memea o ba to̱ babe̱ na moto, no̱ngo̱ ponda o bia mot’ao ńa ‘teten nu wutam.’ (1Pe 3:4) O botedi te̱ be̱ne̱ penda jombwea mato̱ti ma mweńa, kwalea ońol’ao na moto weno̱ o yengea. Ka nje te̱ yeno̱ na to̱ njika mulatako weno̱ ná o be̱ne̱, o diba pe̱ wangame̱n nde jombwea nje o mabolano̱ mom’ango̱ to̱ munj’ango̱ buka nje o makusane̱no̱ mo̱. (Fil 2:3, 4) O bupe̱ te̱ bete̱sedi ba Bibe̱l obiana o maba to̱ babe̱, e me̱nde̱ be̱ wa lambo di wam o benga bupe̱ mo̱, diba lo̱ngo̱ pe̱ di mabe̱ bonam.

OMBWA SINIMA NE̱NI BOṄSANE̱ OŃOLA DIBA—DONGO 3: “DUTEA MUSUSEDI,” DENGE̱ O MALABE̱ MYUEDI MI MABUPE̱:

• O bebotedi ne̱ni mambo ma tano̱ oteten a nu munańango na Shane e?

• Nje a timbino̱ maka ponda a batino̱ bia mo̱ e?

• Ne̱ni sango na ńango bongwane̱no̱ mo̱ e, njika bedomsedi ba bwam pe̱ a no̱ngino̱ e?