O kasa nja na bokenju e? To̱ nja nu mukeye̱ o ndongame̱n asu ya Kriste̱n—e be̱ bape̱ńa to̱ bonasango be na biso̱ etum a ponda. (Ro 15:7; Bon 13:2) Ye ná e be̱ munasango to̱so̱ munańango nu wu o ekombo epe̱pe̱ to̱so̱ Kriste̱n ni temam ńe o jukeye̱ pe̱te̱ ombusa etum a mimbu. Dutea te̱ ne̱ni weno̱ ná o senga o mulema ke̱ we o ni ńai a bete̱medi. Obwa, o si me̱nde̱ bwane̱ ni ńai a bekasedi ba wea muńe̱nge̱ e? (Mt 7:12) Ońola nje so̱ o titino̱ ná o dangwa o Ndabo a Janea o soma bane̱ oboso na ombus’a ndongame̱n e? Nika e mongwane̱ ná mbidimbidi ma wea na ndolo ba be̱ oteten asu, e bola pe̱ Yehova edube. (Mt 5:16) Ye mbale̱ ná ye ná e be̱ ndutu ná o we̱le̱ kwala na bato be̱se̱ bukedi. Nde to̱ na nika, be̱se̱ ba me̱nde̱ so̱ṅtane̱ ná ba kasabe̱ bwam yete̱na mō̱ ńasu te̱ a we̱ o bola lao dongo. *

Ede̱mo a kasa la be̱n ya mbale̱ e me̱ne̱ne̱ seto̱ buka te̱ o mako̱to̱ne̱ ma tobotobo kana Jo̱nge̱le̱ la kwed’a Yesu nde o ponda ye̱se̱. Bapeńa be̱n te̱ ndol’a Kriste̱n ńe oteten asu, ba kusane̱ pe̱ biso̱ mo̱, nika ńe ná e tute̱le̱ babo̱ o sesa Loba, ba lata pe̱ na biso̱ o jowe̱ la mbale̱.—Yoh 13:35.