Dutea ná o maja nde o Galilea o mińa ma Yesu. Na wa o no̱ngo̱ ngea wala o Yerusalem o bolise̱ buńa bonde̱ne̱ ba mino̱ko̱. Mundi mu londi na baboleye̱ Loba bena ba wu etum bwambi. We o pula bola Yehova jabea. Na mbod’ango̱ o makata, na wa o botea dangwa oteten a dimuti, o wala we̱ni tempe̱l e te̱mno̱. O po̱ino̱, na wa we̱ne̱ ne̱ni tempe̱l e londino̱ na jita la bato bena babo̱ pe̱ ba mapule̱ bole̱ jabea labu. O sukan, pond’ango̱ ńa bola prisi jabea lo̱ngo̱ e mápo̱. Nde dibokime̱ne̱ wo̱nge̱le̱ ná munaso̱ngo̱, ńena yen ebe ńe oteten a di dimuti to̱ ńe o mundi, a be̱n lambo te̱nge̱ne̱ wa. Yesu a tele̱ye̱ nje wangame̱nno̱ bola. (Langa Mateo 5:24.) Ne̱ni wa na munaso̱ngo̱ o wusane̱no̱ leno̱ ná lo koma musango ka nje te̱ Yesu anedino̱ biso̱ e? O dongo te̱ le o wase wan, maka jalabe̱ di te̱nge̱n.

WANGAME̱N . . .

• kwala na munaso̱ngo̱ buka te̱ yete̱na o mo̱nge̱le̱ ná a be̱n njo̱m ni te̱nge̱n o linga

• keka te̱se̱ jo̱nge̱le̱ la munaso̱ngo̱ yete̱na o so̱i ná e ńai ni mapomane̱ linge̱, to̱so̱ ná mo̱ pe̱ a be̱n njo̱m o bo bwambo

• sengane̱ munaso̱ngo̱ na we̱lisane̱, to̱ e be̱ nde ná o titi o so̱ṅtane̱ mo̱ bwam, baise̱ mo̱ milakisan ma mbale̱ ońola ndutu a masengano̱ to̱ ońola betune̱ bena beboledi bo̱ngo̱ be wanedino̱ mo̱

MUNASO̱NGO̱ ANGAME̱N . . .

• langwea bape̱pe̱ ne̱ni o lingise̱no̱ mo̱ o bwam ná a suabe̱le̱ na bane̱ bape̱pe̱ o mwemba

• kaise̱ wa, o̱nge̱le̱ nje ye̱se̱ o bolane̱no̱ mo̱, a ńakisane̱ pe̱ wa o jemba diwuse̱ lo̱ngo̱

• jemba sibise̱ la ńolo na ngiń’a mulema o bolane̱no̱ o sisea mo̱ be̱be̱, a lakise̱ pe̱ wa na mulema mwe̱se̱

To̱ná jowe̱ lasu di si mabaise̱no̱ pe̱ mabea ma ńama we̱nge̱, nje Yesu okwe̱le̱no̱ jombwea mulatako mwe oteten a musango na munasango asu na jowe̱ lena Loba a do̱lisane̱no̱ e?