We te̱ eso̱mbe̱ e si dubisabe̱ to̱ moto nu mokwe̱ Bibe̱l, mo̱ o te̱se̱ ná o madubisabe̱ e? Ońola nje wangame̱nno̱ pula dubisabe̱ e? Ná o be̱ diko̱m na Yehova, wangame̱n bake̱ wame̱ne̱ na mo̱ o dubisabe̱ pe̱. (Mye 91:1) Nika ńe pe̱ ná ńongise̱ wa. (1Pe 3:21) Ne̱ni weno̱ ná o ńaka o po̱ o ma matanga e?

Wasa be̱ mbaki ná mbale̱ ni. Myuedi mi po̱yedi te̱ wa o mo̱nge̱le̱, po̱ngo̱ muwaso na wame̱ne̱ ná o so̱ malabe̱. (Ro 12:2) Emba to̱ njika mawengisan wangame̱nno̱ po̱ngo̱, o bole pe̱ nika ońolana o mapula bwese̱ Yehova muńe̱nge̱. (Min 27:11; Efe 4:23, 24) Baise̱ mo̱ jongwane̱ ponda ye̱se̱. Be̱ mbaki ná Yehova a me̱nde̱ jembe̱ wa, a sue̱le̱ pe̱ wa na mudī mao musangi. (1Pe 5:10, 11) E te̱nge̱n ná o po̱nge mi miwe̱n. Bolea Yehova nde le nge’a longe̱ ni buki ye̱se̱!​—Mye 16:11.

OMBWA SINIMA NGEA NI MALANE̱ O DUBISE̱, DENGE̱ O MALABE̱ MIN MYUEDI:

• Nje e ta yeka bō̱ ná ba dubisabe̱ nde ba timbino̱ buka e?

• Nje wangame̱nno̱ bola ná o be̱ne̱ dube̱ di mapule̱ ná o bake̱ wame̱ne̱ na Yehova e?

• Nje e tute̱le̱ bō̱ o po̱ngo̱ matanga ma malane̱ o dubise̱ e?

• Njika minam ba ba mapo̱se̱ o bolea Yehova ba makusano̱ e?

• Nje ye janda la bake̱ la biso̱me̱ne̱ na Loba na dubise̱ e ?