Yehova a mano̱ngo̱ makakane̱ ma buńa ba diba iwiye̱ jita. Mo̱ ná mome na muto bangame̱n tingame̱ mō̱ na nune̱. (Mt 19:5, 6) Maba ma bwam me jita o tumba la Loba. Nde diba to̱ diwo̱ di titi ke̱nge̱nge̱. Myambo mi mabe̱ mi po̱. Di s’angame̱n bupe̱ jo̱nge̱le̱ la bato jita ná myambo mi po̱i te̱ oteten a mome na muto bangame̱n nde jabane̱ ba bwa pe̱ diba. Ne̱ni kriste̱n yeno̱ ná i sabangane̱ diba labu e?

Jombweye matanga ma mweńa matanu.

1. Ná o tate mulema mo̱ngo̱, banga mambo ka jumwe̱le̱ la ńo̱ng’a lata na moto nupe̱pe̱ na longe̱le̱ ńolo na mambo ma titi ko̱nji, mena ma mańamse̱ nde diba.​—Mt 5:28; 2Pe 2:14.

2. Ouse̱ diko̱m lo̱ngo̱ na Loba, o bate pe̱ be̱ne̱ ńo̱ngi ńa do̱lisane̱ mo̱ o diba lo̱ngo̱.​—Mye 97:10.

3. Benga bo̱to̱ mot’a peńa, o bole pe̱ ngus’a mambo ma muyao i me̱nde̱ bole̱ ná longe̱ la mwenj’ango̱ di wame son.​—Kol 3:8-10, 12-14.

4. Benga kwalea mambo ma mweńa na muyao.​—Kol 4:6.

5. Bola mwenj’ango̱ nje angame̱nno̱ kusane̱ wa o diba na ndolo.​—1Ko 7:3, 4; 10:24.

Kriste̱n i mabola te̱ diba edube, i mabola nde Yehova Mute̱se̱ diba, edube.

OMBWA SINIMA JANGAME̱N “ŃA MĪLA NA TITIMBE̱”​—BUPE̱ BETE̱SEDI BA PEMBISAN, DENGE̱ O MALABE̱ MIN MYUEDI:

• To̱ná diba leno̱ ná di botea bwam, njika mitakisan me ná mi po̱ e?

• Ne̱ni bete̱sedi ba Bibe̱l beno̱ ná bongwane̱ ba bena ba mo̱nge̱le̱ ná ndolo e titi pe̱ o diba labu e?

• Njika bete̱sedi Yehova a bolino̱ ońola diba e?

• Nje mome na muto bangame̱nno̱ bola ná diba labu di be̱ bonam e?