Ońola nje wangame̱nno̱ boṅsane̱ e? Ye ná e po̱ ná wingeye o do̱kita o nange pe̱ oten, o mbad’epańpań. Ońola nika, bola me̱se̱ ná o boṅsane̱ tatan ná o tate kusa beboledi ba do̱kita ba bwam yete̱na nik’e po̱i. Bola la nika di malee̱ ná o mabola longe̱ edube name̱ne̱ pe̱ na mbend’a Yehova jombwea maya.—Bbol 15:28, 29.

Nje weno̱ ná o bola ná o boṅsane̱ e?

• Kane̱ o no̱nge pe̱ ponda o londise̱ dipapa la DPA. a Bate̱ dikalo bena ba dubisabe̱ be ná ba kusa di dipapa la DPA omboa mube̱ne̱ mboṅ a kalati o mwemba, name̱ne̱ pe̱ na Carte d’identité ońola bana babu basadi

• Yete̱na we deme̱, baise̱ batudu bo̱ngo̱ dipapa la S-401: Fiche d’information pour les femmes enceintes. Di dipapa di me̱nde̱ jongwane̱ wa o no̱ngo̱ bedomsedi ba bwam jombwea mitakisan mena me ná mi po̱ o pond’a deme̱ na o pond’a yadi

• Yete̱na wangame̱n kusa eboled’a do̱kita yena ye ná e baise̱ bolane̱ la maya to̱ ná o nange o do̱kita, bola ná batudu bo̱ngo̱ ba bie nika oboso ba ponda, o bīse̱ pe̱ mado̱kita ná o me̱nde̱ kusa pe̱pe̱le̱ la mutudu mō̱ ńa Mboṅ a Yehova

Ne̱ni batudu beno̱ ná bongwane̱ wa e? Be ná bongwane̱ wa o londise̱ dipapa lo̱ngo̱ la DPA. Nde batudu ba si me̱nde̱ no̱ngo̱ bedomsedi jombwea bolea la wa, to̱ langwea wa nje ba mo̱nge̱le̱no̱ o mato̱ti mena moto te̱ angame̱nno̱ no̱ngo̱ bedomsedi na mo̱me̱ne̱. (Ro 14:12; Ga 6:5) Ponda o malangweano̱ batudu ná we o bete̱medi bena be ná be wana ekwal’a maya, dibokime̱ne̱ ba mabola ná bonasango ba mabole̱ ebolo na mado̱kita (CLH) ba bie nika.

Njika jongwane̱ CLH ńeno̱ ná e wana e? Bonasango ba CLH ba kusi belongedi o jongwane̱ mado̱kita na bato ba mambenda o so̱ṅtane̱ ne̱ni dube̱ lasu di mabolano̱ ná je̱ne̱ maya. Be ná ba kwalea na do̱kita di me̱nde̱ boleye̱ wa, ońola beboledi ba do̱kita be si mabaise̱ bolane̱ la maya. Yete̱na nik’e mapula, be ná bongwane̱ wa o so̱ do̱kita di me̱nde̱ jemeye̱ o bolea wa esibe̱ maya.

OMBWA SINIMA NE̱NI PO̱SO̱ EBOLED’A DO̱KITA JOMBWEA MAYA, DENGE̱ O MALABE̱ MYUEDI MI MABUPE̱:

• Nje wokono̱ o nin sinima yena ye ná yongwane̱ wa o boṅsane̱ yete̱na e po̱i ná wingeye o do̱kita o mbad’epańpań, nde ekwal’a maya e po̱ e?

  Your answer