Botea o mbu 2018, kalati te̱ ńa mo̱di e makwalea nde tema po̱. Yi kalat’a mo̱di ye̱se̱ pe̱ i maso̱be̱ o Mukoba masu ma belongisan ba belēdi. Jangame̱n so̱ bolane̱ mo̱ o dikalo. Je ná di dangwane̱ ngus’a kalati ke̱ di mala o lo̱ndo̱ to̱ o sapi. Di si mabolane̱ mo̱ o jokwa Bibe̱l na bato, nde ye ná i bola moto ńo̱ngi o pula bata bia Loba.

Ombusa wa botea ekwali na moto, langea mo̱ epas’a Bibe̱l ewo̱ nde o kwaleye ońola tema ni maso̱be̱ o kalati po̱ nu moto eno̱ ná a to̱ndo̱ langa. K’eyembilan, nu moto e te̱ sango to̱ ńango a mboa, moto nu kusi ndutu, to̱ ńepame̱, we ná o kwala ná: “Na langi tema po̱ jombwea nika. Ne ná na lee̱ wa mo̱ e?” Yete̱na a lee̱le̱ ńo̱ngi, we ná o bake̱ mo̱ kalati po̱, to̱so̱ o lomea mo̱ mo̱ o musinga, to̱ e be̱ nde ná nged’a boso ni bińo̱ leno̱ kwala. To̱ná mpuli masu mu titino̱ ná ye̱ke̱i te̱ di bole mot’ekwali kalat’a mo̱di, mbale̱ ńe nde ná i mongwane̱ biso̱ o so̱ ba bena ba le̱le̱m o we̱le̱ nje ba mokwano̱ o ebolo.​—Bbol 13:48.