Panga la moto o bebokedi di matata mwemba, le pe̱ nde beko̱kisedi ońola babole̱ bobe ba s’ate̱le̱. (1Ko 5:6, 11) Di malee̱le̱ nde ndolo ke̱ di masue̱le̱ beko̱kisedi be mawe̱ na Yehova. Ne̱ni nika ńeno̱ ná e be̱ mbale̱ nde ke̱ panga la moto di mabwese̱ bato be̱se̱ ndutu, e be̱ belongi ba mbia ba nu nu pangabe̱ to̱ m’boko ma beko̱kisedi e?

Omo̱ń a me̱se̱, di malee̱le̱ ndolo ońola dina la Yehova na bete̱sedi bao ba bosangi. (1Pet 1:14-16) Di malee̱le̱ pe̱ nde nu nu pangabe̱ ndolo. To̱ná beko̱kisedi ba ngińa be mabwesane̱no̱ ndutu jita, be ná be ya “bepuma ba musango ba te̱me̱ la sim.” (Bon 12:5, 6, 11) Di bengi te̱ be̱ne̱ mulatako na moto nu pangabe̱ to̱ ńasumwe̱ o bebokedi na mo̱me̱ne̱, ke̱ je nde te̱nge̱ne̱ beko̱kisedi ba Yehova. Di si dimbea ná Yehova a mako̱kise̱ nde baboledi bao “o ka ni te̱nge̱n.” (Yer 30:11) Di pite̱ ná nu nu pangabe̱ a me̱nde̱ timba na Loba lasu la ndedi. Nde o mulemlem ma ponda, di mabenga sue̱le̱ beko̱kisedi ba Yehova, di bola pe̱ me̱se̱ ná mulatako masu na Yehova mu benge be̱ ngińa.​—Yes 1:16-18; 55:7.

OMBWA SINIMA BENGA BE̱ JEMEA NA MULEMA MWE̱SE̱, NDE WALABE̱ MIN MYUEDI:

• Njika ndutu bayedi be kriste̱n ba mabwano̱ ke̱ mun’abu a pandi na Yehova e?

• Ne̱ni mwemba mweno̱ ná mu sue̱le̱ belongi ba mbia be o benge̱ boleye̱ Yehova na jemea e?

• Njika myango ma Bibe̱l mi malee̱ ná ye mweńa ná di be̱ Yehova jemea buka mbia masu e?

• Ne̱ni di malee̱le̱no̱ ná ye biso̱ mweńa o be̱ Yehova jemea buka mbia masu e?