O dikalo lao, Yesu a busise̱ belēdi o mambo ma wu tombe̱. (Lu 13:1-5) Wa pe̱ we ná o bolane̱ mambo ma wu tombe̱ o bola ná bato ba be̱ne̱ ńo̱ng’a senga mwe̱ndi ma janea. O bo̱le̱ te̱ kwalea ońola tue, mbeu a ńolo ni mawe̱ na mo̱me̱ne̱, mpungu, ńo̱ la banga na nika, baise̱ moto myuedi ońola dutea. We ná o baise̱ ná: “O mo̱nge̱le̱ ná buńa bō̱, di me̱nde̱ je̱ne̱ su la . . . ?” to̱ ná “Mo̱ o mo̱nge̱le̱ ná mwano mwe o bo̱le̱ . . . ?” Ombusa nika, lee̱ epas’a Bibe̱l e makwaleye̱ ońola di to̱ti. Moto a lee̱le̱ te̱ ńo̱ngi, lee̱ mo̱ sinima po̱ to̱ kalati po̱ ńe o Mukoba masu ma belongisan ba belēdi. Nika di makekano̱ tapa milema ma bato be o mōnda masu ma dikalo, di “mabola nde man me̱se̱ ońola myango ma bwam.”—1Ko 9:22, 23.

Njika tema ye ná i tapa milema ma bato be o mōnda mo̱ngo̱ ma dikalo e?