Botea o mo̱di ma Dimo̱di 2018 nde patan a bekwali i botedino̱ busa o dipapa laboso la Longe̱ lasu la kriste̱n n’ebola dikalo​—kalat’a ndongame̱n. Ne̱ni jeno̱ ná di bolane̱ mo̱ e?

O be̱n te̱ ná o tombise̱ ekwal’a bautu: Wangame̱n o bolane̱ myuedi, epas’a Bibe̱l, na myuedi ma bekutu me o patan a ekwali. Nde nik’e si mapula kwala ná wangame̱n o timbise̱le̱ eyala omo̱ń’eyala nje o masengano̱ o sinima ńa patan a ekwali. We ná o bolane̱ byala bepe̱pe̱, byingedi bepe̱pe̱, mo̱nge̱le̱ mape̱pe̱, na nika na nika. We pe̱ ná o bola kalati po̱ ńa Mukoba masu ma belongisan ba belēdi, to̱ e be̱ nde ná nik’e si kwalabe̱ o bediedi ba dongo lo̱ngo̱.

We te̱ o dikalo: Patan a bekwali i po̱ngo̱be̱ nde o jongwane̱ biso̱ ná di be̱ne̱ mo̱nge̱le̱. Moto a lee̱le̱ te̱ ńo̱ngi, na ná a mapula bata bia mambo, we ná walane̱ ekwali oboso yen ebe tongwea na bolane̱ patan a pe̱pe̱le̱. We ná o tukwa patan son, we pe̱ to̱ ná o bolane̱ patan ńe diwengisan ná bambam. Mo̱ tema po̱ ńa mo̱di mu tombi, to̱so̱ epas’a Bibe̱l ewo̱ epe̱pe̱ ye ná e tapa bato ba maje̱ owe̱ni weno̱ e? Mo̱ bato owe̱ni o majano̱ be o kwalea ońola lambo diwo̱ di bolane̱ o mundi e? E be̱ to̱ ne̱ni o po̱sino̱ o bolane̱ patan a bekwali, janda le nde ná o ‘bole man me̱se̱ ońola myango ma bwam, ná o be̱ne̱ dongo oten.’​—1Ko 9:22, 23.