Yehova a mapula ná mbia mi be̱ bonam. (Mye 127:3-5; Mul 9:9; 11:9) Nde, je ná di bo̱lo̱ne̱ muńe̱nge̱ masu ońola njo̱m a mitakisan ma nin wase na mawuse̱ ma belongi ba mbia masu. Nje elongi te̱ ya mbia yeno̱ ná e bola ná mbia mu bate be̱ muńe̱nge̱ e?

Mome a mabola munj’ao edube. (1Pe 3:7) A matombise̱ ponda mwemba na mo̱. A mengane̱ nde mo̱ nje eno̱ ná a bola, a soma pe̱ mo̱ ońola nje a maboleano̱ mo̱ na mbia mwe̱se̱. (Kol 3:15) A malangwea mo̱ ná a to̱ndi mo̱ a sesa pe̱ mo̱.—Min 31:28, 31.

Muto a mawasa ne̱ni sue̱le̱ mom’ao. (Min 31:12) A masibise̱ mo̱me̱ne̱ owas’ao, a bola pe̱ mambo mwemba na mo̱. (Kol 3:18) A makwalisane̱ mo̱ a to̱po̱ pe̱ jombwea mo̱ na muyao.—Min 31:26.

Bayedi ba matombise̱ ponda na bana babu. (Ndim 6:6, 7) Ba malangwea bana babu ná ba to̱ndi babo̱. (Mt 3:17) Ba malee̱le̱ ndolo na ye̱ne̱ ke̱ ba mako̱kise̱ babo̱.—Efe 6:4.

Bana ba mabola bayedi babu edube, ba masengane̱ pe̱ babo̱. (Min 23:22) Ba mabīse̱ bayedi babu mo̱nge̱le̱ mabu na besengedi babu. Ba makasa mome̱le̱ ma bayedi babu, ba malee̱le̱ pe̱ babo̱ edube.—Min 19:20.

OMBWA SINIMA SA MUŃE̱NGE̱ O NDABO ANGO̱ ŃA MBIA, NDE WALABE̱ MIN MYUEDI:

Nje moto te̱ a bolino̱ ná muńe̱nge̱ mu bate be̱ o ndabo a mbia e?