O mo̱di ma Ńe̱te̱ki, di me̱nde̱ po̱ngo̱ miwe̱n minde̱ne̱ o baise̱ bato be̱se̱ nga ba mapula jokwa Bibe̱l na kalati nisadi Be̱ne̱ longe̱ le bonam o bwindea!. Bonasango na bonańango be ná ba po̱so̱ o be̱ paonia y’epas’a ponda ońola 30 ma hawa. Ne̱ni di me̱nde̱no̱ no̱ngo̱ dongo o di dikalo la tobotobo e?

• O ekwal’a boso: Bolane̱ dipapa disukan la ni kalati nisadi o bola moto ńo̱ngi, o keke pe̱ lee̱ mo̱ ne̱ni jokwa di matombano̱. O̱nge̱le̱ pe̱ ba bena ba se̱le̱ lee̱le̱ ńo̱ngi, na mape̱pe̱le̱ mo̱ngo̱. To̱ e be̱ nde ná kwaṅ ba bangi jokwa, be ná ba to̱ndo̱ mbad’asu ńa jokwa ńa peńa na ni kalati nisadi. Di s’angame̱n dia ni kalati nisadi o mamboa di si mabomane̱no̱ bato, to̱ we̱le̱ mo̱ o maleta o lomea bato bena ba si se̱le̱ lee̱le̱ ńo̱ngi. Dibe̱le̱ l’ebol’a dikalo la mwemba le ná di bata ndongame̱n ya dikalo ipe̱pe̱ o mu mo̱di.

• Mbadi ipe̱pe̱: Yete̱na mwemba mańu mu mabolane̱ bebamban ońola dikalo, we̱le̱ kalati nisadi Be̱ne̱ longe̱ le bonam o bwindea! oten. Langwea bato ba malee̱le̱ ńo̱ngi ná ba no̱ngi te̱ ni kalati, be pe̱ ná ba be̱ne̱ jokwa la Bibe̱l esibe̱ sawa. Lee̱ o patape̱m ne̱ni jokwa di matombano̱, to̱ te̱se̱ o bola nika o ponda nipe̱pe̱. Mombwed’ebol’a dikalo e ná a po̱so̱ bate̱ dikalo ba dongame̱n ná bale o bepolo ba ńunga to̱ o o̱fis o baise̱ bato nga ba mapula jokwa Bibe̱l.

Yesu anedi biso̱ ná di “timbise̱ matumba me̱se̱ bokwedi,” di “lee̱ babo̱.” (Mt 28:19, 20) Din dikalo la tobotobo longwane̱ so̱ biso̱ o londise̱ y’ebolo, tongwea na kalati Be̱ne̱ longe̱ le bonam o bwindea!