Di mabolane̱ ngud’asu bwam ke̱ di te̱se̱ mambo o bola o ebol’a Yehova. (1Ko 9:26) Mambo di mate̱se̱no̱ o bola ma mongwane̱ biso̱ o bolane̱ ponda bwam obiana su la yen ebe̱yed’a mambo di mapo̱. (Efe 5:15, 16) O jowe̱ lańu la ndabo a mbia, le ná lo kwalea ońola mambo leno̱ ná lo te̱se̱ o bola ońola mbu m’ebolo mu maye̱. Nin kalat’a ndongame̱n e be̱n bekwali be be̱n mambo jita weno̱ ná o te̱se̱ o bola; we ná wombwea mo̱ o muka.​—Yak 1:5.

K’eyembilan, mo̱ mbia mwe̱se̱ mwe ná mu so̱ṅtane̱le̱ ná to̱ e be̱ nde moto mō̱ a be̱ paonia ńa pond’a mususu e? O mo̱nge̱le̱ te̱ ná o titi ná o londise̱ hawa ba mabaise̱no̱, kwala na paonia yena ye o mulemlem ma bete̱medi ka wa. (Min 15:22) Yen ebe le ná lo bele̱ paonia po̱ o jowe̱ lańu la ndabo a mbia, lo baise̱ mo̱ myuedi. Ombusa nika tila midango weno̱ ná o bupe̱. Yete̱na o ta paonia kwaṅ, ombwea nga bete̱medi bo̱ngo̱ ba tatan be ná be bola wa epolo ná o be̱ pe̱te̱ mo̱.

Mo̱ o mbia mo̱ngo̱ moto e ná a be̱ paonia ń’epas’a ponda ońola mo̱di mō̱ to̱ buka nika e? O si be̱n te̱ ngudi ndongo, we ná o be̱ paonia ń’epas’a ponda yete̱na o tombise̱ hawa po̱ to̱ iba o dikalo buńa te̱. Yete̱na o si be̱n ponda ndongo o te̱ dikalo oteten a woki ońolana o mabola ebol’a pond’a mususu to̱ ná o mala o esukulu, we ná o po̱so̱ mo̱di mwena mu be̱n buńa bonde̱ne̱ bō̱ to̱ wike̱n itanu. Maka o kalenda njika ponda o te̱se̱no̱ o be̱ paonia ń’epas’a ponda, o tile pe̱ mudango mo̱ngo̱.​—Min 21:5.

OMBWA SINIMA BE̱ PAONIA ŃE NGIŃ’A MULEMA, DENGE̱ O MALABE̱ MIN MYUEDI:

• Nje myango ma munańango Aamand mi malee̱no̱ biso̱ jombwea mbadi Yehova a mombweano̱ na ndolo ba bena ba mapo̱nge̱ miwe̱n minde̱ne̱ o be̱ paonia e?