Yesu a we̱li nde te̱ye̱ mut’a Samaria dikalo la m’bengu ońolana a botedi o kwalisane̱ mo̱. Ne̱ni jeno̱ ná di bata be̱ jangwa o botea ekwali na be̱n ba bato e?

• Be̱ muyao, o kwalisane̱ pe̱ bato. To̱ na wo̱lo̱, Yesu a botedi nde ekwal’ao na baise̱ madiba ma ńo̱ buka te̱. We ná o botea na masoma ma weawea denge̱ o makwalea ońola k’eyembilan, je̱ne̱ne̱ la buńa, to̱ lambo le o tombe̱ oteten a ponda. O si dimbea ná janda laboso le nde ná o boteye ekwali, ońola nika to̱pea ońola to̱ njika lambo nu moto eno̱ ná a to̱ndo̱ kwalea. A s’alabe̱ te̱ wa, e titi lambo. Keka pe̱te̱ na moto nupe̱pe̱. Baise̱ Yehova ngiń’a mulema.​—Neh 2:4; Bbol 4:29.

• Be̱ be̱be̱ o langwa myango ma bwam ke̱ epolo ye̱ne̱ne̱, nde o si be̱ musunga. Ese̱le̱ ekwali e suleye na mo̱me̱ne̱. O ńakisane̱ te̱ moto, e ná a senga nika bobe, embe̱ ekwali. O si bwa ndutu yete̱na ekwali e bo̱i oboso ná o mate̱ye̱ mo̱ dikalo. Yete̱na o mabwa bo̱ngo̱ o botea ekwali ná o langwe myango ma bwam, keka botea ekwali na moto esibe̱ janda la te̱ye̱ mo̱ dikalo. [Lee̱ sinima 1 o kwaleye pe̱ ońol’ao.]

• We̱ ná o kuse epolo o te̱ye̱ moto dikalo tongwea na kwalea ońola dube̱ lo̱ngo̱ na mbaki ńe̱se̱, ná yen ebe nika e tute̱le̱ mo̱ o baise̱ wa beteledi. Yesu a kwali mambo mena ma tute̱le̱ nu muto o baise̱ mo̱ myuedi. Ponda a botedino̱ langwea mo̱ myango ma bwam, e ta nde buka te̱ ná alabe̱ myuedi mao. [Lee̱ sinima 2 o kwaleye pe̱ ońol’ao, denge̱ o malee̱ pe̱ sinima 3 nde o kwalea pe̱ ońol’ao.]