Pasa nisukan ńa Yesu e ta ńangame̱n be̱ tobotobo. Kana kwed’ao e tano̱ e nisisea, a ta a pula da ni Pasa na bamuloloma bao, na te̱se̱ pe̱ bolise̱ la peńa mbu te̱, le nde Da la Sango. Na mo̱ a loma Petro na Yohane ná bale boṅsane̱ epolo. (Lu 22:7-13; ombwa duta la bebotedi.) Nik’e mo̱nge̱le̱ biso̱ ná jangame̱n boṅsane̱ ońola Jo̱nge̱le̱ la kwed’a Yesu di me̱nde̱ be̱ 27 ma So̱ṅe̱. Ye ná e be̱ ná myemba mi máboṅsane̱ ońola mubole̱ ekwali, ewolo na wain, na nika. Nde nje mō̱ ńasu te̱ eno̱ ná a bola o boṅsane̱ ońola Jo̱nge̱le̱ la kwed’a Yesu e?

Boṅsane̱ mulema mo̱ngo̱. Langa o duteye pe̱ ońola bolanga ba Bibe̱l ońola di Jo̱nge̱le̱. Mudango ma bo bolanga mwe o Jombweye Betiledi buńa te̱. Appendice B12 ńa La Bible. Traduction du monde nouveau e be̱n beteledi bepe̱pe̱. (Ombwa pe̱ Kalat’a longe̱ la kriste̱n n’ebol’a dikalo ńa mo̱di ma Dibaba 2020.) Mbia me ná mi wasa mambo ma makwaleye̱ ońola mweńa ma diko̱ti, mena beno̱ ná bombwea o jowe̱ labu la ndabo a mbia, o Index to̱ o Mudied’a muwaso ońola Mboṅ a Yehova.

Bele̱ bape̱pe̱ ná bukeye. Be̱ mususu o dikalo la Jo̱nge̱le̱ la kwed’a Yesu. O̱nge̱le̱ bato bena weno̱ ná o bele̱, ka mape̱pe̱le̱ mo̱ngo̱, bato boko Bibe̱l kwaṅ, mako̱m na mbia. Batudu bangame̱n bele̱ ba bena ba temame̱. O̱nge̱le̱ pe̱ ná moto a si maja te̱ o wuma wa weno̱, we ná o so̱ epolo na pond’a Jo̱nge̱le̱ la kwed’a Yesu o wuma a majano̱, ke̱ walo o jw.org o do̱mse̱le̱ o JOMBWEA BISO̱, o po̱so̱ “Jo̱nge̱le̱.”

Nje epe̱pe̱ jeno̱ ná di bola ná di boṅsane̱ e?