Mbeu a ńolo i tombise̱ jita o nin we̱nge̱. Ponda mbeu a ńolo e mako̱no̱, ebolo e mabolane̱ o wana jongwane̱ yangame̱n te̱se̱be̱ na diabe̱le̱ bwam. Ońola nika nde Dibe̱le̱ di Madie̱le̱ di no̱ngino̱ bedomsedi ná O̱fis a wana la jongwane̱ e te̱se̱be̱ o mikanjo m’ebolo me̱se̱.

Bonasango be o ni o̱fis ba sengi te̱ ná mbeu a ńolo e kwedi o wuma, dibokime̱ne̱ ba mabele̱ nde batudu ba y’epolo, ná ba bie nje e me̱nde̱ pule̱ bonasango na bonańango. Yete̱na mambo me bobe o dikala lena bonasango ba y’epolo ba titino̱ ná bombwea mo̱ na babo̱me̱ne̱, mukanjo m’ebolo mu maloma bonasango ba dongame̱n ná ba die̱le̱ ebol’a wana la jongwane̱. O wala labu ban bonasango be ná ba be̱ne̱ ńo̱ng’a bate̱ mpuli to̱ ńo̱ng’a mambo mō̱ ma tobotobo; nde be pe̱ to̱ ná banda mambo ma mapule̱ o mundi ba malano̱, o bwam ba jaba mo̱.

Ni mbad’a bola ńe muse̱ṅ ońola njo̱m jita. E meka ńamse̱ la ponda na miwe̱n, mpambilan na ńamse̱ la mo̱ni na sango, bena be ná ba be̱ ke̱ bonasango ba mano̱ngo̱ ngaban o bola mambo na babo̱me̱ne̱.

Bonasango ba te̱se̱be̱ na mukanjo m’ebolo be ná ba bia mo̱ni mu mapule̱ na muso̱ngi ma bate̱ mpuli ebol’a wana la jongwane̱ e me̱nde̱no̱ baise̱. Be pe̱ ná bala je̱ne̱ baboledi ba go̱bina, ebanja o ngedi jita ban be ná bongwane̱ ná ebol’asu ya wana la jongwane̱ e pomane̱ wala. Ońola nika so̱, to̱ moto a s’angame̱n no̱ngo̱ ngaban o ko̱te̱le̱ mo̱ni, o loma masango, to̱ o wala wuma mbeu a ńolo e kwedino̱, yete̱na ba si baise̱ mo̱ ná a bole nika.

Nde to̱ e be̱ nde ne̱ni, ponda mbeu a ńolo e mako̱no̱, di be̱n ńo̱ng’a jongwane̱. (Bon 13:16) Ońolana di to̱ndi bonasango asu! Nje jeno̱ ná di bola e? Lambo le mweńa buka me̱se̱ le nde ná je ná di kane̱ ońola ba bena ba kusi mbeu a ńolo na ońola ba bena ba mawane̱ jongwane̱. Je pe̱ ná di bola mabea ońol’ebol’a dikalo o wase ńe̱se̱. Owas’a bediedi ba Dibe̱le̱ di Madie̱le̱, mikanjo m’ebolo nde me ná mi bia bwambwam owe̱ni ma mabea ma me̱nde̱no̱ jongwane̱ jita. Yete̱na di mapula jongwane̱ wuma ńo̱ngi ńeno̱, je ná di bola ná nik’e biane̱ tongwea na londise̱ dipapa la Demande d’admission comme volontaire local de développement/construction (DC-50).

OMBWA SINIMA MPUPE MINDE̱NE̱ O BRESIL, DENGE̱ O MALABE̱ MYUEDI MI MABUPE̱:

Nje e matape̱ wa jita o miwe̱n Mboṅ a Yehova i po̱ngino̱ o wana jongwane̱ ombusa mpupe o Bresil o 2020 e?