Bedinge̱dinge̱ be maduta mo̱nge̱le̱ ma moto nu mombwe̱ mo̱, be mongwane̱ pe̱ mo̱ o so̱ṅtane̱ na jo̱nge̱le̱ nje okono̱. Mulēd’asu Ńasam, Yehova, a bolane̱ bedinge̱dinge̱ o bola belēdi ba mweńa. (Bbot 15:5; Yer 18:1-6) Mulēdi Nunde̱ne̱ Yesu pe̱, a bolane̱ mo̱. (Mt 18:2-6; 22:19-21) O min mimbu misukan, pat’a bedinge̱dinge̱ po̱ ni lee̱ ná e mongwane̱ jita ńe nde sinima. Mo̱ o mabolane̱ sinima ke̱ o malee̱ bokwe̱ Bibe̱l na wa e?

Dom la sinima di boṅsane̱be̱ o jongwane̱ biso̱ ponda di matombise̱no̱ mokwa o kalati nisadi Myango ma bwam mi mawe̱ na Loba! O jita la ngedi, tem’a sinima te̱ ńe nde mulatako na myuedi mō̱ mi bitisabe̱ o maso̱no̱ o ni kalati. Kalati ńe o mulomba e be̱n jatingane̱ di mongwane̱ biso̱ o bia njika ponda lee̱ sinima te̱. O mbat’a nika, di be̱n sinima i mongwane̱ ońola kalati ya mokwa ipe̱pe̱ ye o mukoba masu ma belongisan ba belēdi.

Mo̱ we o kwalea tem’a Bibe̱l po̱ ńe mokwe̱ Bibe̱l na wa ndutu o so̱ṅtane̱ e? Nga e nde lembe̱ mitakisan mō̱ ma tobotobo e? Wasa o sinima ye o jw.org® na o JW Elimb’a bedinge̱dinge̱® po̱ ńe ná ńongwane̱ mo̱. Yen ebe bińo̱ na mo̱ le ná lombwa sinima po̱ ńa yin mwemba nde lo kwalea pe̱ ońol’ao.

Mo̱di te̱, sinima ya peńa i mabusisabe̱. Ná o mombwano̱ mo̱, dutea ne̱ni weno̱ ná o bolane̱ mo̱ ke̱ o malee̱ bape̱pe̱.