Diko̱m le nde “moto ńena ndolo e latino̱ na moto nupe̱pe̱.” K’eyembilan, Yonatan na David ba botedi diko̱m la bo̱ibo̱i botea ponda David a bono̱ Goliat. (1Sa 18:1) Mō̱ ńabu te̱ a lee̱le̱ bede̱mo ba bwam be boli ná nune̱ a pule be̱ diko̱m lao. Diko̱m la mbale̱ di se̱medi so̱ nde o nje moto te̱ a bino̱ jombwea nune̱. Bia la moto di mabaise̱ ponda na miwe̱n. Nde o milongwa ma bekwali o Inte̱rne̱t, bato ba do̱mse̱le̱ te̱ bo̱tin be ná ba timba nje ba mabele̱no̱ ná “mako̱m.” O Inte̱rne̱t ye lambo di wam ná bato ba wute ba nja beno̱ na mbale̱ ebanja be ná ba te̱se̱ ná te̱ite̱i nje kwala, ba be̱ne̱ pe̱ ngińa o dime̱ne̱ diwo̱ te̱nge̱ o mbadi bane̱ ba me̱ne̱no̱ babo̱. Ye so̱ bwam ná moto a duteye bwam nja eno̱ ná emea ka diko̱m. Moto o si bino̱ a baise̱ te̱ wa ná o be̱ diko̱m lao o Inte̱rne̱t, o si bwa bo̱ngo̱ o banga na jo̱nge̱le̱ ná o me̱nde̱ lingise̱ mo̱. Bō̱ ba po̱si ná ba si mabolane̱ milongwa ma bekwali o Inte̱rne̱t ná bambam, ná ba si kusa mbeu a ńolo. Nde o po̱si te̱ o bolane̱ mo̱, nje o s’angame̱nno̱ dimbea e?

OMBWA SINIMA BOLANE̱ MILONGWA MA BEKWALI O INTE̱RNE̱T NA DIBIE̱, DENGE̱ O MALABE̱ MYUEDI MI MABUPE̱:

• Nje wangame̱nno̱ jombwea obiana o mawe̱le̱ mo̱nge̱le̱ mo̱ngo̱ na maduta mo̱ngo̱ o milongwa ma bekwali e?

• Ońola nje wangame̱nno̱ no̱ngo̱ jangame̱ye̱ ke̱ o mapo̱so̱ mako̱m o Inte̱rne̱t e?

• Ońola nje wangame̱nno̱ we̱le̱ moyo o ponda o matombise̱no̱ o milongwa ma bekwali e?—Efe 5:15, 16