Ye ná e be̱ lambo di wam ná mitakisan mi bo̱bise̱ biso̱, sepo̱n ke̱ mi májinda. David a ta a bia ná mitakisan a makusane̱no̱ kiṅe̱ Saul mi me̱nde̱ sukane̱ bo̱, na ná a me̱nde̱ timba kiṅe̱ ka nje te̱ Yehova a kakanno̱ mo̱. (1Sa 16:13) Dube̱ la David longwane̱ mo̱ ná a be̱ we̱lisane̱, enge̱le̱ pe̱ Yehova.

Je te̱ owas’a kekise̱ je ná di bolane̱ dibie̱ lasu, so̱ṅtane̱ lasu to̱ dutea lasu ná di tukwe mambo. (1Sa 21:12-14; Min 1:4) Nde to̱ di bola nde nje ye̱se̱ ye o ngud’asu bupisane̱ bete̱sedi ba Bibe̱l, mitakisan mō̱ me te̱ nde ná mi tika be̱. O bete̱medi ka be, jangame̱n lee̱le̱ we̱lisane̱, jenge̱le̱ pe̱ Yehova. Son a ponda a me̱nde̱ bo̱le̱ ndut’asu ye̱se̱ a “tuta miso̱di me̱se̱” o miso̱ masu. (Bbī 21:4) E be̱ ná mitakisan masu mi bo̱i nde na jongwane̱ la Yehova to̱ ońola njo̱m nipe̱pe̱, nje ye mbaki ye nde ná mitakisan me̱se̱ mi be̱n su. Bia nika le ná di lo̱ko̱ biso̱ o dime̱ne̱ diwo̱ te̱nge̱.

OMBWA SINIMA TUMBA DI LATI O WASE ŃABEDI, DENGE̱ O MALABE̱ MYUEDI MI MABUPE̱:

• Njika mitakisan bonasango bō̱ ba kusino̱ o mikondo ma Matumba ma Lati ma Amerika e?

• Ne̱ni ba lee̱le̱no̱ we̱lisane̱ na ndolo e?

• Ne̱ni ba bengino̱ nde jombwea “ma mena ma te̱nge̱n” e?—Fili 1:10