Kana yine̱ ndongame̱n ya mwemba ye̱se̱, Yehova a mabolane̱ pe̱ ndongame̱n ya dikalo o jongwane̱ biso̱ o jumwe̱le̱ mō̱ na nune̱ ndolo na bebolo ba bwam. (Bon 10:24, 25) Yangame̱n nde jinda minuti matanu to̱ samba; o ni pambo a ponda nde ba mapo̱ngo̱no̱ peya, ba po̱so̱ mōnda, ba kane̱ pe̱. (Yete̱na e matomba nde ombusa ndongame̱n nipe̱pe̱, pond’ao ńangame̱n bata wuta buka nika.) Mudie̱le̱ mo̱ angame̱n boṅsane̱ lambo di me̱nde̱ jongwane̱ ba bena ba mabuse̱ o dikalo bo buńa. K’eyembilan, yete̱na jita bena ba mukeye̱ esabasu ba si te̱ dikalo oteten a woki, ye ná e be̱ bwam ná mudie̱le̱ ndongame̱n a dikalo ombweye nde nje ba me̱nde̱no̱ kwalea o mōnda. Njika mambo mape̱pe̱ yeno̱ ná e be̱ muse̱ṅ o kwalea e?

• Patan a bekwali ńe o Longe̱ lasu la kriste̱n n’ebol’a dikalo—Kalat’a ndongame̱n

• Ne̱ni bolane̱ lambo lena di bolane̱ to̱ mibia, o botea ekwali

• Ne̱ni buka mukidi mu mawe̱le̱be̱ ponda ye̱se̱

• Ne̱ni jalabe̱ moto nu si dube̱ ná Loba e, moto nu dube̱ ná longe̱ di si wekabe̱, moto nu mato̱pe̱ eyeme̱ epe̱pe̱, to̱ moto ńe o ebasi yena ye pasa wuma lo majano̱

• Ne̱ni bolane̱ mambo me o mulomba jw.org, o JW Library^®, to̱ o Bibe̱l

• Ne̱ni bolane̱ elongisan ewo̱ ya Mukoba ma belongisan ba belēdi

• Ne̱ni te̱ dikalo na telefon, na maleta, o ntelele, po̱ngo̱ mape̱pe̱le̱, to̱ tombise̱ mokwa ma Bibe̱l

• Mome̱le̱ jombwea jangame̱ye̱, jombwea la bete̱medi ba bane̱, be̱ne̱ la bedangwedi ba bwam na je̱ne̱ la mambo la bwam, to̱ ninka mambo

• Dongo to̱ sinima ńa kalati nisadi Tingame̱ o langa na lee̱

• Ne̱ni jembe̱ na jongwane̱ mwenj’ango̱ ńa dikalo

• Epas’a Bibe̱l beno̱ ná ba bolane̱ o dikalo to̱ myango ma dikalo mena mi membe̱