Son a ponda we̱lisane̱ Yehova a be̱nedino̱ nin wase di mapo̱ o su. Ebasi e kwedi e me̱nde̱ bumbisabe̱, matumba ma lati ngoto ma me̱nde̱ ko̱ye̱ baboledi ba Loba, Yehova pe̱ a bwa babole̱ bobe o Armagedon. Kriste̱n ye o jenge̱le̱ ná man mambo ma mweńa ma bolane̱.

Ye mbale̱ ná di si bi nje ye̱se̱ e me̱nde̱ tombe̱ o ndenge̱ ninde̱ne̱. K’eyembilan, di si bi ná te̱ite̱i njika ponda e me̱nde̱no̱ botea. Di si bi njika njo̱m banedi ba politik ba me̱nde̱no̱ bola ná ba ko̱ye̱ ebasi. Di si bi njika etum a ponda matumba ma mako̱ye̱no̱ baboledi ba Loba to̱ nje nik’e me̱nde̱no̱ be̱ne̱. Di si bi pe̱ to̱ ná te̱ite̱i nje Yehova a me̱nde̱no̱ bolane̱ o bumbise̱ babole̱ bobe o Armagedon.

Nde Betiledi be malangwea biso̱ nje ye̱se̱ jangame̱nno̱ bia o bwam ba be̱ mbaki na be̱ne̱ ngiń’a mulema ońola nje e me̱nde̱ bolane̱. K’eyembilan, di bi ná je nde o su la “mińa misukan.” (2Tim 3:1) Di bi ná pambo a ponda banedi ba mako̱ye̱no̱ ebasi e me̱nde̱ “wutisabe̱” ná ebas’a mbale̱ e si bumbisabe̱. (Mat 24:22) Di bi ná Yehova a me̱nde̱ sunga baboledi bao. (2Pe 2:9) Di bi pe̱ ná Nu ńena Yehova a po̱sino̱, o bwa babole̱ bobe na o tata dimuti dinde̱ne̱ o Armagedon, a te̱m ná sim e pe̱ ngińa.—Bbī 19:11, 15, 16.

Mambo mena ma me̱nde̱ bolane̱ ma me̱nde̱ bola ná bato ba “wo̱ ońola bo̱ngo̱ na pane̱ la mulema.” Nde, di langi te̱, di dutea pe̱ ońola bebolo ba jongise̱ ba Yehova ba kwaṅ na nje a bīse̱no̱ jombwea kie̱le̱ ni maye̱, je ná di ‘te̱se̱ ńolo ná sim di mama milopo masu,’ na mbaki ná jongise̱ lasu le be̱be̱.—Luk 21:26, 28.