1-3. (a) Njika mitakisan mō̱ beso̱mbe̱ be̱se̱ be be̱nno̱ e, nje pe̱ jeno̱ ná di langisan mo̱ e? (Ombwa duta la bebotedi ba jokwa.) (b) Ne̱ni pe̱ beso̱mbe̱ be Kriste̱n beno̱ ná be buka mi mitakisan e?

DUTEA ná we o pula wala o lo̱ndo̱ o mundi mu po̱ti ońola lambo le wa mweńa. Wala la di lo̱ndo̱ di mabaise̱ ná o pe̱ye̱ o mutoa ma ndiyo. O tunge̱no̱ o wum’a ndiyo, o bomane̱ dimuti na mitoa jita. Nika ńe bwam ná o bi njika mutoa wangame̱nno̱ no̱ngo̱ na we̱ni wala! Ebanja we ná o pimbea yete̱na o no̱ngi mutoa esibe̱ wa bia we̱ni mweno̱ o wala.

² O nin we̱nge̱ beso̱mbe̱ be nde ka bato be o wum’a ndiyo be o wase̱ mutoa. Be nde ka bale̱ o lo̱ndo̱, seto̱ la mutoa, nde lo̱ndo̱ la longe̱. Ponda iwo̱ ba mepame̱ ońola bedomsedi jita bangame̱nno̱ o no̱ngo̱, na mpo̱so̱ko o po̱ngo̱ oteten a mambo jita ma te̱m babo̱ oboso. A beso̱mbe̱, bińo̱ le ná lo no̱ngo̱ bedomsedi ba bwam yete̱na lo bi njika ngea bińo̱ langame̱nno̱ no̱ngea o longe̱. Njika mo̱ lo me̱nde̱no̱ no̱ngea e?

³ Din jokwa di me̱nde̱ jalabe̱ mi myuedi, na jembe̱ pe̱ beso̱mbe̱ ná bwese̱ la Yehova muńe̱nge̱ nde di be̱ babo̱ lambo la boso o longe̱. Nika e mapula kwala ná ba we̱le̱ Yehova o  mambo me̱se̱ ma longe̱ labu​—esukulu, ebolo, m’bē̱ ma ndabo a mbia, na nika. Bangame̱n pe̱ te̱ mpuli ońola mambo ma mudī. Beso̱mbe̱ bena be mawe̱le̱ bolea la Yehova o epol’a boso be ná ba be̱ mbaki ná a me̱nde̱ namse̱ babo̱, ná ba tongwe̱le̱ o longe̱ labu.​—Langa Minia 16:3.

4. Nje di me̱nde̱no̱ jombwea o din jokwa e?

⁴ Pomane̱ la te̱se̱ mambo ma mudī o bupe̱ le muse̱ṅ o longe̱. Ońola nje e? Di mala jombwea njo̱m ilalo. Njo̱m iba ya boso i malee̱ ná, po̱ngo̱ la miwe̱n o po̱le̱ mambo ma mudī moto a te̱se̱no̱ o boso di mouse̱ mulatako mao na Yehova; njo̱m ni londe̱ ilalo e makika tombwane̱ la pomane̱ te̱se̱ mambo ma mudī o po̱le̱.

5. Nje ye njo̱m a boso ńa te̱se̱ mambo ma mudī o po̱le̱ e?

⁵ Njo̱m a boso ńe nde o timbise̱le̱ Yehova masoma ońola ndol’ao na ońola nje ye̱se̱ a boledino̱ biso̱. Mulo̱nge̱ myenge mo̱ ná: “Ye bwam o bola Yehova masoma . . . Ebanja o londise̱ mba na muńe̱nge̱, a Yehova, ońola bola lo̱ngo̱; na masombise̱ ońola bebolo ba mā mo̱ngo̱.” (Mye. 92:2,  5) A eso̱mb’a moto, dutea o nje ye̱se̱ o kusane̱no̱ Yehova. Longe̱, dube̱ lo̱ngo̱, mwemba, na dipita lo̱ngo̱ la betańsedi la kie̱le̱ ni maye̱. Te̱se̱ la mambo ma mudī o epol’a boso le nde mbadi po̱ ńa timbise̱le̱ Yehova masoma ońola min minam, nika e masise̱le̱ pe̱ wa be̱be̱ na mo̱.

6. (a) Ne̱ni te̱se̱ la mambo ma mudī ma masise̱le̱no̱ moto be̱be̱ na Yehova e? (b) Njika mambo jeno̱ ná di te̱se̱ ke̱ di dia mūtu e?

⁶ Njo̱m ni londe̱ iba ńe nde ná, niponda o botedino̱ o po̱ngo̱ miwe̱n o po̱le̱ mambo ma mudī o te̱se̱no̱, o mabotea o ko̱te̱le̱ bebolo ba bwam o miso̱ ma Yehova. Nika e mabata sise̱le̱ wa be̱be̱ na mo̱. Ńamuloloma Paulo a to̱pi ná: “Loba a titi nusite̱m na sim, o dimbea ebol’ańu na ndol’ańu ńena lo lee̱le̱no̱ ońola dina lao.” (Bon. 6:10) O s’e̱ne̱ ná o dia o salo jita o te̱se̱ mambo ma mudī o po̱le̱. Kristina a ta nde bodun ba dom la mbu ponda a no̱ngino̱ bedomsedi o langa ponda te̱ myango ma longe̱ ma Mboṅ a Yehova ya jemea. Toby pe̱ to̱na 12 la mbu, a no̱ngi bedomsedi o langa Bibe̱l ńe̱se̱ oboso ná a madubisabe̱. Maxim a ta nde bodun ba 11 la mbu, ndom’ao ńa muto Noemi pe̱ 10, ponda bā babane̱ ba dubisabe̱no̱. Ba ta nde ba te̱se̱ ná ba mala bolea o Bete̱l. Ná bongwane̱ babo̱me̱ne̱ o po̱le̱ nje ba te̱se̱no̱, ba bate̱ dipapa la jingea o Bete̱l o edim’a bolongi babu. Mo̱ we ná wombwea njika mambo ma mudī me wa mweńa, o botea pe̱ po̱ngo̱ miwe̱n o po̱le̱ mo̱ e?​—Langa Filipi 1:10, 11, NW.

7, 8. (a) Ne̱ni te̱se̱ la mambo ma mudī o po̱le̱ di mongwane̱no̱ o no̱ngo̱ bedomsedi na bo̱bise̱ la ńolo e? (b) Ońola nje ekoke̱le̱ ewo̱ e po̱sino̱ ná e si mala o Unive̱rsite e?

⁷ Njo̱m ni londe̱ ilalo ńa pomane̱ te̱se̱ mambo ma mudī o po̱le̱ o longe̱ e mombwea nde no̱ngo̱ la bedomsedi. Bekoke̱le̱ bangame̱n no̱ngo̱ bedomsedi jombwea esukulu, ebolo, na mambo mape̱pe̱. No̱ngo̱ la bedomsedi le nde ka po̱so̱ la ngea ni te̱nge̱n ke̱ we o makan ma ngea. Etum te̱ o bino̱ nge’a we̱ni weno̱ o wala, po̱so̱ la ngea ni te̱nge̱n di titi ndutu. Mulemlem pe̱ nde yeno̱ ke̱ o bi njika mambo ma mudī o te̱se̱no̱ oboso, no̱ngo̱ la bedomsedi ba bwam di si me̱nde̱ be̱ ndutu. Minia 21:5 mo̱ ná: “Dutea na ngiń’ebolo ba matombwane̱.” O pomane̱ te̱ dutea o mambo ma mudī wangame̱nno̱ po̱le̱, o me̱nde̱ pe̱ pomane̱ tombwane̱. Nika nde Damaris a bolino̱ ponda e pulino̱ ná a no̱nge bedomsedi ba mweńa ke̱ a dia ekoke̱le̱.

⁸ Munańango Damaris a bo̱le̱ esukul’ao esadi na mitila ma bwam. A wusa  jemea jongwane̱ la go̱bina ná ale jokwa ebol’a lo̱ya o Unive̱rsite, nde a po̱si nde ebol’a bank. Ońola nje e? Mo̱ ná: “Na pomane̱ no̱ngo̱ bedomsedi o be̱ paonia. Nika e ta e baise̱ ná na be̱ne̱ ebol’a epas’a ponda. Dipapa la lo̱ya di wusa wanea mba mo̱ni jita, nde na si wusa kusa ebol’a epas’a ponda.” Ye 20 ma mbu we̱nge̱ Damaris eno̱ paonia. Mo̱ e mbaki ná a po̱si lambo la mweńa, na ná a no̱ngi pe̱ bedomsedi ba bwam e? E. Mo̱ ná: “Na me̱ne̱ jita la malo̱ya o wum’am y’ebolo. Ba mabola nde ebolo na wusano̱ bola ke̱ nokwa lo̱ya. Nde, jita labu di si mabwane̱ ebol’abu muńe̱nge̱. Bedomsedi na no̱ngino̱ o be̱ paonia bongwane̱ mba o samba yuka la mulema y’ebolo e wusano̱ wanea mba; nde be wanea mba jita la mimbu ma muńe̱nge̱ o ebol’a Yehova.”

9. Ońola nje beso̱mbe̱ basu bangame̱nno̱ musesako ma weawea e?

⁹ Lokoli la beso̱mbe̱ le o myemba ma wase ńe̱se̱ langame̱n musesako ma weawea. Ebanja bolea la Yehova na mambo ma mudī nde be mambo maboso ba te̱se̱no̱ o longe̱ labu. I ńai a beso̱mbe̱ i mabwane̱ longe̱ labu muńe̱nge̱, o mulemlem ma ponda pe̱ i mokwa o bupe̱ bediedi ba Yehova o mambo me̱se̱. E be̱ o esukulu, o ebolo, na o longe̱ la mbia. Salomo a tili ná: “Lakisane̱ Loba na mulema mo̱ngo̱ mwe̱se̱. O me̱se̱ o mabolano̱, o̱nge̱le̱ nde mo̱, nde a me̱nde̱ ne̱nge̱le̱ mangea mo̱ngo̱.” (Min. 3:5, 6) Beso̱mbe̱ be o mwemba ma Kriste̱n be tiki o miso̱ ma Yehova, a to̱ndi babo̱ jita, a matata, die̱le̱, na namse̱ pe̱ babo̱.

10. (a) Ońola nje ebol’a dikalo yangame̱nno̱ be̱ biso̱ lambo laboso e? (b) Ne̱ni jeno̱ ná di bata be̱ jangwa o ebol’a dikalo e?

¹⁰ Eso̱mb’a moto yena e we̱le̱ longe̱ lao le̱se̱ o do̱lisane̱ Yehova e mombwea ebol’a dikalo tobotobo. Yesu Kristo a kwali ná “myango ma bwam mangame̱n se̱le̱ langwabe̱.” (Marko 13:10) Kana ebol’a dikalo yeno̱ musunga, mo̱ nde yangame̱n be̱ biso̱ lambo laboso. Mo̱ we ná o te̱se̱ ná o bate no̱ngo̱ dongo o ebol’a dikalo ponda na ponda e? Mo̱ we ná o be̱ paonia e? Nje pe̱ bola yete̱na o si mabwane̱ dikalo muńe̱nge̱ e? Ne̱ni pe̱ weno̱ ná o bata be̱ jangwa o dikalo e? Mambo maba man ma me̱nde̱ jongwane̱ wa: Boṅsane̱ bwam, o s’ese̱le̱ pe̱ to̱ o langwea bape̱pe̱ nje o bino̱. O me̱nde̱ be̱ mańaka o je̱ne̱ ne̱ni weno̱ o bwane̱ ebol’a dikalo muńe̱nge̱.

11, 12. (a) Nje beso̱mbe̱ beno̱ ná be bola o boṅsane̱ babo̱me̱ne̱ o bola mboṅ e? (b) Ne̱ni eso̱mbe̱ ewo̱ e bolane̱no̱ epolo e bolabe̱ mo̱ o bola mboṅ e?

¹¹ Ná o boteye, we ná o se̱le̱ boṅsane̱ jalabe̱ la myuedi mako̱m mo̱ngo̱ m’esukulu ma yo̱kino̱ baise̱. K’eyembilan, myuedi ka min, “Ońola nje o dube̱no̱ Loba e?” Mulomba masu jw.org mu be̱n sinima ni boṅsane̱be̱ o jongwane̱ beso̱mbe̱ ná ba we̱le̱ jalabe̱ mi myuedi. Ala o KALATI, o so̱le o BEKOKE̱LE̱. Oten, o me̱nde̱ je̱ne̱ sinima ni be̱n tema ná “Nje myemba mo̱ngo̱ ma yabe̱ mi makwalano̱​—Dube̱ Loba.” Ni sinima e me̱nde̱ lee̱ wa ne̱ni boṅsane̱ jalabe̱ lo̱ngo̱. Ben bepasi ba Bibe̱l belalo be po̱so̱be̱ pe̱ bena bongwane̱ wa o bola beteledi ba mambo o dube̱no̱​—Bonahebe̱r 3:4, Roma 1:20, na Myenge 139:14. Bolane̱ nin sinima ná o boṅsane̱ jalabe̱ la myuedi mō̱ te̱ ombusa mine̱.​—Langa 1 Petro 3:15-16a.

¹² Langwea mako̱m mo̱ngo̱ m’esukulu ná babo̱me̱ne̱ be ná bala o jw.org o so̱ mambo oten. Nika nde Luka eso̱mbe̱ ewo̱ ya 15 la mbu e bolino̱. Klas’ao e ta ńombwea to̱ti la ńai na ńai a bebasi, na Luka e̱ne̱ ná kalat’esukulu e ta e be̱ne̱ mo̱nge̱le̱ ma mpenga mō̱ jombwea Mboṅ a Yehova. To̱na a se̱le̱no̱ bwa bo̱ngo̱ son,  a baise̱ wonja ná a lingeye Mboṅ a Yehova, na mulēd’ao emea. Luka a boli beteledi ba mambo a dube̱no̱, a lee̱ pe̱ klasi ńe̱se̱ mulomba masu. Na mulēdi a baise̱ bautu be̱se̱ ná bombwe sinima Dipa mubandedi esibe̱ bolane̱ losilo ńe o mulomba masu. Luka a bo muńe̱nge̱ ná a boli mboṅ a bwam.

13. Ońola nje di s’angame̱nno̱ bo̱bo̱ ke̱ mitakisan mi po̱i e?

¹³ O si bo̱bo̱ mulema, to̱ e be̱ nde ná nge’ango̱ ńa lo̱ndo̱ ńe mikondoki ponda iwo̱. (2 Tim. 4:2) Tingame̱ nde na mambo o te̱se̱no̱ o po̱le̱, to̱ mitakisan mi po̱ nde. Katarina a ta nde a be̱ne̱ 17 la mbu buka te̱ ponda o no̱ngino̱ bedomsedi o te̱ye̱ diko̱m lao l’ebolo te̱ dikalo. Mō̱ ńabu a lou mo̱ ngedi jita, nde a s’ese̱le̱ ná nika ńeke mo̱. Bedangwedi bao ba bwam to̱na mitakisan be ńakisane̱ Hans, diko̱m lao l’ebolo dipe̱pe̱. Na Hans a langa kalat’asu, okwa Bibe̱l, a dubisabe̱ pe̱. Katarina asumwe̱ o mu mundi esibe̱ mo̱ bia nje e tombi. Dutea te̱ muńe̱nge̱ a bono̱ ombusa 13 la mbu, ke̱ a jai o Ndabo a Janea na mbia mao, nde e̱ne̱ Hans a mondea o kwande̱ki o bola ekwal’a ntelele! A ta muńe̱nge̱ jita ná a s’ese̱le̱ ná to̱ lambo leke mo̱ o po̱le̱ nje a tano̱ a te̱se̱!

14, 15. (a) Nje beso̱mbe̱ be s’angame̱nno̱ dimbea ke̱ be oteten a mińakisan e? (b) Ne̱ni beso̱mbe̱ beno̱ ná be lembe̱ mińakisan ma mako̱m mabu e?

¹⁴ Din jokwa lembe̱ wa o no̱ngo̱ bedomsedi ba we̱le̱ longe̱ lo̱ngo̱ mususu o ńo̱ng’ango̱ ńe nde ná o boleye Yehova. Nika e mapula kwala ná mambo ma mudī nde wangame̱nno̱ te̱se̱ oboso. Pondapo̱ bene̱ beso̱mbe̱ be ńo̱ṅo̱n ango̱ be we̱le̱ nde babo̱me̱ne̱ mususu o tombise̱ pond’a bwam, be pe̱ ná be bele̱ wa ná o late mundenge na babo̱. E me̱nde̱ pula ná pomane̱ to̱ jindea o lee̱le̱ ná o tingame̱ nde na nje o po̱sino̱. O s’ese̱le̱ ná mako̱m mo̱ngo̱ ma denge̱le̱ wa ngea. Di timbi te̱ o eyembilan a mutoa, ye̱ke̱i te̱ o si me̱nde̱ pe̱ye̱ o mutoa buka te̱ ońolana mu pe̱le̱ bato be o tombise̱ pond’a bwam, nde o si bie we̱ni mweno̱ o wala.

¹⁵ Mbadi jita ye ya lembe̱ mińakisan ma mako̱m. K’eyembilan, samba bete̱medi be ná be we̱le̱ wa o makekisan.  (Min. 22:3) O̱nge̱le̱ pe̱ betune̱ be me̱nde̱ ko̱ye̱ wa. (Gal. 6:7) Jongwane̱ dipe̱pe̱ le nde ná wembe ná o be̱n ńo̱ng’a malea. Sibise̱ la ńolo di me̱nde̱ jongwane̱ wa o kasa malea ma bayedi bo̱ngo̱ na ma bonasango bou o mudī be o mwemba.​—Langa 1 Petro 5:5, 6.

16. Langwa te̱ myango mō̱ mi malee̱ muse̱ṅ ma be̱ne̱ sibise̱ la ńolo.

¹⁶ Sibise̱ la ńolo di tute̱le̱ Kristo̱f o kasa malea ma bwam. Ponda to̱ ininga ombusa dubise̱ lao, a botedi o tuna ńolo ponda te̱. Na bene̱ beso̱mbe̱ ba wa wuma be baise̱ mo̱ ná a late mundenge na babo̱. A kwalisane̱ mutudu mō̱ nika, na nu mutudu a kwalane̱ mo̱ ná a se̱le̱ jo̱nge̱le̱ mambo ma ńai na ńai nika ńeno̱ ná e wana, k’eyembilan, edi a pembisan, denge̱ a máno̱ngo̱ bedomsedi. To̱ na nika Kristo̱f a lati na babo̱. Nde, na ponda, a timbi so̱ ná di tuna la ńolo di ta njo, di wusa pe̱ wana mbeu a ńolo. Na mo̱ a kwalisane̱ pe̱te̱ batudu jita, babo̱ be̱se̱ ba boli mo̱ malea ma se̱medi o Bibe̱l. Kristo̱f mo̱ ná: “Yehova a boli mba babole̱ malea ba bwam, na sengane̱ pe̱ mo̱ Loba, to̱ná nika e no̱ngino̱ ponda.” Mo̱ o be̱n sibise̱ la ńolo eyeka o kasa malea ma bwam ma batudu e?

17, 18. (a) Nje Yehova a mapuleano̱ beso̱mbe̱ we̱nge̱ e? (b) Njika jombwe̱ le ná di po̱ ke̱ moto ā taṅ a moto e, ne̱ni samba nika e? Bola eyembilan.

¹⁷ Mulangwedi mo̱ ná: “A eso̱mb’a moto [to̱ ngo̱ndedi], bwa muńe̱nge̱ o pond’ango̱ ńa mūtu; ese̱le̱ pe̱ mulema mo̱ngo̱ mu be̱ mutam o mińa mo̱ngo̱ m’eso̱mbe̱.” (Mul. 11:9) E, Yehova a mapula ná mulema ma wa eso̱mbe̱ mu be̱ mutam. Din jokwa di lee̱le̱ mbadi po̱ weno̱ ná o be̱ mutam. Benga we̱le̱ wame̱ne̱ mususu o mambo ma mudī o te̱se̱no̱ o bupe̱, we̱le̱ Yehova o myano mo̱ngo̱ me̱se̱. O pomane̱ te̱ o bola nika, o me̱nde̱ pe̱ pomane̱ kusa bediedi, betatedi, na minam ma Yehova. O̱nge̱le̱ malea ma bwam me̱se̱ ma nanga o Eyal’a Loba, o si dimbea pe̱ to̱ man: “Nde o̱nge̱le̱ Muweked’ango̱ o mińa mo̱ngo̱ m’eso̱mbe̱.”​—Mul. 12:1.

¹⁸ O si me̱nde̱ tika be̱ eso̱mbe̱. Beso̱mbe̱ be mapomane̱ koka o be̱ taṅ a bato. Nje ye ndutu ye nde ná, taṅ a bato iwo̱ i yo̱ki o jombwe̱ ná i bupe̱ nde mambo m’ewolo o mińa m’eso̱mbe̱, to̱so̱ ná i si te̱se̱ nde lambo la bupe̱ na bambam. Nde beso̱mbe̱ bena be mabupe̱ mambo ma mudī nin we̱nge̱, be me̱nde̱ be̱ muńe̱nge̱ ke̱ bā taṅ a bato ońola bedomsedi ba no̱ngino̱. Nika nde Meriana a bolino̱. A ta jangwa jita o tuna la ńolo ke̱ a dia eso̱mbe̱. Ba ta ba baise̱ mo̱ ná a no̱nge dongo o pembisan ninde̱ne̱ ni bambe̱ bekombo jita. Nde a bangi, a po̱so̱ nde ebol’a pond’a mususu. Buka 30 ma mbu ombusa ponda, Meriana a dia te̱ nde o ebol’a pond’a mususu, mwemba na mom’ao. Mo̱ ná: “Dina, edube, doi, na m’bwaṅ be nde ońola son a ponda, na bupe̱ la ngo̱. Bolea la Loba na jongwane̱ la bato o bia mo̱ nde be mambo ma mweńa na mena ma maje̱ pond’a bwaba.”

19. Langwa ne̱ni pomane̱ la te̱se̱ mambo ma mudī o pole̱ o pond’eso̱mbe̱ di mawanano̱ tombwane̱.

¹⁹ Yangame̱n ná beso̱mbe̱ be o mwemba be sesabe̱, ebanja to̱na mitakisan ba be̱nno̱, ba we̱le̱ babo̱me̱ne̱ mususu o bolea Yehova. Ba mate̱se̱ mambo ma mudī o bupe̱, na bola pe̱ ebol’a dikalo epol’a mweńa o longe̱ labu. Omo̱ń a me̱se̱, ba no̱ngi pe̱ bedomsedi ná ba si mese̱le̱ ná to̱ lambo di denge̱le̱ babo̱ ngea. A beso̱mbe̱ bińo̱ le ná lo be̱ mbaki ná ebol’ańu ya ntu e titi ewolo. Bonasango na bonańango ańu ba ndolo ba masue̱le̱ bińo̱. Ońola nika, bińo̱ ‘bake̱ Yehova bebolo bańu, nde myano mańu mi matombwane̱.’