O 2 Korinto 12:2, 3, Paulo a to̱pedi ońola moto mō̱ nu “bambabe̱ nate̱na o mo̱ń ni londe̱ ilalo.” Nja nu ta ná e? Ke̱ a matilea mwemba ma Korinto, Paulo a kiki ná Loba a ta a bolane̱ mo̱ ka ńamuloloma. (2 Kor. 11:5, 23) Na mo̱ a to̱pea ońola “me̱ne̱ na bebīsedi ba Sango.” O din je̱ne̱ Paulo a si to̱pedi ońola bonasango bape̱pe̱. A ta so̱ nde a to̱pea ońola mo̱me̱ne̱ ka moto nu kusi me̱ne̱ na bebīsedi.​—2 Kor. 12:1, 5.

Paulo so̱ nde a ta nu moto nu “bambabe̱ nate̱na o mo̱ń ni londe̱ ilalo” na nu ‘bambabe̱ o paradisi.’ (2 Kor. 12:2-4) A bolane̱ eyal’a “bebīsedi,” yena e makwaleye̱ ońola nje e me̱nde̱ be̱ o kie̱le̱ ni maye̱.

Nje Paulo e̱nno̱ ka “mo̱ń ni londe̱ ilalo” e?

O Bibe̱l, “mo̱ń” ńe ná e pula kwala dibobe̱ la mo̱ń nika ńe nde mo̱ń ni me̱ne̱ne̱ na miso̱. (Bbot. 11:4; 27:28; Mat. 6:26) Nde eyal’a “mo̱ń” e mabolane̱ pe̱ o mbadi ipe̱pe̱. Ponda iwo̱ e mapula nde kwala byanedi ba bato ba benama. (Dan. 4:20-22) Ńe pe̱ ná e pula kwala byanedi ba Loba, k’eyembilan tongwea na Janea lao.​—Bbī. 21:1.

Paulo e̱n “mo̱ń ni londe̱ ilalo.” Nje a tano̱ a pula kwala e? Bibe̱l e yo̱ki kwalea ońola lambo ngedi ilalo o pula yikiye̱ mo̱, to̱ batea mo̱ ngińa. (Yes. 6:3; Hes. 21:27; Bbī. 4:8) E me̱ne̱ne̱ biana niponda a tano̱ a kwalea ońola “mo̱ń ni londe̱ ilalo,” Paulo a ta nde a kika mbad’a byanedi ńasam, ńe bonde̱ne̱ ka Janea la Mesia lena di be̱n Yesu Kristo na 144 000 ba maneye̱ mwemba na mo̱. (Ombwa Étude perspicace des Écritures, Vol. 1, p. 473, 476.) Ka nje te̱ ńamuloloma Petro a tilino̱, je nde o jenge̱le̱ “mo̱ń a peńa” kaponda dikaki la Loba.​—2 Pet. 3:13.

Nje Paulo a bele̱no̱ ná ‘paradisi’ e?

Eyal’a ‘paradisi’ pe̱ e mapula kwala ńai na ńai a mambo: (1) Jombwedi te̱ wum’a boja ya moto ya bebaedi, e te̱nge̱n ná ‘paradisi’ e be̱ nde Paradisi ni me̱nde̱ be̱ o wase. (2) Ńe pe̱ ná e pula kwala was’a peńa ńa musango tumba la Loba di me̱nde̱no̱ bwane̱ muńe̱nge̱. (3) Buka nika, ńe pe̱ ná e pula kwala minam ma betańsedi mi me̱nde̱ be̱ o ‘paradis’a Loba’ o mo̱ń ni kwalabe̱ o Bebīsedi 2:7.​—Ombwa Njongo a Betatedi (ńa fre̱nsi) ńa 15 má Madibe̱dibe̱ 2015 dip. 8. don. 8.

Ye ná e be̱ ná Paulo a ta nde a kwalea yin mbadi ilalo o 2 Korinto 12:4 ke̱ a makwalea ońola je̱ne̱ a kusino̱.

O pe̱m n’esungu:

“Mo̱ń ni londe̱ ilalo” ni kwalabe̱ o 2 Korinto 12:2 ńe nde yen ebe Janea la Mesia le o mā ma Yesu Kristo na 144 000, bena ba longi “mo̱ń a peńa.”​—2 Pet. 3:13.

Ńe nde “mo̱ń ni londe̱ ilalo” ońolana Janea le nde mbad’a byanedi ni peti, na ńena ńasam.

Ni ‘paradisi’ owe̱ni Paulo a tano̱ a “bambabe̱” o je̱ne̱ ńe nde ná e be̱ yen ebe (1) paradisi ni me̱nde̱ be̱ o wase, (2) paradisi ńa mudī ni me̱nde̱ be̱ o wase, ni me̱nde̱ be̱ bonde̱ne̱ buka ni ńa tatan, na (3) ‘paradis’a Loba’ o mo̱ń ńena ni me̱nde̱ be̱ mwemba na ni ni me̱nde̱ be̱ o was’a peńa.

Was’a peńa e me̱nde̱ so̱ nde be̱ bete̱medi ba peńa, nika ńe nde byanedi ba peńa, Janea la Loba, na mbel’a moto ni maboleye̱ Yehova o paradisi o wase.